ଚଣ୍ଡିଗଡ: ଜାତୀୟ ସ୍ବାର୍ଥ ରକ୍ଷା କରିବା ହେଉଛି ତାଙ୍କ ସରକାରର ମୁଖ୍ୟ ଲକ୍ଷ୍ୟ। ତେଣୁ ଭାରତ ଉପରେ କୌଣସି ରାଷ୍ଟ୍ର କୁଦୃଷ୍ଟି ପକାଇଲେ ଏହାକୁ କଡା ଜବାବ ଦିଆଯିବ ବୋଲି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କହିଛନ୍ତି। ରବିବାର ହରିୟାଣାର ଝାଜରରେ କିମ୍ବଦନ୍ତୀ ଯୋଦ୍ଧା ପୃଥ୍ବୀରାଜ ଚୌହାନଙ୍କ ପ୍ରତିମୂର୍ତ୍ତିକୁ ଉନ୍ମୋଚନ କରିବା ଅବସରରେ ରାଜନାଥ କହିଛନ୍ତି ଯେ ଭାରତକୁ କେହି ଦୁର୍ବଳ ରାଷ୍ଟ୍ର ମନେକରିବା ଉଚିତ୍ ନୁହେଁ। ଆମେ ଶାନ୍ତିରେ ବିଶ୍ବାସ କରୁ। ମାତ୍ର କୌଣସି ରାଷ୍ଟ୍ର ଯଦି ଆମକୁ କ୍ଷତି ପହଞ୍ଚାଏ ତେବେ ଏହାକୁ କଡା ଜବାବ ଦିଆଯିବ।
୨୦୧୬ ସର୍ଜିକାଲ ଷ୍ଟ୍ରାଇକ ଓ ୨୦୧୯ ବାଲାକୋଟ ବିମାନ ଆକ୍ରମଣ ଏହାର ପ୍ରମାଣ। ଏହି ଦୁଇ ଆକ୍ରମଣରେ ଭାରତ ସେନା ଏହାର ସାହସିକତାର ପ୍ରମାଣ ଦେଇସାରିଛି। ପୂର୍ବ ଲଦାଖର ଗଲୱାନ ଉପତ୍ୟକାରେ ମଧ୍ୟ ଭାରତ ସେନା ନିଜର ସାହସ ଓ ଦକ୍ଷତାର ପ୍ରମାଣ ଦେଇଛି।
ଭାରତକୁ ଉପନିବେଶ ମାନସିକତାରୁ ମୁକ୍ତ ନିମନ୍ତେ ନରେନ୍ଦ୍ର ମୋଦୀ ସରକାର ଅନେକଗୁଡିକ ପଦକ୍ଷେପ ନେଇଛନ୍ତି। ଯେପରିକି ନୌସେନାର ପତାକାର ପରିବର୍ତ୍ତନ କରାଯିବା। ସେହିପରି ଦେଶରେ ପ୍ରଚଳିତ ୧୫୦୦ ବ୍ରିଟିଶ କାଳର ଆଇନକୁ ଉଚ୍ଛେଦ କରାଯାଇଛି। ସେହିପରି ରାଜଧାନୀ ଦିଲ୍ଲୀର ଅନେକ ରାସ୍ତାର ନାମକୁ ପରିବର୍ତ୍ତନ କରାଯାଇଛି। କଂଗ୍ରେସର ନାମ ନ ନେଇ ରାଜନାଥ କହିଛନ୍ତି ଯେ ଏହି ପୁରୁଣା ଦଳ ଜି-୨୦ ରାଷ୍ଟ୍ରଗୋଷ୍ଠୀ ନିମନ୍ତେ ଭାରତ ପ୍ରସ୍ତୁତ କରିଥିବା ଲୋଗୋକୁ ନେଇ ଅଜଥା ବିବାଦ ସୃଷ୍ଟି କରୁଛି। ଜି-୨୦ ଲୋଗୋରେ ପଦ୍ମଫୁଲ ରଖାଯିବାକୁ ନେଇ କଂଗ୍ରେସ ଆପତ୍ତି ଉଠାଇଛି। କଂଗ୍ରେସ କହିଛି ଯେ ଜି-୨୦ ଲୋଗୋରେ ପଦ୍ମଫୁଲକୁ ସ୍ଥାନୀତ କରି ବିଜେପି ଏହାର ଦଳୀୟ ପ୍ରଚାର କରୁଛି। ମାତ୍ର ବିଜେପି କହିଛି ଯେ ପଦ୍ମଫୁଲ ହେଉଛି ଭାରତର ଜାତୀୟ ଫୁଲ। ତେଣୁ ଜି-୨୦ ଲୋଗୋରେ ଥିବା ପଦ୍ମଫୁଲ ଆମ ଜାତୀୟ ଚିହ୍ନର ପ୍ରତୀକ। ହରିୟାଣାର ଝାଜରକୁ ବୀର ମାଟି ବୋଲି ସମ୍ବୋଧନ କରି ରାଜନାଥ କହିଛନ୍ତି ଯେ ଏହି ଅଞ୍ଚଳର ଅନେକ ଯୋଦ୍ଧା ଦେଶ ପାଇଁ ପ୍ରାଣବଳୀ ଦେଇଛନ୍ତି।
