ଭୁବନେଶ୍ବର (ନି.ପ୍ର): ରାଜ୍ୟରେ ଚଳିତ ମାସ ୧୪ରୁ ଖୋଲିବ ଘରୋଇ ପ୍ଲେ-ସ୍କୁଲ। ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ଏନେଇ ଅନୁମତି ଦିଆଯାଇଛି। ପୂର୍ବରୁ ଫେବୃଆରୀ ୧୪ରୁ କେଜିରୁ ସପ୍ତମ ଶ୍ରେଣୀ ପର୍ଯ୍ୟନ୍ତ ବିଦ୍ୟାଳୟ ଖୋଲିବ ବୋଲି ଘୋଷଣା କରାଯାଇଥିଲା। ଘରୋଇ ପ୍ଲେ ଓ ନର୍ସରୀ ଛାତ୍ରଛାତ୍ରୀଙ୍କ ପାଠପଢ଼ା ଏହି ଦିନରୁ ଆରମ୍ଭ ନେଇ ବିଦ୍ୟାଳୟ ଓ ଗଣଶିକ୍ଷା ବିଭାଗର ପ୍ରମୁଖ ଶାସନ ସଚିବ ବିଷ୍ଣୁପଦ ସେଠୀ ସମସ୍ତ ଜିଲା ଶିକ୍ଷାଧିକାରୀ, ଜିଲାପାଳ, ପ୍ରାଥମିକ, ମାଧ୍ୟମିକ ଓ ଉଚ୍ଚ ମାଧ୍ୟମିକ ଶିକ୍ଷା ନିର୍ଦେଶକଙ୍କୁ ଚିଠି ଲେଖି ଅବଗତ କରାଇଛନ୍ତି।
ସେ ଚିଠିରେ ଉଲ୍ଲେଖ କରିଛନ୍ତି ଯେ ବିଦ୍ୟାଳୟରେ କରୋନା କଟକଣା କଡ଼ାକଡ଼ି ଭାବେ ପାଳନ ହେବ। ୨୦୨୧-୨୨ ଶିକ୍ଷା ବର୍ଷ ପାଇଁ ପ୍ଲେ, ନର୍ସରୀ ଓ କେଜି ଶ୍ରେଣୀର ବିଦ୍ୟାର୍ଥୀ ଆସନ୍ତା ୧୪ରୁ ବିଦ୍ୟାଳୟ ଆସିବେ। ଘରୋଇ ବିଦ୍ୟାଳୟ ପରିଚାଳନା କରୁଥିବା ସଂସ୍ଥା କରୋନା କଟକଣା ପାଳନ ଦିଗରେ ବିଶେଷ ଧ୍ୟାନ ଦେବେ। ବିଦ୍ୟାଳୟର ସମସ୍ତ ଶିକ୍ଷକ, ଅଣଶିକ୍ଷକ ଓ ସହାୟକ କରୋନା ଟିକାର ଉଭୟ ପାନ ନେଇଥିବା ବାଧ୍ୟତାମୂଳକ କରାଯାଇଛି। ବିଦ୍ୟାଳୟ କର୍ତ୍ତୃପକ୍ଷ ଛାତ୍ରଛାତ୍ରୀଙ୍କ ସ୍ବାସ୍ଥ୍ୟ ପ୍ରତି ସଚେତନ ରହିବା ସହ ବିଶେଷ ଧ୍ୟାନ ଦେବା ପାଇଁ ବିଭାଗ ପକ୍ଷରୁ ନିର୍ଦେଶ ଦିଆଯାଇଛି।
Comments are closed.