ପିପିଲି: ଭୁବନେଶ୍ୱର-ପୁରୀ ଜାତୀୟ ରାଜପଥର ପିପିଲି ଟୋଲ୍ପ୍ଲାଜାଠାରେ ମୋ ବସ୍ ଚାଳକଙ୍କୁ ମାଡ ମାରିବା ଘଟଣାରେ ପିପିଲି ପୁଲିସ ସୁଆବରେଇ ଗ୍ରାମର ରମେଶ ଚନ୍ଦ୍ର ବାଘ(୫୦) ନାମକ ଜଣେ ଅଭିଯୁକ୍ତକୁ ଗିରଫ କରି ଗୁରୁବାର କୋର୍ଟ ଚାଲାଣ କରିଛି। ଜାମିନ ନାମଞ୍ଜୁର ହେବାରୁ ଅଭିଯୁକ୍ତକୁ ନିମାପଡ଼ା ସ୍ଥିତ ବିଚାର ବିଭାଗୀୟ ଜେଲ୍ ହାଜତକୁ ପଠାଇ ଦିଆଯାଇଥିବା ସୂଚନା ମିଳିଛି।
ସୂଚନା ଅନୁଯାୟୀ, ବରମୁଣ୍ଡାଠାରୁ ସାତପଡ଼ା ଅଭିମୁଖେ ଯାଉଥିବା ମୋ ବସ୍କୁ ଗତ ୨୨ ତାରିଖ ଅପରାହ୍ନ ୪ଟା ସମୟରେ ଦୁଇଜଣ ବ୍ୟକ୍ତି ଏକ ବାଇକ୍ରେ ଆସି ପିପିଲି ଟୋଲ୍ପ୍ଲାଜାଠାରେ ଅଟକାଇଥିଲେ। ବସ୍ ମଧ୍ୟରେ ପଶି ସେମାନେ ବସ୍ର ଚାଳକ ଶତୃଘ୍ନ ପରିଡ଼ାଙ୍କୁ ଅଶ୍ଳୀଳ ଭାଷାରେ ଗାଳି ଦେବା ସହ ବିଭିନ୍ନ ଧମକଚମକ ଦେଇ ମାଡ ମାରିଥିଲେ। ଏଥିରେ ଶତୃଘ୍ନଙ୍କ ମୁଁହ, ଗାଲ ଓ କାନରେ ଆଘାତ ଲାଗିଥିବା ବେଳେ ସେ କୌଣସି ମତେ ବସ୍କୁ ପୁରୀ ପର୍ଯ୍ୟନ୍ତ ନେବା ପରେ ଅଧିକ ଅସୁସ୍ଥ ଅନୁଭବ କରିବାରୁ ତାଙ୍କୁ ପୁରୀ ସରକାରୀ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ଏନେଇ ସେହି ବସ୍ କର୍ମଚାରୀ ଭକ୍ତ ମହାନ୍ତିଙ୍କ ଲିଖିତ ଅଭିଯୋଗ ଉପରେ ୨୪ ତାରିଖରେ ପିପିଲି ଥାନାରେ ବିଭିନ୍ନ ଦଫାରେ ଏକ ମାମଲା ରୁଜୁ ହୋଇଥିଲା। ପିପିଲି ଥାନା ଅଧିକାରୀ ଦୀପକ କୁମାର ଖଣ୍ଡାୟତରାୟଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଏସ୍ଆଇ ସନ୍ଦୀପ ଦାସ, ତଦନ୍ତ ଅଧିକାରୀ ଏଏସ୍ଆଇ ସୁବାଷ ଚନ୍ଦ୍ର ବେହେରା ପ୍ରମୁଖ ବିଭିନ୍ନ ସ୍ଥାନରେ ଚଢାଉ କରି ଅଭିଯୁକ୍ତ ରମେଶକୁ ଗିରଫ କରିବାରେ ସଫଳ ହୋଇଥିଲେ।
