ହାଇଦ୍ରାବାଦ: ସମସ୍ତଙ୍କ ପାଇଁ ସମାନ ଅଧିକାର ରହିଥିବା ଏହି ଦେଶରେ ମୁସଲମାନମାନେ ଭଡ଼ାଟିଆ ନୁହନ୍ତି। ସେମାନେ ଦେଶର ଭାଗିଦାର। ତେଣୁ ୩୦୦ରୁ ଅଧିକ ଆସନରେ ବିଜୟୀ ହୋଇଥିଲେ ମଧ୍ୟ ବିଜେପିର ମନମାନି ଚଳିବ ନାହିଁ। ଏଆଇଏମଆଇଏମ ମୁଖ୍ୟ ତଥା ହାଇଦ୍ରାବାଦ ଏମପି ଅସଉଦ୍ଦିନ ଓୱେସୀ ଶନିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଟାର୍ଗେଟ କରି ଏଭଳି ମନ୍ତବ୍ୟ ଦେଇଛନ୍ତି।
ହାଇଦ୍ରାବାଦରେ ମକ୍କା ମସଜିଦଠାରେ ଲୋକଙ୍କୁ ସମ୍ବୋଧିତ କରି ଓୱେସୀ କହିଥିଲେ, ଯଦି କେହି ଭାବୁଛନ୍ତି ଯେ ହିନ୍ଦୁସ୍ତାନରେ ୩୦୦ ଆସନ ଜିତି ମନମାନି କରିବେ, ତେବେ ତାହା ହୋଇପାରିବ ନାହିଁ। ଅସଉଦ୍ଦିନ ଓୱେସୀ ଆପଣଙ୍କ ସହ ଲଢ଼ିବ। ମୁସଲମାନମାନଙ୍କୁ ଦେଶର ଭଡ଼ାଟିଆ ବୋଲି ଭାବିବା ଅନୁଚିତ। ସେମାନେ ଭାରତର ଭାଗିଦାର। ସେମାନେ ଦେଶର ନାଗରିକ ଏବଂ ସେମାନଙ୍କୁ ସମ୍ବିଧାନ ଦ୍ବାରା ଦିଆଯାଇଥିବା ଅଧିକାରଗୁଡ଼ିକରୁ ବଞ୍ଚିତ କରାଯାଇ ପାରିବ ନାହିଁ ବୋଲି ସେ କହିଥିଲେ।
ସୂଚନାଯୋଗ୍ୟ, ୨୦୧୯ ଲୋକସଭା ନିର୍ବାଚନରେ ବିଜେପିକୁ ୩୦୩ ଆସନରେ ବିଜୟ ମିଳିଥିବାବେଳେ ଏନଡିଏ ଖାତାକୁ ମୋଟ ୩୫୨ ଆସନ ଯାଇଛି। ସେହିପରି କଂଗ୍ରେସର ୫୨ ଆସନକୁ ମିଶାଇ ୟୁପିଏ ଖାତାକୁ ୯୨ ଆସନରେ ଯାଇଛି। ଏଆଇଏମଆଇଏମକୁ ୨ଟି ଆସନ ମିଳିଛି।
Comments are closed.