ପୁରୀ : ପବିତ୍ର ଦୋଳ ପୁର୍ଣ୍ଣିମା ଅବସରରେ ଶୁକ୍ରବାର ପୁରୀ ବଡ଼ଦାଣ୍ଡରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ଭକ୍ତମାନେ ବ୍ୟାରିକେଡ ଭାଙ୍ଗି ଶ୍ରୀମନ୍ଦିରକୁ ଧସେଇ ପଶିଛନ୍ତି। ଶ୍ରୀମନ୍ଦିରରେ ଶ୍ରୀଜୀଉଙ୍କ ସୁନା ବେଶ ଦେଖିବାକୁ ଭକ୍ତଙ୍କ ପ୍ରବଳ ଭିଡ଼ ଦେଖିବାକୁ ମିଳିଥିଲା। ଲମ୍ବା ଧାଡିରେ ଘଣ୍ଟା ଘଣ୍ଟା ଧରି ପ୍ରଚଣ୍ଡ ଖରାରେ ବଡ଼ଦାଣ୍ଡରେ ଅପେକ୍ଷା କରିବା ପରେ ଭକ୍ତମାନେ ବ୍ୟାରିକେଡ ଭାଙ୍ଗି ଶ୍ରୀମନ୍ଦିରକୁ ଧସେଇ ପଶିଛନ୍ତି । କିଛି ସମୟ ଧରି ଭକ୍ତ, ସେବାୟତ ଓ ପୁଲିସଙ୍କ ମଧ୍ୟରେ ଧସ୍ତାଧସ୍ତି ଓ ପେଲାଠେଲା ଲାଗିଥିଲା। ଫଳରେ ବଡ଼ ଦାଣ୍ଡରେ ଦଳାଚକଡା ଭଳି ପରିସ୍ଥିତି ସୃଷ୍ଟି ହୋଇଥିଲା। ଶେଷରେ ଭକ୍ତମାନେ ଶ୍ରୀମନ୍ଦିରକୁ ଧସେଇ ପଶିଥିଲେ। ତେବେ ଏଥିରେ କେତେଜଣ ମହିଳା ତଳେ ପଡିଯାଇ ଆହତ ହୋଇଥିବା କୁହାଯାଉଛି।
ତେବେ ପରେ ପୁଲିସ ଉପସ୍ଥିତିରେ ସ୍ଥିତି ନିୟନ୍ତ୍ରଣ ହେବା ସହ ଭକ୍ତମାନଙ୍କ ପାଇଁ ଶୃଙ୍ଖଳିତ ଦର୍ଶନ ବ୍ୟବସ୍ଥା କରାଯାଇଛି।
