ମୁମ୍ବଇ: ମହାରାଷ୍ଟ୍ରର ଉଦ୍ଧବ ଠାକରେଙ୍କ ସରକାରରେ ଶପଥ ଗ୍ରହଣ କରିଥିବା ମନ୍ତ୍ରୀମାନଙ୍କୁ ବିଭାଗ ଆବଣ୍ଟନ ହୋଇଛି। ମୁଖ୍ୟମନ୍ତ୍ରୀ ବିଭାଗ ବଣ୍ଟନ ତାଲିକା ରାଜ୍ୟପାଳ ଭଗତ ସିଂହ କୋଶିୟାରୀଙ୍କ ନିକଟକୁ ପଠାଇଥିବାବେଳେ ରବିବାର ରାଜ୍ୟପାଳ ତାହାକୁ ଅନୁମୋଦନ କରିଛନ୍ତି। ମୁଖ୍ୟମନ୍ତ୍ରୀଙ୍କ ପୁଅ ତଥା ୱର୍ଲି ବିଧାୟକ ଆଦିତ୍ୟ ଠାକରେଙ୍କୁ ପରିବେଶ ଓ ପର୍ଯ୍ୟଟନ ବିଭାଗ ମିଳିଥିବାବେଳେ ଉପମୁଖ୍ୟମନ୍ତ୍ରୀ ଅଜିତ ପୱାରଙ୍କୁ ଅର୍ଥ ଏବଂ ଯୋଜନା ଓ ସମନ୍ବୟ ବିଭାଗ ପ୍ରଦାନ କରାଯାଇଛି। ଅନ୍ୟପଟେ ଶିବସେନାର ଅସନ୍ତୁଷ୍ଟ ରାଷ୍ଟ୍ରମନ୍ତ୍ରୀ ଅବଦୁଲ ସତ୍ତାରଙ୍କୁ ରାଜସ୍ବ, ଗ୍ରାମ୍ୟ ଉନ୍ନୟନ, ବନ୍ଦର ଭୂମି ବିକାଶ ଏବଂ ସ୍ବତନ୍ତ୍ର ସହାୟତା ବିଭାଗ ମିଳିଛି।
ଅନ୍ୟପଟେ ମୁଖ୍ୟମନ୍ତ୍ରୀ ସାଧାରଣ ପ୍ରଶାସନ, ସୂଚନା ଓ ପ୍ରଯୁକ୍ତିବିଦ୍ୟା, ସୂଚନା ଓ ଲୋକସମ୍ପର୍କ, ଆଇନ ଏବଂ ନ୍ୟାୟିକ ବିଭାଗ ସମେତ ଅନ୍ୟାନ୍ୟ ବଳକା ବିଭାଗକୁ ନିଜ ହାତରେ ରଖିଛନ୍ତି। ବରିଷ୍ଠ କଂଗ୍ରେସ ନେତା ବାଲାସାହେବ ଥୋରାଟଙ୍କୁ ରାଜସ୍ବ ବିଭାଗ ଦିଆଯାଇଥିବାବେଳେ ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଚଭନଙ୍କୁ ପୂର୍ତ୍ତ ବିଭାଗ ମିଳିଛି। ସେହିପରି ଶିବସେନାର ସୁଭାଷ ଦେଶାଇଙ୍କୁ ଶିଳ୍ପ ଏବଂ ଖଣି ବିଭାଗ ପ୍ରଦାନ କରାଯାଇଛି। ଏନସିପିର ଛଗନ ଭୂଜବଳଙ୍କୁ ଖାଦ୍ୟ, ଯୋଗାଣ ଏବଂ ଖାଉଟି ସୁରକ୍ଷା ବିଭାଗ ଦିଆଯାଇଥିବାବେଳେ ଜୟନ୍ତ ପାଟିଲଙ୍କୁ ଜଳସମ୍ପଦ ଏବଂ କମାଣ୍ଡ ଏରିଆ ଡେଭଲପମେଣ୍ଟ ଦାୟିତ୍ଵ ପ୍ରଦାନ କରାଯାଇଛି।
