ନୂଆଦିଲ୍ଲୀ : ରାଫେଲ ଦୁର୍ନୀତି ମାମଲାରେ କେନ୍ଦ୍ର ସରକାର ସୁପ୍ରିମକୋର୍ଟରେ ୧୪ ପୃଷ୍ଠା ସମ୍ବଳିତ ସତ୍ୟପାଠ ଦାଖଲ କରିବା ପରିପ୍ରେକ୍ଷୀରେ ରାହୁଲ ଗାନ୍ଧୀ ମଙ୍ଗଳବାର ପୁନଃ କେନ୍ଦ୍ର ସରକାରଙ୍କୁ କଡ଼ା ସମାଲୋଚନା କରିଛନ୍ତି। ରାଫେଲ କାରବାରରେ ଚୋରି ହୋଇଥିବା ଅଭିଯୋଗକୁ ମୋଦୀ ତାଙ୍କର ଏହି ସତ୍ୟପାଠରେ ସ୍ୱୀକାର କରିଛନ୍ତି ବୋଲି ରାହୁଲ ଟ୍ୱିଟ୍ରରେ ଉଲ୍ଲେଖ କରିଛନ୍ତି। ଭାରତୀୟ ବାୟୁସେନାକୁ ନ ପଚାରି ରାଫେଲ କାରବାର ସମ୍ବନ୍ଧୀୟ ରାଜିନାମାରେ ପରିବର୍ତ୍ତନ କରାଯାଇଛି। ଏହାଦ୍ୱାରା ଉଦ୍ୟୋଗପତି ଅନୀଲ ଅମ୍ବାନୀଙ୍କ ପକେଟ୍କୁ ୩୦,୦୦୦ କୋଟି ଟଙ୍କା ପଠାଇ ଦିଆଯାଇଥିବା ସୁପ୍ରିମକୋର୍ଟରେ ଦାଖଲ ସତ୍ୟପାଠରେ ସ୍ୱୀକାର କରାଯାଇଛି। ଆଗକୁ ଅଧିକ ତଥ୍ୟ ପଦାକୁ ଆସିବ ବୋଲି ରାହୁଲ ଉକ୍ତ ଟ୍ୱିଟ୍ରେ ଦର୍ଶାଇଛନ୍ତି।
ଉଲ୍ଲେଖ ଯେ, କେନ୍ଦ୍ର ସରକାରଙ୍କ ପକ୍ଷରୁ ସୋମବାର ରାଫେଲ କାରବାର ଏବଂ ଏହି ବିମାନର ମୂଲ୍ୟ ସମ୍ବନ୍ଧୀୟ ସତ୍ୟପାଠ ସୁପ୍ରିମକୋର୍ଟରେ ଦାଖଲ କରାଯାଇଥିଲା। ଏଥିରେ ଦର୍ଶାଯାଇଛି ଯେ ୨୦୧୩ର ପ୍ରତିରକ୍ଷା ଅଧିଗ୍ରହଣ ପ୍ରକ୍ରିୟା ସମ୍ପୂର୍ଣ୍ଣ ଅନୁକରଣ ପୂର୍ବକ ତଥା ନିରାପତ୍ତା ସମ୍ବନ୍ଧୀୟ କ୍ୟାବିନେଟ୍ କମିଟିର ମଞ୍ଜୁରୀ ହାସଲ କରିବା ପରେ ୩୬ଟି ରାଫେଲ ବିମାନ ଫ୍ରାନ୍ସଠାରୁ କ୍ରୟ ଲାଗି ଚୁକ୍ତି ସ୍ୱାକ୍ଷର ହୋଇଥଲା। ଏଥିସହ ବିମାନ ଗୁଡିକର ମୂଲ୍ୟ ଉତ୍ତମ ଭାବେ ମୂଳଚାଲ କରାଯାଇଛି ବୋଲି କେନ୍ଦ୍ର ସରକାର ଉଲ୍ଲେଖ କରିଛନ୍ତି। ୧୪ ପୃଷ୍ଠା ସମ୍ବଳିତ ଏହି ସତ୍ୟପାଠକୁ ସାର୍ବଜନୀନ କରାଯାଇଥିବା ବେଳେ ରାଫେଲ ବିମାନ ମୂଲ୍ୟ ସମ୍ବନ୍ଧୀୟ ଜଉମୁଦ ରିପୋର୍ଟ ସର୍ବୋଚ୍ଚ ଅଦାଲତଙ୍କ ନିକଟରେ ସୁରକ୍ଷିତ ରହିଛି। ସୁପ୍ରିମକୋର୍ଟ ଉଭୟ ସତ୍ୟପାଠ ଉପରେ ବୁଧବାର ବିଚାର କରିବେ।
