ଭୁବନେଶ୍ବର: ଆମେରିକା ଓ ବ୍ରିଟେନରେ ତୃତୀୟ ଲହର ‘ଓମିକ୍ରନ’ ଯେଉଁଭଳି ଭାବେ ଜଟିଳ ପରିସ୍ଥିତି ସୃଷ୍ଟି କଲା ଭାରତରେ ସେତେଟା କରିପାରିଲା ନାହିଁ। ଏ ସଂକ୍ରାନ୍ତରେ ଭୁବନେଶ୍ବରସ୍ଥିତ କିମ୍ସ ଡାକ୍ତରଖାନାର ଡା ସକିର ଅହମଦ ଏବଂ କେରଳ କେୟାର ଡାକ୍ତରଖାନାର ଡା ପଦ୍ମନାଭ ସିେନାଏ ମିଳିତ ଭାବେ ରୋଗ ପ୍ରତିରୋଧକ ଶକ୍ତି ଉପରେ ଗବେଷଣା କରିଛନ୍ତି। ମିଳିତ ଗବେଷକଙ୍କ ନିର୍ଯ୍ୟାସ କହୁଛି, ଦ୍ବିତୀୟ ଲହରରେ ୭୦ ପ୍ରତିଶତ ଭାରତୀୟ ଡେଲଟା ଭୂତାଣୁ ଦ୍ବାରା ସଂକ୍ରମିତ ହେବା ଏବଂ ଦେଶର ୯୫ ପ୍ରତିଶତ ବ୍ୟକ୍ତିଙ୍କୁ ପ୍ରଥମପାନ ଟିକାକରଣ କରାଯିବା ଯୋଗୁଁ ସମୁଦାୟ ଭାରତୀୟଙ୍କ ମଧ୍ୟରୁ ୭୦ ପ୍ରତିଶତଙ୍କ ଶରୀରରେ ଉନ୍ନତ ରୋଗ ପ୍ରତିରୋଧକ(ହାଇବ୍ରିଡ ଇମ୍ୟୁନିଟି) ଉତ୍ପନ ହୋଇଛି। ଫଳସ୍ବରୂପ ଓମିକ୍ରନ ଭୂତାଣୁ ସଂକ୍ରମଣ କଲେ ମଧ୍ୟ ସଂକ୍ରମିତଙ୍କୁ ଗୁରୁତର କରିପାରିନାହିଁ। ଡାକ୍ତରଖାନାରେ ଭର୍ତ୍ତି ଏବଂ ମୃତ୍ୟୁହାର ଦ୍ବିତୀୟ ଲହର ତୁଳନାରେ ବହୁତ କମ ରହିଲା।
ଗବେଷକ ଅହମଦ କହିଛନ୍ତି, ଭୁବନେଶ୍ୱରସ୍ଥିତ କିମ୍ସ ଏବଂ କେରଳର କେୟାର ଡାକ୍ତରଖାନାରୁ ସୁସ୍ଥ, ସଂକ୍ରମିତ ଏବଂ ସଂକ୍ରମଣରୁ ଆରୋଗ୍ୟ ବ୍ୟକ୍ତିଙ୍କ ଶରୀରରୁ ରକ୍ତ ନମୁନା ସଂଗ୍ରହ କରି ରୋଗ ପ୍ରତିରୋଧକ ଶକ୍ତି ଉପରେ ଅଧ୍ୟୟନ କରାଯାଇଛି। ପରୀକ୍ଷାରୁ ଦେଖାଗଲା ସୁସ୍ଥ ବ୍ୟକ୍ତଙ୍କ ଶରୀରରେ ଯେତିକି ମାତ୍ରାରେ ରୋଗ ପ୍ରତିରୋଧକ ଶକ୍ତି ରହୁଛି, ସଂକ୍ରମଣରୁ ଆରୋଗ୍ୟ ପରେ ୩୦ ରୁ ୧୦୦ ପ୍ରତିଶତ ପର୍ଯ୍ୟନ୍ତ ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଉଛି। ଆରୋଗ୍ୟ ପରେ ଉଭୟ ପ୍ରଥମ ଓ ଦ୍ୱିତୀୟପାନ ଟିକା ନେଇଥିବା ବ୍ୟକ୍ତିଙ୍କ ଶରୀରରେ ରୋଗପ୍ରତିରୋଧକ ଶକ୍ତି ବୃଦ୍ଧି ପାଇ ଅଧିକ ଉନ୍ନତ ହେଉଥିବା ଗବେଷଣାରୁ ଜଣାପଡିଛି। ପୁଣି ଅଧ୍ୟୟନରୁ ଜଣାଯାଇଛି, ୬୦ ପ୍ରତିଶତ ଲୋକ ପ୍ରଥମ ଓ ଦ୍ୱିତୀୟପାନ ଟିକା ନେଇଥିଲେ। ସେମାନଙ୍କ ମଧ୍ୟରୁ ପ୍ରାୟ ୯୦ ପ୍ରତିଶତ ଚୀନର ଉହାନ ସହରରୁ ବ୍ୟାପିଥିବା କରୋନା ଭୂତାଣୁ ଏବଂ ଡେଟଲା ଭୂତାଣୁକୁ ପ୍ରତିହତ କରିବାରେ ସକ୍ଷମ। ୬୫ ପ୍ରତିଶତ ରୋଗୀ କୋଭିସିଲ୍ଡର ପ୍ରଥମପାନ ଟିକା ନେଇଥିଲେ। ଏ କ୍ଷେତ୍ରରେ ଅଧ୍ୟୟନରୁ ଜଣାପଡ଼ିଛି, କୋଭିସିଲ୍ଡ ଟିକାର ପ୍ରଥମପାନ ନେଇଥିବା ବ୍ୟକ୍ତିଙ୍କ ଶରୀରରେ ଉତ୍ପନ୍ନ ରୋଗ ପ୍ରତିରୋଧକ ଶକ୍ତି ଓମିକ୍ରନକୁ ପ୍ରତିହତ କରିବା ନିମନ୍ତେ ସକ୍ଷମ। କୋଭାକ୍ସିନ ଟିକା ମନୁଷ୍ୟ ଶରୀରରେ ଉନ୍ନତ ରୋଗ ପ୍ରତିରୋଧକ ଶକ୍ତି ସୃଷ୍ଟି କରିପାରୁଛି। ଯାହା ଓମିକ୍ରନ ଭୂତାଣୁକୁ ପ୍ରତିହତ କରିପାରିବ। ଆଣ୍ଠୁଗଣ୍ଠି ରୋଗ ଜନିତ ରୋଗୀ ଦୁଇଟି ପାନ ଟିକା ନେଇଥିଲେ ସେମାନଙ୍କ ଶରୀରରେ ଉନ୍ନତ ରୋଗ ପ୍ରତିରୋଧକ ଶକ୍ତି ଉତ୍ପନ ହୋଇପାରୁଛି। ଯାହାକି ରୋଗପ୍ରତିରୋଧକ ଶକ୍ତି ସ୍ତରର ୩୦ ଗୁଣ। ୨୦୦୦ ଆଣ୍ଠୁଗଣ୍ଠି ରୋଗୀଙ୍କ ଉପରେ ଗବେଷଣା ହୋଇଥିଲା।
କୁହାଯାଉଛି, ଆମେରିକା ଏବଂ ବ୍ରିଟେନରେ ଦ୍ବିତୀୟ ଲହରରେ କମ ଲୋକ ସଂକ୍ରମିତ ହୋଇଥିଲେ। ସେତେବେଳକୁ ଉପରୋକ୍ତ ରାଷ୍ଟ୍ରଗୁଡିକରେ ବ୍ୟାପକ ଟିକାକରଣ ହୋଇ ନ ଥିବାରୁ ଲୋକଙ୍କ ଶରୀରରେ ଉନ୍ନତ ରୋଗ ପ୍ରତିରୋଧକ ଶକ୍ତି ସୃଷ୍ଟି ହୋଇପାରି ନ ଥିଲା। ଉପରୋକ୍ତ ରାଷ୍ଟ୍ରରେ ଓମିକ୍ରନ ଅଧିକ ଲୋକଙ୍କୁ ସଂକ୍ରମଣ କରିବା ସହ ଗୁରୁତରଙ୍କ ସଂଖ୍ୟା ବୃଦ୍ଧି ପାଇଥିଲା। ହେଲେ ତୃତୀୟ ଲହର ବେଳକୁ ୭୦ ପ୍ରତିଶତ ଭାରତୀୟଙ୍କ ପାଖରେ ଉନ୍ନତ ରୋଗ ପ୍ରତିରୋଧକ ଶକ୍ତି ଉତ୍ପନ୍ନ ହୋଇଥିବାରୁ ଓମିକ୍ରନ ଭୂତାଣୁ ସେତେ ଗୁରୁତର କଲାନାହିଁ। ଯେଉଁମାନେ ସଂକ୍ରମିତ ହୋଇଛନ୍ତି ସେମାନଙ୍କ ମଧ୍ୟରୁ ୪/୫ ପ୍ରତିଶତ ଡାକ୍ତରଖାନାରେ ଭର୍ତ୍ତି ହୋଇଥିଲେ।
