ଶ୍ରୀନଗର : ଜାମ୍ମୁ କାଶ୍ମୀରର ପୁଲୱାମାଠାରେ ଶନିବାର ସକାଳେ ଆତଙ୍କବାଦୀ ଏବଂ ସୁରକ୍ଷା ବାହିନୀ ମଧ୍ୟରେ ଜୋରଦାର ଗୁଳିବିନିମୟ ବେଳେ ସିଆର୍ପିଏଫ୍ର ଜଣେ ଯବାନ ସହିଦ ହୋଇଛନ୍ତି। ପୁଲୱାମାର ମୋହଲା ତାକିୟା ଅନ୍ତର୍ଗତ ଚିନାର ବାଗଠାରେ ଆତଙ୍କବାଦୀମାନେ ଲୁଚି ରହିଥିବା ଖବର ପାଇ ସୁରକ୍ଷା ବାହିନୀ ପକ୍ଷରୁ ଶୁକ୍ରବାର ବିଳମ୍ବିତ ରାତିରେ ତଲାସି ଅଭିଯାନ ଆରମ୍ଭ ହୋଇଥିଲା। ଆତଙ୍କବାଦୀମାନେ ଲୁଚି ରହିଥିବା ସମ୍ପର୍କରେ ଅଞ୍ଚଳବାସୀଙ୍କୁ ସୁରକ୍ଷାବାହିନୀ ପକ୍ଷରୁ ସୂଚନା ଦିଆଯାଇଥିଲା। ସ୍ଥାନୀୟ ଏକ ଘରେ ଆତଙ୍କବାଦୀମାନେ ଆତ୍ମଗୋପନ କରିଥିବା ସନ୍ଦେହ କରି ସୁରକ୍ଷାବାହିନୀ ସେଠାରେ ପହଞ୍ଚିଥିଲେ। ମାତ୍ର ଆତଙ୍କବାଦୀମାନେ ସେମାନଙ୍କ ଉପରକୁ ଆଖିବୁଜା ଗୁଳିମାଡ଼ କରିଥିଲେ। ଏଥିରେ ଗୃହ ମାଲିକ ଏବଂ ସିଆର୍ପିଏଫ୍ ଯବାନ ମନ୍ଦିପ୍ କୁମାର ଆହତ ହୋଇଥିଲେ। ଫଳରେ ସୁରକ୍ଷାବାହିନୀ ପ୍ରତିଆକ୍ରମଣ କରିଥିଲା। କିନ୍ତୁ ସୁରକ୍ଷାବାହିନୀ ଉପରକୁ କିଛି ଲୋକ ପଥର ମାଡ଼ କରିଥିଲେ। ପଥରମାଡ଼ ଏବଂ ଅନ୍ଧକାରର ସୁଯୋଗ ନେଇ ଆତଙ୍କବାଦୀମାନେ ଖସି ପଳାଇବାରେ ସକ୍ଷମ ହୋଇଛନ୍ତି। ଗୃହମାଲିକଙ୍କ ସ୍ୱାସ୍ଥ୍ୟ ଭଲ ଥିବା ବେଳେ ମନ୍ଦିପ ଚିକିତ୍ସାଧୀନ ଅବସ୍ଥାରେ ପ୍ରାଣ ହରାଇଛନ୍ତି।
