ନାଳନ୍ଦା : ସମଗ୍ର ବିଶ୍ବରେ ଦ୍ବିତୀୟ ବୁଦ୍ଧ ଭାବରେ ସ୍ବୀକୃତି ପାଇଥିବା ଅଷ୍ଟମ ଶତାବ୍ଦୀର ବୌଦ୍ଧଗୁରୁ ପଦ୍ମସମ୍ଭବଙ୍କ ଜନ୍ମସ୍ଥାନ ଓଡ଼ିଶାର ସମ୍ବଲପୁରରେ ବୋଲି ଦୃଢ଼ ତଥ୍ୟ ଓ ପ୍ରମାଣ ଦେଇଛନ୍ତି ଓଡ଼ିଶାର ବୌଦ୍ଧ ଗବେଷକ ପ୍ରବୀର କୁମାର ପଟ୍ଟନାୟକ । ବୁଧବାର ପାଟନାସ୍ଥିତ ନାଳନ୍ଦା ବିଶ୍ୱବିଦ୍ୟାଳୟରେ ଅନୁଷ୍ଠିତ ଆନ୍ତର୍ଜାତିକ ବୌଦ୍ଧ ସମ୍ମିଳନୀରେ ସେ ଏହି ଅକାଟ୍ୟ ତର୍କ ଉପସ୍ଥାପନ କରିଛନ୍ତି। ବିଭିନ୍ନ ଅଭିଲେଖ, ଗ୍ରନ୍ଥୋଦ୍ଧାର, ତଥ୍ୟ ଓ ବଳିଷ୍ଠ ପ୍ରମାଣ ସହ ସେ ପ୍ରତିପାଦିତ କରିଛନ୍ତି ଯେ ଗୁରୁ ପଦ୍ମସମ୍ଭବଙ୍କ ଜନ୍ମସ୍ଥାନ “ଉଡ୍ଡୀୟାନ”, ପ୍ରାଚୀନ ଓଡ଼ିଶାର ସମ୍ବଲପୁର ବ୍ୟତୀତ ଆଉ କିଛି ନୁହେଁ।
ଗୁରୁ ପଦ୍ମସମ୍ଭବଙ୍କ ଜୀବନ ଓ ଦର୍ଶନ ବିଷୟରେ ଆଲୋଚନା ପାଇଁ ଆନ୍ତର୍ଜାତିକ ବୌଦ୍ଧ ମହାସଂଘ ଓ ନବନାଳନ୍ଦା ମହାବିହାର ଦ୍ବାରା ଆୟୋଜିତ ଏହି ଦୁଇଦିନିଆ ସମ୍ମିଳନୀକୁ ଅଗଷ୍ଟ ୨୮ ତାରିଖ ବୁଧବାର ସକାଳେ ଉଦ୍ଘାଟନ କରିଥିଲେ ବିହାର ରାଜ୍ୟପାଳ ରାଜେନ୍ଦ୍ର ଐରେକର। ବିଶ୍ବର ବିଭିନ୍ନ ପ୍ରାନ୍ତରୁ ବୌଦ୍ଧ ଧର୍ମର ବହୁ ଗବେଷକ ଓ ବିଦ୍ବାନମାନେ ଏହି ସମ୍ମିଳନୀରେ ଯୋଗ ଦେଇଛନ୍ତି। ଏହି ଅଧିବେଶନରେ ଗଜପତି ଜିଲା ଜିରାଙ୍ଗଠାରେ ଥିବା ‘ପଦ୍ମସମ୍ଭବ ମହାବିହାର’ର ସଭାପତି ଗେଟ୍ରୁଲ୍ ଜିଗ୍ମେ ରିଂପୋଂଚେ ମଧ୍ୟ ଯୋଗ ଦେଇ ଓଡ଼ିଶାରେ ବୌଦ୍ଧ ଧର୍ମ ଐତିହ୍ୟ ସମ୍ପର୍କରେ ଆଲୋଚନା କରିଛନ୍ତି ।
