ସମ୍ବଲପୁର: ସମ୍ବଲପୁର ଅଇଁଠାପାଲି ଥାନା ଅଞ୍ଚଳରେ ନିୟମିତ ଚୋରି, ଲୁଟ ଆଦି ଆପରାଧିକ କାର୍ଯ୍ୟକଳାପ ବୃଦ୍ଧି ପାଉଥିବା ବେଳେ ପୁଲିସ ଏହାକୁ ନିୟନ୍ତ୍ରଣ କରିବାରେ ସମ୍ପୁର୍ଣ୍ଣ ବିଫଳ ହୋଇଛି । ଅପରାଧ ନିୟନ୍ତ୍ରଣ ପାଇଁ ବିଭିନ୍ନ ମହଲରୁ ଚାପ ପଡିବା ପରେ ପୁଲିସ କିଛିଟା ସକ୍ରିୟ ହୋଇ ଶୁକ୍ରବାର ୨ଟି ଚୋରି ମାମଲାକୁ ସମାଧାନ କରିଥିବାର ଦାବି କରିଛି । ଏହି ମର୍ମରେ ସଦର ଏସଡିପିଓ ଅନୀଲ ପ୍ରଧାନ ଦେଇଥିବା ସୁଚନାନୁଯାୟୀ, ଅଇଁଠାପାଲି ଥାନା ଅନ୍ତର୍ଗତ ଦାନିପାଲି ଅଞ୍ଚଳରେ ଗତ ୨୫ ତାରିଖ ଓ ଶାନ୍ତି ନଗର, ବୁଢ଼ାରଜା ଅଞ୍ଚଳରେ ଗତ ୨୭ ତାରିଖରେ ଚୋରି ହୋଇଥିବାର ଅଭିଯୋଗ ହେବାରୁ ୨ଟି ମାମଲା ରୁଜୁ କରାଯାଇ ତଦନ୍ତ ଆରମ୍ଭ କରାଯାଇଥିଲା । ଶାନ୍ତି ନଗର ବୁଢ଼ାରଜା ଅଞ୍ଚଳରେ ଦୁର୍ବୃତ୍ତମାନେ ପ୍ରଶାନ୍ତ କରଙ୍କ ଘରର ଲୁହା ଗ୍ରିଲକୁ ୨୬ ତାରିଖ ବିଳମ୍ବିତ ରାତ୍ରିରେ ଭାଙ୍ଗି ଘରେ ପ୍ରବେଶ କରି ୨ଟି ମୋବାଇଲ ଫୋନ, ଗୋଟିଏ ଏଲସିଡି ଟିଭି, ଦାମୀ ଲାପଟପ ଓ ଅନ୍ୟାନ୍ୟ ଘରକରଣା ସାମଗ୍ରୀ ଚୋରି କରିନେଇଥିଲେ। ଏ ନେଇ ଅଭିଯୋଗ ହେବାରୁ ମାମଲା ସଂଖ୍ୟା ୫୬/୨୦୨୫ ରୁଜୁ କରାଯାଇଥିଲା। ଦ୍ୱିତୀୟ ଘଟଣାରେ ଦାନିପାଲି ନିବାସୀ ଅଭିନବ ଠାକୁରଙ୍କ ଘର ଛାତ ପଟରୁ କବାଟ ଭାଙ୍ଗି ପ୍ରବେଶ କରି ଗୋଟିଏ ବ୍ୟାଗ, ମୋବାଇଲ ଫୋନ, ୩ଟି ଲାପଟପ, ଚାର୍ଜର ଆଦି ଦୁର୍ବୃତ୍ତମାନେ ଚୋରି କରି ନେଇଥିଲେ। ଏ ନେଇ ଏକ ମାମଲା (୫୩/୨୦୨୫) ରୁଜୁ କରି ପୁଲିସ ଘଟଣାର ତଦନ୍ତ କରିଥିଲା । ତଦନ୍ତ ସମୟରେ ପୁଲିସ ଦାନିପାଲି ନିବାସୀ ବିଜୟ କଲେତ(୨୦), ଶ୍ୟାମ ସୁନ୍ଦର ଷଣ୍ଢ(୨୫) ଏବଂ କରମଟୁଲି ନିବାସୀ ସଞ୍ଜୟ ସୁନା (୨୧)ଙ୍କୁ ଗିରଫ କରିଛି। ଉଭୟ ମାମଲାରେ ଚୋରି ହୋଇଥିବା ବିଭିନ୍ନ ସାମଗ୍ରୀଗୁଡିକ ମଧ୍ୟରୁ ସମୁଦାୟ ୪ଟି ଲାପଟପ, ଏଲସିଟି ଟିଭି, ଡିଟିଏଚ ବକ୍ସ, ୨ଟି ମୋବାଇଲ ଓ ଚାର୍ଜର ଆଦି ପୁଲିସ ଜବତ କରିଛି। ୩ ଅଭିଯୁକ୍ତଙ୍କୁ ଶୁକ୍ରବାର କୋର୍ଟ ଚାଲାଣ କରାଯାଇଥିବା ଏସଡିପିଓ ପ୍ରଧାନ କହିଛନ୍ତି।
Comments are closed.