ସମାଜ ଡିଜିଟାଲ ଡେସ୍କ: ମିଳିତ ଜାତିସଂଘରେ ପୁଣି ଲଜ୍ଜିତ ହୋଇଛି ପାକିସ୍ତାନ । ପହଲଗାଓଁ ଆକ୍ରମଣ ନେଇ ମିଳିତ ଜାତିସଂଘ ସୁରକ୍ଷା ପରିଷଦ(ୟୁଏନଏସସି)ର ସଦସ୍ୟ ଦେଶଗୁଡିକ ପାକିସ୍ତାନକୁ କଡା ସମାଲୋଚନା କରିଛନ୍ତି । ଆକ୍ରମଣରେ ଭାରତ ପକ୍ଷରୁ ଗ୍ରହଣ କରାଯାଉଥିବା କାର୍ଯ୍ୟାନୁଷ୍ଠାକୁ ବିରୋଧ କରି ବୁହତ ଆଶା ନେଇ ଜାତିସଂଘର ଦ୍ୱାରସ୍ଥ ହୋଇଥିଲା ପାକିସ୍ତାନ । ମିଛ କହି ଜାତିସଂଘର ସଦସ୍ୟ ଦେଶଗୁଡିକୁ ଭ୍ରମିତ କରିବାକୁ ପ୍ରୟାସ ମଧ୍ୟ କରିଥିଲା । କିନ୍ତୁ ପାକିସ୍ତାନର ଏହି ଷଡ଼ଯନ୍ତ୍ର ସମ୍ପୂର୍ଣ୍ଣ ବିଫଳ ହୋଇଛି। ଜାତିସଂଘ ସୁରକ୍ଷା ପରିଷଦର ସଦସ୍ୟମାନେ ପାକିସ୍ତାନକୁ ଅନେକ ପ୍ରଶ୍ନ କରିବା ସହ କଡା ସମାଲୋଚନା କରିଥିଲେ। ଜାତିସଂଘ ସୁରକ୍ଷା ପରିଷଦ ବୈଠକରେ ସଦସ୍ୟ ଦେଶମାନେ ପହଲଗାଓଁ ଆକ୍ରମଣରେ ଲସ୍କର-ଏ-ତଇବାର ହାତ ରହିଛି କି ନାହିଁ ପ୍ରଶ୍ନ କରିଥିଲେ । ଧର୍ମ ସମ୍ପର୍କରେ ପଚାରି ଆତଙ୍କବାଦୀମାନେ ଗୁଳି ମାରିବା ଘଟଣାକୁ କଡା ନିନ୍ଦା କରାଯିବା ସହିତ ପାକିସ୍ତାନକୁ ଏ ସମ୍ପର୍କରେ ଅନେକ ପ୍ରଶ୍ନ କରାଯାଇଥିଲା। ଏପରି କି ପାକିସ୍ତାନର ବଡ଼ ବନ୍ଧୁ କୁହାଯାଉଥିବା ଚୀନ ବି ବୈଠକରେ ନୀରବ ରହିଥିଲା।
ପାକିସ୍ତାନର ଅନୁରୋଧ କ୍ରମେ କରାଯାଇଥିବା ରୁଦ୍ଧଦ୍ୱାର ବୈଠକରେ ଜାତିସଂଘ ସୁରକ୍ଷା ପରିଷଦର ସଦସ୍ୟମାନେ ଇସଲାମାବାଦର ମିଥ୍ୟା ଦାବିକୁ ଗ୍ରହଣ କରି ନ ଥିଲେ । ପହଲଗାଓଁ ଆକ୍ରମଣ ପାଇଁ ଲସ୍କର-ଏ-ତଇବା ଆତଙ୍କବାଦୀ ସଂଗଠନର ସମ୍ପୃକ୍ତି ଅଛି କି ନାହିଁ ପାକିସ୍ତାନକୁ ପ୍ରଶ୍ନ କରିଥିଲେ। ଏହାସହିତ ଘଟଣାକୁ ନିନ୍ଦା କରିଥିଲେ । ପାକିସ୍ତାନର କ୍ଷେପଣାସ୍ତ୍ର ପରୀକ୍ଷଣ ଏବଂ ପରମାଣୁ ଆକ୍ରମଣ ଧମକ ନେଇ ବୟାନବାଜି ଦୁଇ ଦେଶ ମଧ୍ୟରେ ଉତ୍ତେଜନାକୁ ଆହୁରି ବୃଦ୍ଧି କରୁଛି ବୋଲି ସଦସ୍ୟ ଦେଶଗୁଡିକ କହିଛନ୍ତି । ପାକିସ୍ତାନ ଏହି ମାମଲାକୁ ଏକ ଆନ୍ତର୍ଜାତୀୟ ପ୍ରସଙ୍ଗ କରିବାକୁ ଚେଷ୍ଟା କରିଥିବା ବେଳେ ଏଥିରେ କିନ୍ତୁ ବିଫଳ ହୋଇଥିଲା। ଭାରତ ସହିତ ଦ୍ୱିପାକ୍ଷିକ ଭାବରେ ସମସ୍ୟାର ସମାଧାନ କରିବାକୁ ଜାତିସଂଘ ସୁରକ୍ଷା ପରିଷଦ ପକ୍ଷରୁ ପରାମର୍ଶ ଦିଆଯାଇଛି।
