ପିପିଲିରେ ଶକ୍ତି ପ୍ରଦର୍ଶନ କଲା ବିଜେପି, ନାମାଙ୍କନ ପାଇଁ ସମ୍ବିତ ଓ ଆଶ୍ରିତଙ୍କ ଶୋଭାଯାତ୍ରା

ପିପିଲି :ବିଜେପିର ପୁରୀ ଲୋକସଭା ପ୍ରାର୍ଥୀ ଡ଼ ସମ୍ବିତ ପାତ୍ର ଓ ପିପିଲି ବିଧାନସଭା ଆସନର ପ୍ରାର୍ଥୀ ଆଶ୍ରିତ ପଟ୍ଟନାୟକ ସୋମବାର ଦିନ ନାମାଙ୍କନପତ୍ର ଦାଖଲ କରିବା ଅବସରରେ ପିପିଲିରେ ଶକ୍ତି ପ୍ରଦର୍ଶନ କରିଛନ୍ତି। ପୂର୍ବାହ୍ନରେ ନିଜ ଦଳର ନେତା, କର୍ମୀ ଓ ସମର୍ଥକଙ୍କୁ ନେଇ ଉଭୟେ ପିପିଲିର ଉତ୍ତରା ବଜାର ଠାରୁ ଏକ ବିରାଟ ଶୋଭାଯାତ୍ରାରେ ପୁରୀ ପର୍ଯ୍ୟନ୍ତ ଯାଇ ସେଠାରେ ନାମାଙ୍କନପତ୍ର ଦାଖଲ କରିଥିଲେ।

୩ହଜାରରୁ ଉର୍ଦ୍ଧ ବାଇକ୍‌‌ ଶୋଭାଯାତ୍ରାରେ ଉଭୟ ସମ୍ବିତ ଓ ଆଶ୍ରିତ ଏକ ଖୋଲାଗାଡିରେ ଯାଇଥିବା ବେଳେ ଉଭୟଙ୍କୁ ପୁବାଶାସନ ଛକ, ଗୁଡ଼ିଆପୋଖରୀ ବଜାର, ସିଉଳା, ଜଇସପାଟଣା ବଜାର, ପିପିଲି ବଜାର, ତେଇସିମାଇଲ ଛକ, ଦାଣ୍ଡମୁକୁନ୍ଦପୁର ବଜାର, ମଙ୍ଗଳପୁର ବଜାର, ତେଇସିପୁର ବଜାର, ସାତଶଙ୍ଖ ବଜାର ଆଦି ସ୍ଥାନମାନଙ୍କରେ ଅପେକ୍ଷା କରିଥିବା ମହିଳା, ପୁରୁଷ ସମର୍ଥକ ଓ ଶୁଭେଚ୍ଛୁମାନେ ଫୁଲତୋଡା ଦେଇ ଶୁଭେଚ୍ଛା ଜଣାଇବା ସହ ସଫଳତା କାମନା କରିଥିଲେ।