ଜାକର୍ତ୍ତା : ଇଣ୍ଡୋନେସିଆର ରାଜଧାନୀ ଜାକର୍ତ୍ତାରେ ଚାଲିଥିବା ପାରା ଏସୀୟ କ୍ରୀଡା ଶନିବାର ଉଦ୍ଯାପିତ ହୋଇଛି। ଭାରତ ୧୫ଟି ସ୍ୱର୍ଣ୍ଣ, ୨୪ଟି ରୌପ୍ୟ ଓ ୩୩ଟି ବ୍ରୋଞ୍ଜ ସମେତ ମୋଟ ୭୨ଟି ପଦକ ପାଇ ତାଲିକାରେ ୯ମ ସ୍ଥାନ ଅଧିକାର କରିଛି। ଚୀନ ସର୍ବାଧିକ ୩୧୯ (୧୭୨ ସ୍ୱର୍ଣ୍ଣ, ୮୮ ରୌପ୍ୟ, ୫୯ ବ୍ରୋଞ୍ଜ) ପଦକ ସହ ତାଲିକାର ଶୀର୍ଷରେ ଥିବାବେଳେ ଦକ୍ଷିଣ କୋରିଆ (୧୪୫ ପଦକ) ୨ୟ ଓ ଇରାନ (୧୩୬ ପଦକ) ୩ୟ ସ୍ଥାନ ଅଧିକାର କରିଛନ୍ତି। ପାରା ଏସୀୟ କ୍ରୀଡା ଇତିହାସରେ ଭାରତର ଏହା ଶ୍ରେଷ୍ଠ ପ୍ରଦର୍ଶନ। ସୂଚନାଯୋଗ୍ୟ ୨୦୧୪ ପାରା ଏସୀୟ କ୍ରୀଡାରେ ଭାରତ ମୋଟ ୩୩ଟି ପଦକ (୩ ସ୍ୱର୍ଣ୍ଣ, ୧୪ ରୌପ୍ୟ, ୧୬ ବ୍ରୋଞ୍ଜ) ଜିତିଥିଲା।
ଶେଷ ଦିନରେ ଭାରତୀୟ ପ୍ରତିଯୋଗୀ ଦୁଇଟି ସ୍ୱର୍ଣ୍ଣ ସହ ଏକାଧିକ ପଦକ ଜିତିବାରେ ସଫଳ ହୋଇଛନ୍ତି। ପୁରୁଷ ସିଙ୍ଗଲ୍ସ ବ୍ୟାଡମିଣ୍ଟନରେ (ଏସଏଲ୩ ବର୍ଗ)ରେ ଭାରତର ପ୍ରମୋଦ ଭଗତ ସ୍ୱର୍ଣ୍ଣପଦକ ଜିତିଛନ୍ତି। ଶନିବାର ଖେଳାଯାଇଥିବା ଫାଇନାଲରେ ପ୍ରମୋଦ ୨୧-୧୯, ୧୫-୨୧, ୨୧-୧୪ ଗେମରେ ଇଣ୍ଡୋନେସିଆର ଉକୁନ୍ ରୁକାଇଣ୍ଡିଙ୍କୁ ପରାସ୍ତ କରିଛନ୍ତି। ଅପରପକ୍ଷରେ ପୁରୁଷ ସିଙ୍ଗଲ୍ସ ବ୍ୟାଡମିଣ୍ଟନ (ଏସଏଲ୪ ବର୍ଗ)ରେ ଚୀନର ୟୁୟାଙ୍ଗ୍ ଗାଓଙ୍କୁ ୨୧-୧୬, ୨୧-୬ ଗେମରେ ପରାସ୍ତ କରି ଭାରତର ତରୁଣ ସ୍ୱର୍ଣ୍ଣପଦକ ଜିତିଛନ୍ତି।
