ପାଟଣା : ସାହାରପଡା ବ୍ଲକର ଉଦୟପୁର ଓ ଖଜିରାପାଟ ପଞ୍ଚାୟତକୁ ମେଗା ଜଳ ପ୍ରକଳ୍ପରୁ ଜଳ ଯୋଗାଣ ନିମନ୍ତେ ନିର୍ମାଣ ହେଉଥିବା ପାଣି ଟାଙ୍କି ଜମି ବିବାଦ ପାଇଁ ଅଧାପନ୍ତରିଆ ହୋଇ ପଡିରହିଥିବାବେଳେ ଉଦୟପୁର ପଂଚାୟତର ପୂର୍ବରୁ ନିର୍ମାଣ ହୋଇଥିବା ବସୁଧା ଯୋଜନାର ଟାଙ୍କି ସହିତ ମେଗା ଜଳ ପ୍ରକଳ୍ପର ପାଇପ ସଂଯୋଗ କରାଯାଇ ଗ୍ରାମବାସୀଙ୍କୁ ପାଣି ଯୋଗାଇ ଦିଆଯାଉଥିଲା । ମାତ୍ର ଆଜକୁ ଆଠ ଦିନରୁ ଅଧିକ ସମୟ ହେବ ରାସ୍ତା କାମ ହେଉଥିବା ଯୋଗୁ ଠିକାଦାର ଗଦଗଦି ନିକଟରେ ମେଗା ଜଳ ପ୍ରକଳ୍ପ ବିଛାଇ ଥିବା ପାଇପକୁ ଜେସିବି ମେସିନ ଦ୍ୱାରା ଖୋଳି ଦେଇଥିବାରୁ ପାଇପ କଟି ଯାଇଛି ଫଳରେ ଉଦୟପୁର ଗ୍ରାମକୁ ଜଳ ଯୋଗାଣ ଏକ ପ୍ରକାର ଠପ ହୋଇଯାଇଛି । ପ୍ରବଳ ଖରାରେ ପାଣି ପାଇଁ ଲୋକେ ଡହଳ ବିକଳ ହେଉଛନ୍ତି । ବିଭାଗୀୟ ଯନ୍ତ୍ରୀଙ୍କୁ ଫୋନ କଲେ ସେ ଫୋନ ରିସିଭ କରୁ ନାହାନ୍ତି ବୋଲି ଉଦୟପୁର ଗ୍ରାମର କିଛି ବ୍ୟକ୍ତି ଅଭିଯୋଗ କରୁଛନ୍ତି । ଉଦୟପୁର ବାସୀଙ୍କୁ ଜଳ ସଙ୍କଟରୁ ରକ୍ଷା କରିବା ପାଇଁ ଗ୍ରାମବାସୀ ଦାବି ରଖିଛନ୍ତି ।
Comments are closed.