ଭୁବନେଶ୍ୱର(ସମାଜ ଲାଇଭ୍ ବ୍ୟୁରୋ) -ଦୂର ହେଲା ଦ୍ବନ୍ଦ୍ବ, ସମସ୍ତ କଳ୍ପନା ଜଳ୍ପନାର ହେଲା ଅନ୍ତ। ଗତକାଲି ଭୁବନେଶ୍ବର ଖଣ୍ଡଗିରିରେ ଯାତ୍ରା ପାର୍ଟି ମାଲିକଙ୍କ ବୈଠକ ପରେ ଯଲିଉଡ ବ୍ୟାଡ୍ବୟ ପୀୟୁଷ ତ୍ରିପାଠୀଙ୍କୁ ନେଇ ସସ୍ପେନ୍ସ ଜାରି ରହିଥିଲା। ତେବେ ଆଜି ସେଥିରେ ପୂର୍ଣ୍ଣଚ୍ଛେଦ ପଡ଼ିଛି। ଅତଏବ ୨୦୨୬ ଜାନୁଆରୀରୁ ପୀୟୁଷ ଯାତ୍ରା ସିଂହବାହିନୀ ମଞ୍ଚରେ ବିଧିବଦ୍ଧ ଭାବେ ଅଭିନୟ ଜାରି ରଖିବେ ବୋଲି ପାର୍ଟିର ଅଫିସିଆଲ ଫେସ୍ବୁକ୍ ପୋଷ୍ଟରେ ପୋଷ୍ଟିଂ କରାଯାଇଛି।
ପୀୟୁଷଙ୍କୁ ନେଇ ଯାତ୍ରା ଶ୍ରୀମନ୍ଦିର ଓ ସିଂହବାହିନୀ ପ୍ରଯୋଜକଙ୍କ ମଧ୍ୟରେ ଟଣାଓଟରା, ପୀୟୁଷ ନେଇଥିବା ଅଗ୍ରୀମ ଅର୍ଥ ଫେରସ୍ତ କରିବା ପ୍ରଭୃତି ଗୋଟିଏ ପରେ ଗୋଟିଏ ଘଟଣାରେ ପୂର୍ଣ୍ଣଚ୍ଛେଦ ପଡ଼ିବାକୁ ଯାଉଛି। ଯାତ୍ରା ସିଂହବାହିନୀର ପ୍ରଯୋଜକ ସଞ୍ଜୀବ ପାଢ଼ୀ କହିଛନ୍ତି, ୨୦୨୬ ଜାନୁଆରୀରୁ ପୀୟୁଷ ଚୁକ୍ତି ମୁତାବକ ୫ବର୍ଷ ପାଇଁ ତାଙ୍କ ଯାତ୍ରାନୁଷ୍ଠାନରେ ଅଭିନୟ ଜାରି ରଖିବେ। ଗତକାଲି ଏ ସମ୍ପର୍କରେ ‘ସମାଜ’ ଲାଇଭ୍ରେ ସ୍ବତନ୍ତ୍ର ଚର୍ଚ୍ଚା ହୋଇଥିବାବେଳେ ଏଥିରେ ଆଜି ପୂର୍ଣ୍ଣଚ୍ଛେଦ ପଡ଼ିଛି। ପୀୟୁଷ ସିଂହବାହିନୀକୁ ଫେରିବା ଖବର ସାଥୀ କଳାକାରଙ୍କ ମଧ୍ୟରେ ଆନନ୍ଦର ଲହରୀ ଖେଳାଇ ଦେଇଛି। ତେବେ ଏ ସମ୍ପର୍କରେ ପୀୟୁଷଙ୍କ ମତାମତ ମିଳିପାରି ନାହିଁ।
