ସମାଜ ଡିଜିଟାଲ ଡେସ୍କ: ହଥରସ୍ ଦଳାଚକଟଣାରେ ପ୍ରାଣ ହରାଇଥିବା ଲୋକଙ୍କ ବ୍ୟବଚ୍ଛେଦ ରିପୋର୍ଟ ଆସିଛି। ଛାତିରେ ଆଘାତ ଯୋଗୁ ରକ୍ତ ଜମାଟ ବାନ୍ଧିବା, ପଞ୍ଜରା ହାଡ଼ ଏବଂ ଫୁସଫୁସରେ ଆଘାତ ଯୋଗୁ ସମସ୍ତଙ୍କ ମୃତ୍ୟୁ ଘଟିଥିବା ରିପୋର୍ଟରେ କୁହାଯାଇଛି। ଦଳାଚକଟାରେ ପ୍ରାଣ ହରାଇଥିବା ବ୍ୟକ୍ତିଙ୍କ ମୃତଦେହଗୁଡ଼ିକର ବ୍ୟବଚ୍ଛେଦ ଆଗ୍ରାସ୍ଥିତ ଏସ.ଏନ ମେଡିକାଲ କଲେଜରେ ସମ୍ପନ୍ନ ହୋଇଥିବାବେଳେ ଜଣେ ବରିଷ୍ଠ ଡାକ୍ତର ଏ ସମ୍ପର୍କରେ ସୂଚନା ଦେଇଛନ୍ତି।
ସୂଚନାଯୋଗ୍ୟ, ଗତ ମଙ୍ଗଳବାର ହଥରସରେ ଆତ୍ମଘୋଷିତ ଭୋଲେ ବାବାଙ୍କ ଏକ କାର୍ଯ୍ୟକ୍ରମରେ ଲକ୍ଷାଧିକ ଲୋକ ସାମିଲ ହୋଇଥିବାବେଳେ ସେଠାରେ ଦଳାଚକଟା ଘଟିଥିଲା। ବାବାଙ୍କ ପାଦ ସ୍ପର୍ଶ କରିବା ଲାଗି ଲୋକଙ୍କ ମଧ୍ୟରେ ଠେଲାପେଲା ଘଟି ଏଭଳି ପରିସ୍ଥିତି ସୃଷ୍ଟି ହୋଇଥିଲା। ଫଳରେ ଲୋକେ ଜୀବନ ବିକଳରେ ଭିଡ଼ରୁ ବାହାରିବାକୁ ଚେଷ୍ଟା କରିବାରୁ ଦଳାଚକଟାରେ ୧୨୧ ଜଣଙ୍କ ମୃତ୍ୟୁ ଘଟିବା ସହିତ ୨୦୦ରୁ ଅଧିକ ଆହତ ହୋଇଥିଲେ। ରାଜ୍ୟ ସରକାର ଘଟଣାର ବିଚାର ବିଭାଗୀୟ ତଦନ୍ତ ନିର୍ଦେଶ ଦେଇଛନ୍ତି।
