ମହିଳା ଯାତ୍ରୀଙ୍କ ବିଶ୍ବାସ ଜିତୁଛି ଓଡ଼ିଶା ଯାତ୍ରୀ ଆପ୍

ଭୁବନେଶ୍ୱର : ଓଡ଼ିଶା ଯାତ୍ରୀ ଗମନାଗମନ ବ୍ୟବସ୍ଥା ଉପରେ ଦିନକୁ ଦିନ ଅଧିକରୁ ଅଧିକ ମହିଳା ଯାତ୍ରୀ ଭରସା କରୁଥିବା ଏକ ପରିସଂଖ୍ୟାନରୁ ଜଣାପଡିଛି। ଓଡ଼ିଶା ଯାତ୍ରୀ ଆପର ପ୍ଲାଟଫର୍ମରୁ ମିଳିଥିବା ତଥ୍ୟ ଅନୁଯାୟୀ ୫୭.୪୪ ପ୍ରତିଶତରୁ ଅଧିକ ମହିଳା ଏହାର ବ୍ୟବହାର କରିଛନ୍ତି। ୨୦୨୪ ଅକ୍ଟୋବରରୁ ୨୦୨୫ ଜୁଲାଇ ଅର୍ଥାତ ଗତ ୧୦ ମାସ ମଧ୍ୟରେ ମଧ୍ୟରେ ‘ଓଡ଼ିଶା ଯାତ୍ରୀ’ ବ୍ୟବସ୍ଥା ବ୍ୟବହାର କରିଥିବା ମୋଟ ୨ ଲକ୍ଷ ୫୭ ହଜାର ଯାତ୍ରୀଙ୍କ ମଧ୍ୟରୁ ୧ ଲକ୍ଷ ୪୮ ହଜାରରୁ ଅଧିକ ମହିଳା ଉପଭୋକ୍ତା ଅଛନ୍ତି।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ୨୦୨୫ ଜାନୁଆରୀରେ ଓଡ଼ିଶା ଯାତ୍ରୀ ଆପ୍’ର ଶୁଭାରମ୍ଭ କରିଥିଲେ। ୨୦୨୪ ଅକ୍ଟୋବରରେ ଏହାକୁ ପରୀକ୍ଷାମୂଳକ ଭାବେ ଆରମ୍ଭ କରାଯାଇଥିଲା। ସୂଚନା ମୁତାବକ, ଗତ ଜାନୁଆରୀରେ ୬୧.୬୩% ଏବଂ ଜୁଲାଇରେ ୫୫.୩୩% ମହିଳା ଏହାର ବ୍ୟବହାର କରିଥିଲେ, ଯାହା ପୁରୁଷ ଯାତ୍ରୀଙ୍କଠାରୁ ଅଧିକ। ପରିବହନ ଅଧିକାରୀ ଏହି ପରିବର୍ତ୍ତନକୁ ଯାଞ୍ଚ କରାଯାଇଥିବା ଡ୍ରାଇଭର, ରିଅଲ୍-ଟାଇମ୍ ଟ୍ରିପ୍ ଟ୍ରାକିଂ, ଶେଷ ମାଇଲ୍ ସଂଯୋଗୀକରଣ ଏବଂ ଏକ ଦୃଢ଼ ଅଭିଯୋଗ ସମାଧାନ ବ୍ୟବସ୍ଥା ସମେତ ଅନେକ କାରଣ ଯୋଗୁଁ ସମ୍ଭବ ହୋଇଥିବା କହିଛନ୍ତି। ଗୃହ ଏବଂ ନଗର ଉନ୍ନୟନ ବିଭାଗର ପ୍ରମୁଖ ସଚିବ ଉଷା ପାଢ଼ୀ କହିଛନ୍ତି, ପ୍ରବର୍ତ୍ତନ ଏବଂ ପରିବହନ କର୍ତ୍ତୃପକ୍ଷଙ୍କ ସହିତ ଓଡ଼ିଶା ଯାତ୍ରୀ ଆପର ସମନ୍ୱୟ ମହିଳା ଏବଂ ଅନ୍ୟାନ୍ୟ ଦୁର୍ବଳ ଗୋଷ୍ଠୀଙ୍କ ପାଇଁ ଏକ ସୁରକ୍ଷିତ ଏବଂ ଦାୟିତ୍ୱପୂର୍ଣ୍ଣ ଯାତାୟାତ ଅଭିଜ୍ଞତା ସୃଷ୍ଟି କରିଛି। ଓଡ଼ିଶା ଯାତ୍ରୀ, ରାଜ୍ୟ ପରିବହନ ପ୍ରାଧିକରଣ, ଓଡ଼ିଶା ସହିତ ମିଳିତ ଭାବରେ ୩୦ ହଜାରରୁ ଅଧିକ ତୀର୍ଥଯାତ୍ରୀଙ୍କୁ ମାଗଣା ଅଟୋ ଯାତ୍ରା ପ୍ରଦାନ କରିଛି। ରାଜ୍ୟ ସାରା ଅଧିକ ସହରକୁ ଓଡ଼ିଶା ଯାତ୍ରୀକୁ ବିସ୍ତାର କରିବା ଏବଂ ପ୍ଲାଟଫର୍ମ ଅଧୀନରେ ଆମ୍ବୁଲାନ୍ସ ଏବଂ ଡଙ୍ଗା ସେବା ପ୍ରଚଳନ କରିବା ପାଇଁ ଯୋଜନା ଚାଲିଛି ବୋଲି ବିଭାଗ ପକ୍ଷରୁ କୁହାଯାଇଛି।