ମୁମ୍ବଇ: ଶୁକ୍ରବାର ରାତିରେ କଂଗ୍ରେସ-ଏନସିପି ଏବଂ ଶିବସେନା ମଧ୍ୟରେ ମିଳିତ ବୈଠକ ହେବା ସହିତ ଉଦ୍ଧବ ଠାକରେ ମୁଖ୍ୟମନ୍ତ୍ରୀ ହେବେ ବୋଲି ସ୍ଥିର ହୋଇଥିଲା। ହେଲେ ବୈଠକ ଅଧାରୁ ଚାଲିଯାଇଥିଲେ ଏନସିପି ନେତା ଅଜିତ ପୱାର। ଏହିଠାରୁ ମହାରାଷ୍ଟ୍ର ରାଜନୀତି ନାଟକୀୟ ମୋଡ଼ ନେବାର ସୂତ୍ରପାତ ହୋଇଥିଲେ ହେଁ କଂଗ୍ରେସ କିମ୍ବା ଶିବସେନାକୁ ଟିକେ ବି ସୁରାକ୍ ମିଳିପାରି ନ ଥିଲା। ୩ ଦଳର ବୈଠକ ସରିଯିବା ପରେ ଶନିବାର ସକାଳେ ସମସ୍ତ ପ୍ରକ୍ରିୟା ଆରମ୍ଭ ହେବ ବୋଲି ଯୋଜନା ଥିଲା। କିନ୍ତୁ ରାତାରାତି ବାଜି ପଲଟାଇ ଦେଇଥିଲା ବିଜେପି।
ବିଜେପି ନେତା ଦେବେନ୍ଦ୍ର ଫଡ୍ନଭୀସ ଏବଂ ଏନସିପି ନେତା ଅଜିତ ପୱାର ରାତି ସାଢ଼େ ୧୨ଟାରେ ରାଜ୍ୟପାଳଙ୍କୁ ଭେଟିବା ଲାଗି ରାଜଭବନରେ ପହଞ୍ଚିଥିଲେ। ସେମାନେ ସରକାର ଗଠନ କରିବା ଲାଗି ରାଜ୍ୟପାଳଙ୍କ ନିକଟରେ ଦାବି ଜଣାଇଥିଲେ। ଏହା ପରେ ତୁରନ୍ତ ରାଜ୍ୟପାଳ ରାଷ୍ଟ୍ରପତି ଶାସନ ହଟାଇବା ଲାଗି ରାଷ୍ଟ୍ରପତିଙ୍କୁ ଅନୁରୋଧ କରିଥିଲେ। ଭୋର ପ୍ରାୟ ୫ଟା ୪୭ରେ ରାଷ୍ଟ୍ରପତି ରାମନାଥ କୋବିନ୍ଦ ମହାରାଷ୍ଟ୍ରରୁ ରାଷ୍ଟ୍ରପତି ଶାସନ ପ୍ରତ୍ୟାହାର କରିନେଇଥିଲେ। ଏହାପରେ ରାଜଭବନରେ ଶପଥ ଗ୍ରହଣ ଉତ୍ସବ ଆରମ୍ଭ ହୋଇଥିଲା। ଅଜିତ ନିଜର ୨୨ ବିଧାୟକଙ୍କ ସମର୍ଥନ ବଳରେ ବିଜେପିକୁ ସରକାର ଗଢ଼ିବାରେ ସହଯୋଗ କରିଥିଲେ। ରାଜଭବନରେ ରାଜ୍ୟପାଳ ଭଗତ ସିଂହ କୋଶିଆରୀ ସକାଳ ୮ଟାରେ ଦେବେନ୍ଦ୍ର ଫଡନଭୀସଙ୍କୁ ମୁଖ୍ୟମନ୍ତ୍ରୀ ଏବଂ ଏନସିପି ନେତା ଅଜିତ ପୱାରଙ୍କୁ ଉପମୁଖ୍ୟମନ୍ତ୍ରୀ ଭାବେ ଶପଥ ପାଠ କରାଇଥିଲେ।
