ଭୁବନେଶ୍ବର : ଦୀର୍ଘ ୨ବର୍ଷରୁ ଊର୍ଦ୍ଧ୍ବ ସମୟଧରି କରୋନାରେ ପୀଡ଼ିତ ଥିବା ପୂର୍ବତନ ବିରୋଧୀଦଳ ନେତା ତଥା ବିଧାୟକ ପ୍ରଦୀପ୍ତ ନାଏକ ସୁସ୍ଥ ହୋଇ ସୋମବାର ଓଡ଼ିଶାକୁ ଫେରିଛନ୍ତି। ସନ୍ଧ୍ୟାରେ ବିଜୁ ପଟ୍ଟନାୟକ ଆନ୍ତର୍ଜାତିକ ବିମାନ ବନ୍ଦରରେ ପହଞ୍ଚିବା ପରେ ଶ୍ରୀ ନାଏକ ଗଣମାଧ୍ୟମକୁ କହିଛନ୍ତି ଯେ, ମା’ ମାଣିକେଶ୍ବରୀଙ୍କ ଆଶୀର୍ବାଦ ଏବଂ ମା’, ମାଟି ଓ ରାଜ୍ୟବାସୀଙ୍କ ଭଲପାଇବା ଯୋଗୁଁ ଏତେ ବଡ଼ ବିପଦରୁ ବଞ୍ଚିଲି। ମେ’ ୨୭ ପର୍ଯ୍ୟନ୍ତ ଅମ୍ଳଜାନ ସମସ୍ୟା ରହିଥିଲା। ଏବେ ବିନା ଭେଣ୍ଟିଲେଟରରେ ଚଳପ୍ରଚଳ କରିପାରୁଛି। ଦୀର୍ଘଦିନ ଧରି ପୀଡ଼ିତ ରହିଥିଲେ ହେଁ କଳାହାଣ୍ଡିବାସୀଙ୍କ ସେବାରୁ ଦୂରେଇ ଯାଇନାହିଁ। ସବୁବେଳେ ଲୋକଙ୍କ ସାଙ୍ଗରେ ରହିଛି ଏବଂ ରହିବି। କଳାହାଣ୍ଡିର ବିକାଶ ପାଇଁ ଶେଷ ଜୀବନ ପର୍ଯ୍ୟନ୍ତ ଲଢ଼େଇ କରିବି। ଆସନ୍ତା ୨୨ ତାରିଖରେ କଳାହାଣ୍ଡିରେ ଏକ ବିଶାଳ ସମାବେଶ ଆୟୋଜନ କରାଯିବ। ଏଥିରେ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜଗତ ପ୍ରକାଶ ନଡ୍ଡା ଯୋଗଦେବାର କାର୍ଯ୍ୟକ୍ରମ ରହିଛି। ଭବାନୀପାଟଣା ଲାଲ୍ ବାହାଦୁର ଶାସ୍ତ୍ରୀ ଷ୍ଟାଡିୟମରେ ହେବାକୁ ଥିବା ସେବା ଓ ସୁଶାସନକୁ ନେଇ ଜନ ସମ୍ପର୍କ କାର୍ଯ୍ୟକ୍ରମରେ ଶ୍ରୀ ନଡ୍ଡା ଉଦବୋଧନ ଦେବେ। କେନ୍ଦ୍ରରେ ମୋଦୀ ସରକାରଙ୍କ ୯ ବର୍ଷ ପୂର୍ତ୍ତି ଅବସରରେ ସାରା ଭାରତରେ ମହା ଜନସମ୍ପର୍କ ଅଭିଯାନ କାର୍ଯ୍ୟକ୍ରମ ଜାରି ରହିଛି। ଏହି ୯ ବର୍ଷ ମଧ୍ୟରେ ସାରା ଦେଶରେ ଜାରି ରହିଥିବା ମୋଦୀ ସରକାରଙ୍କ ବିଭିନ୍ନ ଜନକଲ୍ୟାଣମୂଳକ ଯୋଜନାର ସଫଳତାକୁ ବିଜେପି ଲୋକଙ୍କ ପାଖରେ ପହଞ୍ଚାଇବାକୁ ଉଦ୍ୟମ କରିବ।
Comments are closed.