ଇନ୍ଦୋର: ଚେହେରା ସିନେମା ହିରୋ ଭଳିଆ, ଚଢ଼ୁଥିବା ରେସିଂ କାରର ଦାମ୍ ପ୍ରାୟ ଦେଢ଼ କୋଟି । ହେଲେ ଲକ୍ଡ଼ାଉନ ନିୟମ ଭାଙ୍ଗି ବିଚରା ରାସ୍ତାରେ ଉଠବସ୍ ହେଉଥିବାର ଫଟୋ ଦେଶ ସାରା ଭାଇରାଲ । ଘଟଣାଟି ହେଉଛି ମଧ୍ୟପ୍ରଦେଶ ରାଜଧାନୀ ଇନ୍ଦୋରର ।
କରୋନା ସଂକ୍ରମଣ ନିମନ୍ତେ ସାରା ଦେଶ ଲକ୍ଡ଼ାଉନ । ମଧ୍ୟପ୍ରଦେଶରେ କରୋନା ସଂକ୍ରମଣ ସ୍ଥିତି ଆହୁରି ଗମ୍ଭୀର ହୋଇଥିବା ଯୋଗୁଁ ସେଠାରେ ସରକାର ଆହୁରି ସତର୍କ । ରାସ୍ତାରେ ଗାଡ଼ି ମୋଟର ତ ଦୂରର କଥା ଚାଲିଚାଲି ଯିବା ଲୋକଙ୍କୁ ବି ପୁଲିସ ବିନା କାରଣରେ ଛାଡ଼ୁ ନାହିଁ । ଏମିତି ସମୟରେ ଇନ୍ଦୋରର ଜଣେ ବଡ଼ ବ୍ୟବସାୟୀଙ୍କ ପୁଅ ନିଜର ପୋର୍ସେ ରେସିଂ କାର୍ ଧରି ରାସ୍ତାରେ ଦୃତ ବେଗରେ ଯାଉଥିବା ଦେଖି ପୁଲିସ ତାଙ୍କୁ ଅଟକାଇଥିଲା ।
ଏତେ ଜୋରରେ ଗାଡ଼ି ଚଳାଇବା ଓ ବାହାରକୁ ଯିବାର କାରଣ ପଚାରିବାରେ ଯୁବକ ଜଣକ କିଛି ଉତ୍ତର ଦେଇ ପାରି ନ ଥିଲେ। ବାହାରକୁ ବାହାରିବା ନିମନ୍ତେ ତାଙ୍କ ପାଖରେ ପାସ୍ ନ ଥିଲା କିମ୍ବା କିଛି ଜରୁରୀ କାରଣ ସେ ଦର୍ଶାଇ ପାରି ନ ଥିଲେ । ତେଣୁ ତାଙ୍କୁ ରାସ୍ତାରେ ଉଠବସ୍ ହେବାକୁ ପୁଲିସ ଅଧିକାରୀ ନିର୍ଦେଶ ଦେଇଥିଲେ । ଯୁବକଜଣକ ପ୍ରଥମେ ପ୍ରଥମେ ତ ଏଥିପାଇଁ ଅମଙ୍ଗ ହେଉଥିଲେ । ମାତ୍ର ପୁଲିସ କଠୋର ପଦକ୍ଷେପ ଗ୍ରହଣ କରିବା ନିମନ୍ତେ ଧମକ ଦେବାରୁ ବାଧ୍ୟ ହୋଇ ରାସ୍ତାରେ ଯୁବକଙ୍କୁ ଉଠବସ୍ ହେବାକୁ ପଡ଼ିଛି । ଯୁବକଙ୍କ ଗାଡ଼ି ସହ ଉଠବସ୍ ଭିଡ଼ିଓ ଓ ଫଟୋ ସୋସିଆଲ ମିଡ଼ିଆରେ ଭାଇରାଲ ହୋଇଛି । ପୋର୍ସେ କମ୍ପାନୀର ଯେଉଁ ଗାଡ଼ି ଯୁବକ ଜଣକ ଚଢ଼ି ଯାଉଥିଲେ ତାହା ରେସିଂ ମଡ଼େଲର ଏବଂ ଏହାର ପ୍ରାରମ୍ଭିକ ମୂଲ୍ୟ ୧.୮ କୋଟି ଟଙ୍କା ।
