ଗୋପାଳପୁର : ଗୋପାଳପୁର ଥାନା ଅନ୍ତର୍ଗତ ଆମ୍ବପୁଆ ବୀମା ନଗରରେ ରହୁଥିବା ଗୀତାଞ୍ଜଳି ପଟ୍ଟନାୟକ ଅନଲାଇନ ମାଧ୍ୟମରେ ଓଢଣୀ ଅର୍ଡର କରି ୭୭ ହଜାର ୧୪୫ ଟଙ୍କା ଠକେଇର ଶିକାର ହୋଇଛନ୍ତି । ସୂଚନା ପ୍ରକାରେ ଗୀତାଞ୍ଜଳି ଓଢଣୀକୁ ୨୩୦ ଟଙ୍କାରେ ଅନଲାଇନ ମାଧ୍ୟମରେ ଅର୍ଡର କରିଥିଲେ । ଜିନିଷ ପହଞ୍ଚିବା ପରେ ଅର୍ଡର କରିଥିବା ଓଢଣୀ ଠିକ ନଥିବାରୁ ଫେରସ୍ତ କରିଥିଲେ । କିନ୍ତୁ ରିଟର୍ଣ୍ଣ ଟଙ୍କା ନଆସିବାରୁ ମିସୋ କଷ୍ଟମର କେୟାର ସହ ଯୋଗାଯୋଗ କରିଥିଲେ । କିଛି ଦିନ ମଧ୍ୟରେ ଟଙ୍କା ଫେରସ୍ତ ପାଇବ ବୋଲି କହିଥିଲେ । କିଛି ଦିନ ଅପେକ୍ଷା ପରେ ଟଙ୍କା ଫେରସ୍ତ ନହେବାରୁ ପୁଣି କଷ୍ଟମର କେୟାର ସହ ଯୋଗାଯୋଗ କରିଥିଲେ ।
କଷ୍ଟମର କେୟାର ପକ୍ଷରୁ ହ୍ବାଟ୍ସଆପରେ କଲ କରି ସେ କହିବା ପ୍ରକାରେ ସ୍କ୍ରିନ ସଟ ଏବଂ ଓଟିପି ଦେଇଥିଲେ। ପରେ ମହିଳାଙ୍କ ମୋବାଇଲକୁ ଏକ ମେସେଜ ଆସିଥିଲା । ମେସେଜ ଦେଖିବା ବେଳକୁ ଚାରୋଟି କିସ୍ତିରେ ୭୭ ହଜାର ୧୪୫ ଟଙ୍କା ନିଜ ଆକାଉଣ୍ଟରୁ କଟିଥିଲା । ପରେ ମହିଳା ଜଣକ ଠକେଇର ଶିକାର ହୋଇଥିବା ଜାଣିପାରି ଗୋପାଳପୁର ଥାନାରେ ସମ୍ପୂର୍ଣ୍ଣ ତଥ୍ୟ ଲିଖିତ ଆକାରରେ ଅଭିଯୋଗ କରିଥିଲେ । ଅଭିଯୋଗ ପ୍ରକାରେ ପୁଲିସ କେସ ନମ୍ବର ୩୧୬/୨୪ ରୁଜୁ କରି ତଦନ୍ତ କରୁଥିବା ଥାନା ଅଧିକାରୀ ପ୍ରଶାନ୍ତ କୁମାର ମଲ୍ଲିକ ସୂଚନା ଦେଇଛନ୍ତି ।
