ନୂଆଦିଲ୍ଲୀ : ଜିଓମି ଏହାର ଦୁଇଟି ନୂତନ ସ୍ମାର୍ଟଫୋନ୍ ‘ରେଡମି ନୋଟ୍ -୯ ପ୍ରୋ’ ଏବଂ ‘ରେଡମି ନୋଟ୍- ୯ ପ୍ରୋ ମ୍ୟାକ୍ସ’ ଗୁରୁବାର ଭାରତରେ ଲଞ୍ଚ କରିଛି। ଏହି ଦୁଇଟି ଫୋନର ଲଞ୍ଚ ପ୍ରଥମେ ଅଫଲାଇନରେ ହେବାର ଥିଲା କିନ୍ତୁ କରୋନା ଭାଇରସ୍ କାରଣରୁ ଏହି କାର୍ଯ୍ୟକ୍ରମ ଅନଲାଇନରେ ଆୟୋଜିତ ହୋଇଥିଲା । ରେଡମି ନୋଟ୍ -୯ ସିରିଜ୍ ହେଉଛି ରେଡମି ନୋଟ୍-୮ ସିରିଜର ଏକ ଅପଗ୍ରେଡ୍ ସଂସ୍କରଣ । ଉଭୟ ଫୋନର ପାୱାର ବଟନରେ ଫିଙ୍ଗର ପ୍ରିଣ୍ଟ ସେନସର ଦିଆଯାଇଛି ।
‘ରେଡମି ନୋଟ୍ -୯ ପ୍ରୋ’ରେ ୬.୬୭ ଇଞ୍ଚ ଫୁଲ୍ ଏଚଡି ପ୍ଲସ୍ ଡିସପ୍ଲେ ଦିଆଯାଇଛି । ରେଡମି ନୋଟ୍-୯ ପ୍ରୋରେ ଚାରୋଟି ପଛ କ୍ୟାମେରା ଅଛି ଯେଉଁଥିରେ ଗୋଟିଏ କ୍ୟାମେରାର ଲେନ୍ସ ୪୮ ମେଗାପିକ୍ସେଲ, ଅନ୍ୟଟି ୮ ମେଗାପିକ୍ସେଲର ଅଲଟ୍ରା କ୍ୟାମେରା , ତୃତୀୟଟି ୫ ମେଗାପିକ୍ସେଲ ମାକ୍ରୋ ଲେନ୍ସ ଏବଂ ଚତୁର୍ଥଟି ୨ ମେଗାପିକ୍ସେଲର ରହିଛି । ଏହି ଫୋନରେ ୧୬ ମେଗାପିକ୍ସେଲର ସାମ୍ନା କ୍ୟାମେରା ଦିଆଯାଇଛି । ଏହି ଫୋନରେ କ୍ୱାଲକମର ସ୍ନାପଡ୍ରାଗନ୍ ୭୨୦ଜିର ପ୍ରୋସେସର ଦିଆଯାଇଛି। ଏହା ବ୍ୟତୀତ ଫୋନକୁ ସୁରକ୍ଷା ଦେବାପାଇଁ ଗରିଲା ଗ୍ଲାସ ଦିଆଯାଇଛି।
ରେଡମି ନୋଟ୍ -୯ ପ୍ରୋରେ ୫୦୨୦ ଏମଏଚର ବ୍ୟାଟେରୀ ସହ ୧୮ ୱାଟ ଫାଷ୍ଟ ଚାର୍ଜର ଦିଆଯାଇଛି। ଏହି ଫୋନଟି ୪ ଜିବି ରାମ ସହ ୬୪ ଜିବି ଷ୍ଟୋରେଜ୍ ଏବଂ ୬ ଜିବି ରାମ ସହ ୧୨୮ ଜିବିର ଷ୍ଟୋରେଜ ଦିଆଯାଇଛି । ଯାହାର ମୂଲ୍ୟ ଯଥାକ୍ରମେ ୧୨,୯୯୯ ଏବଂ ୧୫,୯୯୯ ଟଙ୍କା ରଖାଯାଇଛି । ମାର୍ଚ୍ଚ ୧୭ ରୁ ଏହି ଫୋନ ଆମାଜନ, ଏମଆଇ ହୋମ ଏବଂ ଏମଆଇର ଅନଲାଇନ୍ ଷ୍ଟୋରରେ ବିକ୍ରି ହେବଜ୍ଝ
‘ରେଡମି ନୋଟ୍ ୯- ପ୍ରୋ ମ୍ୟାକ୍ସ’ରେ ୬.୬୭ ଇଞ୍ଚ ଫୁଲ୍ ଏଚଡି ପ୍ଲସ୍ ଡିସପ୍ଲେ ମଧ୍ୟ ଅଛି । ଏହା ବ୍ୟତୀତ ଫୋନରେ ରେଡମି ନୋଟ୍-୯ ପ୍ରୋ ପରି ଚାରୋଟି ପଛ କ୍ୟାମେରା ମଧ୍ୟ ରହିଛି। ଏହାର ଗୋଟିଏ କ୍ୟାମେରା ୬୪ ମେଗାପିକ୍ସେଲ, ଅନ୍ୟଟି ୮ ମେଗାପିକ୍ସେଲ , ତୃତୀୟଟି ୫ ମେଗାପିକ୍ସେଲ ମାକ୍ରୋ ଲେନ୍ସ ଏବଂ ଚତୁର୍ଥଟି ୨ ମେଗାପିକ୍ସେଲର କ୍ୟାମେରା ଦିଆଯାଇଛି। ଏହି ଫୋନରେ ୩୨ ମେଗାପିକ୍ସେଲର ସେଲଫି କ୍ୟାମେରା ରହିଛି। ଏହି ଫୋନରେ କ୍ୱାଲକମର ସ୍ନାପଡ୍ରାଗନ୍ ୭୨୦ଜିର ପ୍ରୋସେସର ଦିଆଯାଇଛି।
ରେଡମି ନୋଟ୍ -୯ ପ୍ରୋ ମ୍ୟାକ୍ସରେ ୫୦୨୦ ଏମଏଚର ବ୍ୟାଟେରୀ ଦିଆଯାଇଛି। । ଏହା ସହ ୩୩ ୱାଟର ଫାଷ୍ଟ ଚାର୍ଜର ମଧ୍ୟ ରହିଛି। ଏହି ଫୋନ୍ ୪ଜିବି ରାମ ୬୪ ଜିବି ଷ୍ଟୋରେଜ୍ , ୬ଜିବି ରାମ ୧୨୮ ଜିବି ଏବଂ ୮ ଜିବି ରାମ ସହ ୧୨୮ ଜିବି ଷ୍ଟୋରେଜ ଦିଆଯାଇଛି। ଯାହାର ମୂଲ୍ୟ ଯଥାକ୍ରମେ ୧୪,୯୯୯, ୧୬,୯୯୯ ଏବଂ ୧୮,୯୯୯ ଟଙ୍କା ରହିଛି। ମାର୍ଚ୍ଚ ୨୫ରୁ ଆମାଜନ, ଏମଆଇ ହୋମ ଏବଂ ଏମଆଇ ଅନଲାଇନ୍ ଷ୍ଟୋରରେ ଏହି ଫୋନ୍ ବିକ୍ରି ହେବ।
