ଭୁବନେଶ୍ବର : ଦକ୍ଷିଣ ପଶ୍ଚିମ ମୌସୁମି ବାୟୁ ବିଶେଷ ସକ୍ରିୟ ହୋଇପାରୁ ନଥିବାରୁ ରାଜ୍ୟରେ ବର୍ଷା ପରିମାଣ ଧୀରେ ଧୀରେ କମିବାରେ ଲାଗିଛି। କେବଳ ଘୂର୍ଣ୍ଣିବଳୟ ଏବଂ ଟ୍ରଫ ଲାଇନ ପ୍ରଭାବରେ ରାଜ୍ୟର ଅଳ୍ପ କେତେକ ଜିଲାରେ ମଝିରେ ମଝିରେ ବର୍ଷା ହେଉଥିଲେ ହେଁ ଲଗାଣ ବର୍ଷା ଦେଖାନାହିଁ। ଦୁଇ ସପ୍ତାହ ଭିତରେ ଲଘୁଚାପ ସୃଷ୍ଟି ନହେବା କାରଣରୁ ମୌସୁମି ବିଶେଷ ସକ୍ରିୟ ହୋଇପାରୁନି। ସ୍ବାଭାବିକ ବର୍ଷା ଅଭାବରୁ ଚାଷ କାର୍ଯ୍ୟରେ ବାଧା ଉପୁଜିଛି। ସପ୍ତାହକ ଭିତରେ ଲଘୁଚାପ ସୃଷ୍ଟି ନହେଲେ ଚାଷ କାର୍ଯ୍ୟ ପ୍ରଭାବିତ ହେବାର ଆଶଙ୍କା ରହିଛି। ପାଣିପାଗ ବିଭାଗ ସୂତ୍ରରୁ ମିଳିଥିବା ସୂଚନାରୁ ଜଣାପଡ଼ିଛି ଯେ ଉତ୍ତରପ୍ରଦେଶର ପୂର୍ବାଞ୍ଚଳରୁ ଛତିଶଗଡ଼ ଦେଇ ଦକ୍ଷିଣ ଓଡ଼ିଶା ପର୍ଯ୍ୟନ୍ତ ଏକ ଟ୍ରଫଲାଇନ ସୃଷ୍ଟି ହୋଇଛି। ଏହାର ପ୍ରଭାବରେ ଆସନ୍ତା ୪ଦିନ ରାଜ୍ୟର କିଛି ଜିଲାରେ ସ୍ବଳ୍ପ ବର୍ଷାର ସମ୍ଭାବନା ରହିଛି। ଆସନ୍ତାକାଲି ଉପକୂଳ ଓଡ଼ିଶା ସମେତ ସୁନ୍ଦରଗଡ଼, କେନ୍ଦୁଝର, ମୟୂରଭଞ୍ଜ, ଢ଼େଙ୍କାନାଳ, କନ୍ଧମାଳ, ଦେବଗଡ଼ ଓ ଅନୁଗୋଳରେ ଏବଂ ୧୨ତାରିଖରେ ଦକ୍ଷିଣ ଉପକୂଳ ସମେତ ରାୟଗଡ଼ା, କନ୍ଧମାଳ, କଳାହାଣ୍ଡି, ନବରଙ୍ଗପୁର, କେନ୍ଦୁଝର, ମୟୂରଭଞ୍ଜ ଓ ବଲାଙ୍ଗୀରରେ ଘଡ଼ଘଡ଼ି ସହିତ ବର୍ଷା ହେବ। ୧୩ ଓ ୧୪ରେ ରାଜ୍ୟର ଅଧିକାଂଶ ସ୍ଥାନରେ ବର୍ଷାର ସମ୍ଭାବନା ରହିଛି। ବିଶେଷ କରି ମାଲକାନଗିରି, କୋରାପୁଟ, ନବରଙ୍ଗପୁର, ରାୟଗଡ଼ା, ଗଜପତି, କେନ୍ଦୁଝର , ମୟୂରଭଞ୍ଜ , କଳାହାଣ୍ଡି, ବଲାଙ୍ଗୀର, ସୋନପୁର, ସମ୍ବଲପୁର, ବରଗଡ଼ ଓ ଦେବଗଡ଼ରେ ପ୍ରବଳ ବର୍ଷାର ସମ୍ଭାବନା ରହିଛି।
Popular Categories
Previous article
Next article