ଅନ୍‌ଲାଇନ‘ଫ୍ରି ଫାୟାର’, ରମି ଓ ‘ଲୁଡୋ’ ଖେଳ ହେଲା କାଳ – ବାପାଙ୍କ ଆକାଉଣ୍ଟ ଖାଲି କରିବା ପରେ ଘର ଛାଡି ପଳାଇଲେ ଯୁବକ

ଧାମନଗର (ସପ୍ର): ଅନଲାଇନ ଖେଳ ଏବେ ଯୁବ ବର୍ଗକୁ ପଥଭ୍ରଷ୍ଟ କରୁଛି। ଏହି ମୋବାଇଲ ଓ ଅନଲାଇନ ଖେଳ ପାଇଁ ଅଜାଣତରେ ନିଜ ଭବିଷ୍ୟତକୁ ଅନ୍ଧକାର ଭିତରକୁ ଠେଲି ଦେଉଛନ୍ତି ଯୁବ ସମାଜ। ଏହି ଖେଳ ଖେଳି ଅଭିଭାବକଙ୍କ କଷ୍ଟ ଅର୍ଜିତ ଟଙ୍କା ହରାଉଥିବା ବେଳେ ଆତ୍ମହତ୍ୟା କରିବାକୁ ମଧ୍ୟ ପଛାଉ ନାହାନ୍ତି। ଏମିତି ଏକ ଉଦାହରଣ ଦେଖିବାକୁ ମିଳିଛି ଭଦ୍ରକ ଜିଲା ଧାମନଗର ବ୍ଲକ ଦିହୁଡି ଆନନ୍ଦପୁର ପଞ୍ଚାୟତରେ। ଭଦ୍ରକ ଧାମନଗର ଥାନା ଦିହୁଡ଼ି ଆନନ୍ଦପୁର ଚମ୍ପାବାଗ ଗାଁର ପଦ୍ମନାଭ ନାୟକଙ୍କ ପୁଅ ଖଗେଶ୍ୱର ନାୟକ(୧୯)। ଖଗେଶ୍ବର ମୋବାଇଲରେ ଅନଲାଇନ ଖେଳ ଖେଳି ବାପାଙ୍କ ଆକାଉଣ୍ଟରୁ ଟଙ୍କା ଖାଲି କରିଦେଇଛନ୍ତି।

ଶେଷରେ ଘର ଲୋକଙ୍କ ଭୟରେ ଘରୁ କେଉଁଆଡେ ଚାଲିଯାଇଥିବା ଥାନାରେ ଅଭିଯୋଗ କରିଛନ୍ତି ବାପା। ପାଠ ପଢ଼ିବା ବେଳେ ଖଗେଶ୍ବର ଏକ ଦୋକାନରେ କାମ କରୁଥିଲେ। ହଠାତ ମୋବାଇଲ ପାଇଁ ଜିଦି କରିଥିଲେ। ଅଳ୍ପ ସଞ୍ଚୟରୁ ବାପା ଖଗେଶ୍ୱର ପାଇଁ ମୋବାଇଲଟିଏ କିଣି ଦେଇଥିଲେ। କିନ୍ତୁ ପୁଅ ମୋବାଇଲରେ ‘ଫ୍ରି ଫାୟାର’ ରମି ଓ ‘ଲୁଡୋ’ ଖେଳ ଖେଳିବାରେ ବ୍ୟସ୍ତ ରହୁଥିଲେ।

ଏହି ଖେଳରେ ସେ ବାପାଙ୍କ ଆକାଉଣ୍ଟରୁ ପ୍ରାୟ ୨୪ ହଜାର ଟଙ୍କା କାଟିଦେଇଛନ୍ତି। ବାପାଙ୍କ ଗାଳି ଭୟରେ ମୋବାଇଲକୁ ଘରେ ରଖି ୩ ଦିନ ହେଲା ଖଗେଶ୍ବର କେଉଁଆଡ଼େ ଚାଲିଯାଇଛନ୍ତି। ପଡ଼ୋଶୀ, ସାଙ୍ଗସାଥି ଓ ବନ୍ଧୁଙ୍କ ଘରେ ପଚରା ଉଚୁରା ପରେ ଘର ଲୋକେ ଥାନାରେ ଏତଲା ଦେଇଛନ୍ତି। ୩ ଦିନ ହେଲା ପୁଅର କୌଣସି ସନ୍ଧାନ ନ ପାଇ ପରିବାର ଲୋକେ ଏବେ ବ୍ୟସ୍ତ ବିବ୍ରତ ହୋଇପଡ଼ିଛନ୍ତି। ପୁଲିସ ଏକ ନିଖୋଜ ମାମଲା ଋଜୁ କରି ତଦନ୍ତ ଆରମ୍ଭ କରିଛି।