ଗିରିଡ଼ିହୀ(ଝାଡଖଣ୍ଡ) : ବିଜେପି ଅଧ୍ୟକ୍ଷ ତଥା କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହା ନାଗରିକତା ସଂଶୋଧନ ଆଇନ୍କୁ ନେଇ ବିରୋଧୀ ଦଳଗୁଡ଼ିକ ଉପରେ ବର୍ଷିଛନ୍ତି। ସେମାନେ ଜନସାଧାରଣଙ୍କ ମନରେ ବିଭ୍ରାନ୍ତି ସୃଷ୍ଟି କରୁଛନ୍ତି । ଶନିବାର ଗିରିଡ଼ିହୀ ଠାରେ ଏକ ନିର୍ବାଚନ ସଭାରେ କଂଗ୍ରେସ ଦଳକୁ ଆକ୍ଷେପ କରି ଶ୍ରୀ ସାହା କହିଛନ୍ତି, ପୂର୍ବତନ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଓ ତାଙ୍କର ଦଳର ନେତାମାନେ ଏହି ଆଇନ୍ର ବିଭିନ୍ନ ବ୍ୟବସ୍ଥାକୁ ନେଇ ଉତ୍ତରପୂର୍ବ ରାଜ୍ୟଗୁଡ଼ିକର ଲୋକମାନଙ୍କୁ ହିଂସା ପାଇଁ ଉସୁକାଉଛନ୍ତି। ବିଜେପି ମୁସଲମାନ ବିରୋଧୀ ନୁହେଁ ଏବଂ ଏହି ସମ୍ପ୍ରଦାୟର ଅଧିକାର ଓ ସ୍ୱାର୍ଥର ସୁରକ୍ଷା ପାଇଁ କେନ୍ଦ୍ର ସରକାର ପ୍ରତିଶ୍ରୁତିବଦ୍ଧ ବୋଲି ସେ କହିଛନ୍ତି ।
ଶ୍ରୀ ଶାହା କହିଛନ୍ତି, ନାଗରିକତା ସଂଶୋଧନ ଆଇନ୍ ପ୍ରସଙ୍ଗ ଉଠାଇ ବିରୋଧୀ ଦଳଗୁଡ଼ିକ ରାଜନୈତିକ ଫାଇଦା ଉଠାଇବାର ପ୍ରୟାସ କରୁଛନ୍ତି । ଭାରତୀୟ ମୁସଲମାନମାନେ ଏହି ଦେଶର ନାଗରିକ ଏବଂ ସେମାନେ ନାଗରିକ ହୋଇରହିବେ ବୋଲି ଶ୍ରୀ ଶାହା ସ୍ପଷ୍ଟ ଭାବେ କହିଛନ୍ତି । ଏଥିପାଇଁ ମୁସଲମାନମାନେ ଚିନ୍ତା ବା ଭୟ କରିବାର କୌଣସି କାରଣ ନାହିଁ । ତିନ ତଲାକ୍ ଉଠାଇ ନିଆଯିବା ପରେ ମୁସଲମାନ ମହିଳାମାନେ ଖୁସି ଅଛନ୍ତି ବୋଲି ଶ୍ରୀ ଶାହା କହିଛନ୍ତି।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କହିଛନ୍ତି, ପଡ଼ୋଶୀ ରାଷ୍ଟ୍ର ପାକିସ୍ତାନ, ଆଫଗାନିସ୍ତାନ ଓ ବାଂଲାଦେଶରେ ଅଣ-ମୁସଲମାନ ସଂଖ୍ୟାଲଘୁ ସମ୍ପ୍ରଦାୟର ଲୋକମାନେ ନିର୍ଯାତିତ ହୋଇଆସୁଛନ୍ତି। ନାଗରିକ ସଂଶୋଧନ ଆଇନ୍ ଲାଗୁକରି କେନ୍ଦ୍ର ସରକାର ସେହିସବୁ ଦେଶରୁ ଭାରତକୁ ଚାଲିଆସିଥିବା ଲୋକମାନଙ୍କୁ ଅଧିକାର ଓ ସମ୍ମାନ ପ୍ରଦାନ କରିଛନ୍ତି । ପାକୁରଠାରେ ଏକ ନିର୍ବାଚନ ସଭାରେ ଉଦ୍ବୋଧନ ଦେଇ ଶ୍ରୀ ସିଂହ କହିଛନ୍ତି, କେନ୍ଦ୍ର ସରକାର ମୁସଲମାନମାନଙ୍କ ପ୍ରତି ପାତରଅନ୍ତର ମନଭାବ ପୋଷଣ କରନ୍ତି ନାହିଁ ଏବଂ ଏହି ସମ୍ପ୍ରଦାୟର ଲୋକମାନଙ୍କୁ ନରେନ୍ଦ୍ର ମେଦୀ ସରକାର ଭାରତର ନାଗରିକତା ପ୍ରଦାନ କରିଛନ୍ତି।
