ଇସଲାମାବାଦ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ନୱାଜ ଶରୀଫଙ୍କୁ ଇମ୍ରାନ୍ ଖାନଙ୍କ ସରକାର ପଳାତକ ଘୋଷିତ କରିଛି। ଶରୀଫ ବର୍ତ୍ତମାନ ଲଣ୍ଡନରେ ଚିକିତ୍ସିତ ହେଉଛନ୍ତି। ନୱାଜ ଲଣ୍ଡନରେ ଚିକିତ୍ସିତ ହେଉଥିବା ଡାକ୍ତରଙ୍କଠାରୁ ମେଡିକାଲ ରିପୋର୍ଟ ଆଣି ଦାଖଲ କରୁ ନ ଥିବା ଅଭିଯୋଗ ହୋଇଛି। ଏହା ଦ୍ବାରା ସେ ଜାମିନର ସର୍ତ୍ତକୁ ଉଲ୍ଲଂଘନ କରିଛନ୍ତି, ତେଣୁ ତାଙ୍କୁ ପଳାତକ ଘୋଷିତ କରିଦିଆଯାଇଥିବା କୁହାଯାଉଛି। ସ୍ଥାନୀୟ ଗଣମାଧ୍ୟମରୁ ଏହି ତଥ୍ୟ ମିଳିଛି।
ଗତବର୍ଷ ନଭେମ୍ବରରେ ଶରୀଫ ଚିକିତ୍ସା ପାଇଁ ଲଣ୍ଡନ ଯାଇଥିଲେ। ଲାହୋର ହାଇକୋର୍ଟ ମେଡିକାଲ ଆଧାରରେ ତାଙ୍କୁ ୪ ସପ୍ତାହ ପାଇଁ ବିଦେଶ ଯିବା ଲାଗି ଅନୁମତି ଦେଇଥିଲେ। ଶରୀଫଙ୍କ ଡାକ୍ତରଙ୍କ ସୂଚନା ଅନୁସାରେ, ୩ ଥର ପ୍ରଧାନମନ୍ତ୍ରୀ ରହିଥିବା ଶରୀଫ ଗମ୍ଭୀର ହୃଦରୋଗରେ ଆକ୍ରାନ୍ତ, ଯେଉଁଥିପାଇଁ ତାଙ୍କର ଅପରେଶନ କରାଯିବ। ଡନ୍ ଖବରକାଗଜ ରିପୋର୍ଟ ଅନୁସାରେ, ଇମ୍ରାନ ସରକାର ଇସଲାମାବାଦ ହାଇକୋର୍ଟଙ୍କ ଆଦେଶ ଉପରେ ଗଠିତ ବୋର୍ଡ ନିକଟରେ ଶରୀଫ ମେଡିକାଲ ରିପୋର୍ଟ ଦାଖଲ ନ କରି ଜାମିନ ସର୍ତ୍ତ ଉଲ୍ଲଂଘନ କରିଥିବାରୁ ତାଙ୍କୁ ପଳାତକ ଘୋଷିତ କରିଛି। ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଙ୍ଘୀୟ କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି। ଆଇନ ଅନୁସାରେ ଶରୀଫ ଜଣେ ପଳାତକ ଏବଂ ଯଦି ସେ ପାକିସ୍ତାନ ନ ଫେରନ୍ତି ତେବେ ତାଙ୍କୁ ଅପରାଧୀ ବୋଲି ଘୋଷଣା କରାଯିବା ନେଇ ପ୍ରଧାନମନ୍ତ୍ରୀଙ୍କ ସ୍ବତନ୍ତ୍ର ସହାୟକ ଫିରଦୋସ ଆଶିକ୍ ଆୱାନ କହିଛନ୍ତି।
Comments are closed.