ନୂଆଦିଲ୍ଲୀ : ଆସନ୍ତା ୧୬ତାରିଖରୁ ୨୭ତାରିଖ ମଧ୍ୟରେ ନୂଆଦିଲ୍ଲୀର ରାଜପଥରେ ପର୍ଯ୍ୟଟନ ପର୍ବ ଅନୁଷ୍ଠିତ ହେବ। ନୂଆଦିଲ୍ଲୀଠାରେ ସାମ୍ବାଦିକମାନଙ୍କୁ ଏ ସଂକ୍ରାନ୍ତରେ ସୂଚନା ଦେଇ ପର୍ଯ୍ୟଟନ ସଚିବ ରଶ୍ମୀ ବର୍ମା କହିଛନ୍ତି, ସ୍ୱରାଷ୍ଟ୍ର ମନ୍ତ୍ରୀ ରାଜନାଥ ସିଂହ କାର୍ଯ୍ୟକ୍ରମକୁ ଉଦ୍ଘାଟନ କରିବେ। ପର୍ଯ୍ୟଟନର ସୁଫଳ, ତଥା ଦେଶର ସାଂସ୍କୃତିକ ବିବିଧତାକୁ ପ୍ରତିଫଳନ କରି ତାହା ଉପରେ ଆଲୋକପାତ କରିବା ଲକ୍ଷ୍ୟରେ ଏହାର ଆୟୋଜନ କରାଯାଇଛି।
ଶ୍ରୀମତୀ ବର୍ମା କହିଛନ୍ତି, ପର୍ଯ୍ୟଟନ ପର୍ବର ତିନୋଟି ଉପାଦାନ ହେଲା ଦେଖୋ ଅପ୍ନା ଦେଶ, ସମସ୍ତଙ୍କ ପାଇଁ ପର୍ଯ୍ୟଟନ ଓ ପର୍ଯ୍ୟଟନ ଏବଂ ଶାସନ। ସେ କହିଛନ୍ତି, ରାଜପଥ କଡରେ ରାଜ୍ୟଗୁଡ଼ିକର ୧୮ଟି ପ୍ୟାଭିଲିୟନ୍ ରହିବ ଓ ୫୪ଟି ଦୋକାନ ସହ ଫୁଡ୍କୋଟ୍ର ଆୟୋଜନ କରାଯିବ। ୧୨ଦିନ ବ୍ୟାପୀ ଏହି ପର୍ବ ପାଳନ ସମୟରେ ୩ହଜାର ୧୫୦ରୁ ଊର୍ଦ୍ଧ୍ବ କାର୍ଯ୍ୟକ୍ରମର ଆୟୋଜନ କରାଯାଇଛି। ପର୍ଯ୍ୟଟନ ସଚିବ କହିଛନ୍ତି, ପର୍ଯ୍ୟଟନ ମନ୍ତ୍ରଣାଳୟ ଭାରତୀୟ ପର୍ଯ୍ୟଟନ ଓ ସେବା ସହ ମିଳିତ ଉଦ୍ୟୋଗରେ ତଥା ରାଜ୍ୟ ସରକାରଗୁଡ଼ିକର ସହାୟତାରେ ଆସନ୍ତା ୧୬ରୁ ୧୮ତାରିଖ ପର୍ଯ୍ୟନ୍ତ ନୂଆଦିଲ୍ଲୀର ଅଶୋକ ହୋଟେଲ୍ରେ ସର୍ବପ୍ରଥମ ଭାରତ ପର୍ଯ୍ୟଟନ ମାଟ୍ର୍ର ଆୟୋଜନ କରିବ। ପର୍ଯ୍ୟଟନ ମନ୍ତ୍ରଣାଳୟ ଏହାର ୱେବ୍ସାଇଟ୍ରେ ସମସ୍ତ ପଞ୍ଜୀକୃତ ଟୁର୍ ଅପରେଟ୍ରମାନଙ୍କ ନାମ ପ୍ରକାଶ କରିବ। କେରଳକୁ ବର୍ତ୍ତମାନ ପର୍ଯ୍ୟଟକମାନେ ଯାଇପାରିବେ ବୋଲି ସେ କହିଛନ୍ତି।
