ଶହୀଦଙ୍କ ପ୍ରତି ବୁନ୍ଦା ରକ୍ତର ପ୍ରତିଶୋଧ ନେବ ଭାରତ: ପୂର୍ବ ସେନାଧକ୍ଷ ଭି. କେ. ସିଂହ

ନୂଆଦିଲ୍ଲୀ: ଜାମ୍ମୁ କାଶ୍ମୀର ପୁଲୱାମାରେ କେନ୍ଦ୍ରୀୟ ସୁରକ୍ଷାବଳ ଉପରେ ଆତଙ୍କୀ ଆକ୍ରମଣ ଓ ସେଥିରେ ୩୦ରୁ ଅଧିକ ଯବାନ ଶହୀଦ ହୋଇଥିବା ଘଟଣାର କଡା ନିନ୍ଦା କରିବା ସହ ଭାରତ ଶହୀଦଙ୍କ ପ୍ରତି ବୁନ୍ଦା ରକ୍ତର ପ୍ରତିଶୋଧ ନେବ ବୋଲି କେନ୍ଦ୍ର ମନ୍ତ୍ରୀ ତଥା ପୂର୍ବ ସେନାଧକ୍ଷ ଭି. କେ. ସିଂହ କହିଛନ୍ତି । ଜାମ୍ମୁ କାଶ୍ମୀର ପୂର୍ବ ମୁଖ୍ୟମନ୍ତ୍ରୀ ଉମର ଅବଦୁଲ୍ଲାହ ଏବଂ ପିଡିପି ମୁଖ୍ୟ ମେହେବୁବା ମୁଫତି ଏହି ଘଟଣାର ନିନ୍ଦା କରିଥିବା ବେଳେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ତାଙ୍କ ଟ୍ୱିଟ ବାର୍ତ୍ତାରେ ସିଆରପିଏଫ ଉପରେ ଆତଙ୍କୀ ଆକ୍ରମଣର ନିନ୍ଦା କରିଛନ୍ତି । ଇତି ମଧ୍ୟରେ ଗୃହ ମନ୍ତ୍ରୀ ରାଜନାଥ ସିଂହ ସିଆରପିଏଫ ମହାନିର୍ଦ୍ଦେଶକ ଆର. ଆର. ଭଟନାଗରଙ୍କ ସହ ଆଲୋଚନା କରିଛନ୍ତି । ସୂଚନାଯୋଗ୍ୟ ଯେ, ଗୁରୁବାର ଅପରାହ୍ନରେ ସିଆରପିଏଫର ୨୫୦୦ ଯବାନ ୭୮ଟି ବସରେ ସେମାନଙ୍କ କାର୍ଯ୍ୟସ୍ଥଳୀକୁ ଫେରୁଥିବା ବେଳେ ଜୈସ-ଏ-ମହମ୍ମଦ ଆତଙ୍କୀ ଶ୍ରୀନଗର-ଜାମ୍ମୁ ଜାତୀୟ ରାଜପଥର ଅବନ୍ତିପୁରା ନିକଟରେ ଏକ ବିସ୍ଫୋରକ ବୋଝେଇ ଗାଡିକୁ ସୁରକ୍ଷା ବଳ ବସ ସହ ଧକ୍କା କରିଥିଲେ । ଘଟଣାସ୍ଥଳରେ ୧୮ ଜଣ ଯବାନ ଶହୀଦ ହୋଇଥିବା ବେଳେ ଚିକିତ୍ସାଧୀନ ଅବସ୍ଥାରେ ଅନ୍ୟ ୧୨ ଜଣଙ୍କ ମୃତ୍ୟୁ ଘଟିଛି । ପୁଲିସ ସୂଚନା ଅନୁଯାୟୀ ବିସ୍ଫୋରକ ବୋଝେଇ ଗାଡି ଚଳାଉ ଥିବା ଆଦିଲ ଅହମଦ ପୁଲୱାମା ଅନ୍ତର୍ଗତ କାକପୋରା ଅଞ୍ଚଳର ଏବଂ ସେ ଜୈସ-ଏ-ମହମ୍ମଦ ଆତଙ୍କୀ ସଙ୍ଗଠନରେ ୨୦୧୮ରେ ଯୋଗଦେଇଥିଲା ।