ହାଇଦରାବାଦ: ପ୍ରାୟ ୨୧ହଜାର କୋଟି ଟଙ୍କାର ଅନ୍-ଲାଇନ୍ ଚାଇନା ଋଣ ଆପ୍ ଦୁର୍ନୀତିର ତଦନ୍ତ କରୁଥିବା ହାଇଦରାବାଦ ପୁଲିସ ଗୁରୁବାର ଦିଲ୍ଲୀ ବିମାନବନ୍ଦରରୁ ଜଣେ ଚୀନ ନାଗରିକ ଝୁ ୱେଇ ଓରପ୍ ଲାମ୍ବୋ (୨୭)ଙ୍କୁ ଗିରଫ କରିଛି। ସେ ଭାରତ ଛାଡ଼ି ପଳାଇବା ଉଦ୍ୟମ କଲାବେଳେ ଗିରଫ ହୋଇଛନ୍ତି। ତାଙ୍କ ଘର ଚୀନର ଜିଆନଗି ପ୍ରଦେଶରେ ବୋଲି ପୁଲିସ କହିଛି। ଲମ୍ବୋ ଆଗ୍ଲୋ ଟେକ୍ନୋଲଜିସ୍, ଲ୍ୟୁଫାଙ୍ଗ ଟେକ୍ନୋଲଜିସ୍, ନାବଲୁମ୍ ଟେକ୍ନୋଲଜିସ୍ ଓ ପିନ୍ପ୍ରିଣ୍ଟ ଟେକ୍ନୋଲଜିସ୍ ଭଳି ୪ଟି କମ୍ପାନୀ ନାମରେ ସ୍ବତନ୍ତ୍ର ଆପ୍ ପ୍ରସ୍ତୁତ କରି ବେଆଇନ ଭାବେ ଋଣ ପ୍ରଦାନ କରୁଥିେଲ। ଏଥିସହିତ ଆନ୍ଧ୍ରପ୍ରଦେଶର କର୍ଣ୍ଣଲ ଜିଲାବାସୀ କେ. ନାଗରାଜୁ ନାମକ ଜଣଙ୍କୁ ମଧ୍ୟ ଗିରଫ କରାଯାଇଛି।
ଏହି ଆପ୍ ଜରିଆରେ ଋଣ ଦେଇ ଲୋକଙ୍କୁ ଶୋଷଣ କରୁଥିବା ଅଭିଯୋଗ ହେବା ପରେ ପୁଲିସ କାର୍ୟ୍ୟାନୁଷ୍ଠାନ ଗ୍ରହଣ କରିଛି। ଏହି ଋଣ ବାବଦରେ ଲୋକଙ୍କଠାରୁ ୩୬ପ୍ରତିଶତ ପର୍ୟ୍ୟନ୍ତ ସୁଧ ଅସୁଲ କରାଯାଉଥିବାର ଅଭିଯୋଗ ହୋଇଥିଲା। ଏହି ଶୋଷଣର ଶିକାର ହୋଇ ତିନି ଜଣ ଆତ୍ମହତ୍ୟା କରିବା ପରେ ମାମଲା ସାମ୍ନାକୁ ଆସିଥିଲା। ଅଦ୍ୟାବଧି ଏହି ଦୁର୍ନୀତିରେ ପୁଲିସ ୧୮ଜଣଙ୍କୁ ଗିରଫ କଲାଣି। ମୁମ୍ବଇ, ଦିଲ୍ଲୀ, ବେଙ୍ଗାଲୁରୁ, ପୁଣେ, ନାଗପୁର, ଗାଜିଆବାଦ, ଗୁଡଗାଓଁ ଆଦି ସହରର ହଜାର ହଜାର ଲୋକ ଲାମ୍ବୋ ଦ୍ବାରା ଶୋଷିତ ହୋଇଛନ୍ତି। ପୁଲିସ ଅନ୍ୟତମ ପ୍ରମୁଖ ଅଭିଯୁକ୍ତ ଥିବା ଚୀନ ଯୁବତୀ ୟୁଆନ ୟୁଆନ ଓରଫ୍ ସିସି ଓ ଜେନିଫରକୁ ଖୋଜୁଛି। ସେ ଏବେ ବିଦେଶରେ ଥିବା ସୂଚନା ମିଳିଛି।
