ପାଟଣା : ପାଟଣା ବ୍ଲକ ଅଞ୍ଚଳର ୨୦ଟି ଯାକ ପଞ୍ଚାୟତ ମୁଖ୍ୟାଳୟରେ ଅସ୍ଥାୟୀ ସ୍ବାସ୍ଥ୍ୟ ଶିବିର ବା ସଙ୍ଗରୋଧ କେନ୍ଦ୍ର କରାଯିବା ସହ ବ୍ଲକ ମୁଖ୍ୟାଳୟ ପାଟଣା କଲେଜରେ ଅତିରିକ୍ତ ଭାବେ ଗୋଟିଏ ସଙ୍ଗରୋଧ କେନ୍ଦ୍ର କରାଯାଇଛି। ପ୍ରତ୍ୟେକ ପଞ୍ଚାୟତରେ ରାଜ୍ୟ ବାହାରେ ରହୁଥିବା ଲୋକଙ୍କ ପାଇଁ ୨୪ ଏପ୍ରିଲ ଶୁକ୍ରବାର ଠାରୁ ନିଜ ନିଜ ପଞ୍ଚାୟତରେ ପଞ୍ଜିକରଣ ଆରମ୍ଭ ହେବାକୁ ଥିବା ବେଳେ ମେ ୩ ତାରିଖ ପରେ ରାଜ୍ୟ ବାହାର ଫେରନ୍ତାଙ୍କ ପାଇଁ ପ୍ରତି ପଞ୍ଚାୟତରେ ୧୪ଦିନ କ୍ବାରେଣ୍ଟାଇନ ରହିବା ବାଧ୍ୟତାମୂଳକ ବୋଲି ମୁଖ୍ୟମନ୍ତ୍ରୀ ଭିଡିଓ କନଫରେନ୍ସ ମାଧ୍ୟମରେ ନିର୍ଦ୍ଦେଶ ଦେବା ପରେ ବ୍ଲକ ପ୍ରଶାସନ ତତ୍ପର ହୋଇ ଉଠିଛି। ବ୍ଲକ ଅଞ୍ଚଳର ୨୦ଟି ପଞ୍ଚାୟତରେ ଅସ୍ଥାୟୀ ସ୍ବାସ୍ଥ୍ୟ ଶିବିର ତଥା ସଙ୍ଗରୋଧ କେନ୍ଦ୍ର ହୋଇଥିବା ବେଳେ ପାଟଣା ବିଧାୟକ ଜଗନ୍ନାଥ ନାଏକ ସମସ୍ତ ସଙ୍ଗରୋଧ କେନ୍ଦ୍ର ବୁଲି ଦେଖିବା ସହ ବ୍ୟବସ୍ଥା ସମ୍ପର୍କରେ ପଚାରି ବୁଝିଛନ୍ତି ।
ସୂଚନା ଅନୁଯାୟୀ ବଡପାଟଣା ପଞ୍ଚାୟତରେ ୪୦ଟି, ମୂଷାଖୋରୀରେ ୪୦ଟି, ଡୁମୁରିଆରେ ୪୦ଟି, ଏରେଣ୍ଡେଇରେ ୪୦ଟି, ଚିନାମାଳିପଶିରେ ୫୦ଟି, ପଲାଣିଘାଟି ର ୫୦ଟି , ଯମୁନାପଶିରେ ୪୦ଟି, ଖିରେଇଟାଙ୍ଗିରୀରେ ୪୦ଟି, ରାଜନଗରରେ ୫୦ଟି, ମୁରୁସୁଆଁରେ ୫୦ଟି, କେନ୍ଦେଇପଶିରେ ୮୦ଟି, ଚାକୁଣ୍ଡାପାଳରେ ୭୦ଟି, କଣ୍ଟିଆପଡାରେ ୪୦ଟି, ଟାଙ୍ଗରପଡାରେ ୭୦ଟି, ତୁରୁମୁଙ୍ଗା ପଞ୍ଚାୟତରେ ୪୦ ଶଯ୍ୟା ବିଶିଷ୍ଟ ସଙ୍ଗରୋଧ କେନ୍ଦ୍ର କରା ଯାଇଥିବା ବେଳେ ବୁଢିକାପୁଡିରେ ୪୦ଟି, ଚେମଣାରେ ୪୦ଟି, ବାଉଁଶୁଳୀରେ ୫୦ଟି, ମିରିଗିଖୋଜି ପଞ୍ଚାୟତରେ ୨୫ ଟି ଶଯ୍ୟା ବିଶିଷ୍ଟ ସଙ୍ଗରୋଧ କେନ୍ଦ୍ର ନିର୍ମାଣ କରା ଯାଇଥିବା ବେଳେ ବ୍ଲକ ମୁଖ୍ୟାଳୟ ସ୍ଵାମ ପାଟଣା ଆଞ୍ଚଳିକ ମହାବିଦ୍ୟାଳୟରେ ୮୦ ଶଯ୍ୟା ବିଶିଷ୍ଟ ସ୍ବତନ୍ତ୍ର ସଙ୍ଗରୋଧ କେନ୍ଦ୍ର ହୋଇଥିବା ବେଳେ ଆବଶ୍ୟକ ସ୍ଥଳେ ଏହା ବୃଦ୍ଧି କରାଯିବ ବୋଲି ବିଡିଓ ଇଶ୍ବର ଚନ୍ଦ୍ର ନାଏକଙ୍କ ଠାରୁ ସୂଚନା ମିଳିଛି ।
