ଭୁବନେଶ୍ୱର : କଳିଙ୍ଗ ଷ୍ଟାଡ଼ିୟମରେ ଚାଲିଥିବା ଜାତୀୟ ଓପନ ଦୌଡ଼କୁଦ ପ୍ରତିଯୋଗିତାର ମଙ୍ଗଳବାର ପ୍ରଥମ ଦିନରେ ଓଡ଼ିଆ ଧାବକ ଅମିୟ ମଲ୍ଲିକ ୧୦୦ମିଟର ଦୌଡ଼ରେ ଫାଇନାଲକୁ ଉନ୍ନୀତ ହେବାରେ ବିଫଳ ହୋଇଛନ୍ତି। ଅମିୟ ସେମିଫାଇନାଲରେ ୧୦.୭୩ ସେକେଣ୍ଡରେ ଅତିକ୍ରମ କରି ୪ର୍ଥ ସ୍ଥାନ ସହିତ ଫାଇନାଲକୁ ଉନ୍ନୀତ ହେବାରେ ବିଫଳ ହୋଇଥିଲେ। ହିଟ୍-୪ରେ ଅମିୟ ୧୦.୭୨ ସେକେଣ୍ଡରେ ଅତିକ୍ରମ କରି ପ୍ରଥମସ୍ଥାନ ହାସଲ କରିଥିଲେ। ମହିଳା ଜାଭେଲିନ ଥ୍ରୋ ରେଳବାଇ ପ୍ରତିଯୋଗୀ ବାଜିମାତ୍ କରିଛନ୍ତି। ଶର୍ମିଳା କୁମାରୀ ୫୪.୮୫ ମିଟର ପକାଇ ସ୍ୱର୍ଣ୍ଣ, ଅନୁ ରାଣୀ ୫୨.୯୮ ମିଟର ପକାଇ ରୌପ୍ୟ ଓ କେ. ରଶ୍ମି ୫୦.୧୬ ମିଟର ପକାଇ ବ୍ରୋଞ୍ଜ୍ ପଦକ ହାସଲ କରିଛନ୍ତି। ପୁରୁଷ ୧୦ ହଜାର ମିଟର ଦୌଡ଼ରେ ଗୁଜୁରାଟର ମୁରଲୀ କୁମାର ଗାଭିଟ ୨୯.୪୯ ସେକେଣ୍ଡରେ ଅତି୍କ୍ରମ କରି ସ୍ୱର୍ଣ୍ଣ, ରେଳବାଇ ରଣଜିତ ପଟେଲ ୨୯.୫୦ ସେକେଣ୍ଡରେ ଅତିକ୍ରମ କରି ରୌପ୍ୟ, ସର୍ଭିସେସର ପ୍ରଦୀପ ସିଂହ ୨୯.୫୨.୩୭ ସେକେଣ୍ଡରେ ଅତିକ୍ରମ କରି ବ୍ରୋଞ୍ଜ୍ ପଦକ ଜିତିଛନ୍ତି। ଓଡ଼ିଶାର ଅଶୋକ ଦଣ୍ଡସେନା ୩୨.୭ ସେକେଣ୍ଡରେ ଅତିକ୍ରମ କରି ୯ମ ସ୍ଥାନରେ ରହିଥିଲେ। ପୁରୁଷ ପୋଲ୍ ଭଲ୍ଟରେ ସର୍ଭିସେସ୍ର ଏସ. ଶିବା ୫.୧୦ ମିଟର ସହ ସ୍ୱର୍ଣ୍ଣ, ରେଳବାଇର ଜେ. ପୀତ୍ ୫.୦୫ ମିଟର ସହ ରୌପ୍ୟ, ଗୋଆର ଅନାସ ବାବୁ ୪.୯୫ ମିଟର ସହ ବ୍ରୋଞ୍ଜ୍ ପଦକ ଜିତିଛନ୍ତି। ମହିଳା ୧୦ ହଜାର ମିଟର ଦୌଡ଼ରେ ରେଳବାଇର ଏଲ. ସୁରିୟା ୩୪.୧୮.୬୨ ସେକେଣ୍ଡ ସହ ସ୍ୱର୍ଣ୍ଣ, ରାଜସ୍ଥାନର ମିନୁ ୩୪.୫୯ ସେକେଣ୍ଡ ସହ ରୌପ୍ୟ ଓ ଏଲ୍ଆଇସିର ମୋନିକା ଏମ. ଆଥରେ ୩୫.୦୯ ସେକେଣ୍ଡ ସହ ବ୍ରୋଞ୍ଜ୍ ପଦକ ହାସଲ କରିଛନ୍ତି। ମହିଳା ଟ୍ରିପ୍ଲ ଜମ୍ପ୍ରେ ହରିୟାଣାର ରେଣୁ ୧୩.୬୩ ମିଟର ଦୂରକୁ ଡେଇଁ ସ୍ୱର୍ଣ୍ଣ, ତାମିଲନାଡ଼ୁର ଏମ.ଏ. ଶିବା ଅନବାର୍ଶି ୧୩.୨୦ ମିଟର ସହ ରୌପ୍ୟ ଓ ରେଳବାଇର ଭୈରବୀ ଦାସ ୧୨.୯୪ ମିଟର ଦୂରକୁ ଡେଇଁ ବ୍ରୋଞ୍ଜ୍ଜ ଜିତିଛନ୍ତି।
