ବାହାନଗା : ବାଲେଶ୍ବର ଜିଲା ବାହାନଗା ଷ୍ଟେସନ ରେଳ ଦୁର୍ଘଟଣା ସ୍ଥଳରେ ମଙ୍ଗଳବାର ରେଳ ସୁରକ୍ଷା ଆୟୁକ୍ତ (ସେଫ୍ଟି କମିସନର) ସ୍ଥିତି ଅନୁଧ୍ୟାନ କରିଛନ୍ତି। ଦୁର୍ଘଟଣା ଘଟିବାର ୬୦ ଘଣ୍ଟା ପରେ ସୁରକ୍ଷା ଆୟୁକ୍ତ ଶୈଲେଶ ପାଠକ ରବିବାର ସକାଳେ ଘଟଣାସ୍ଥଳରେ ପହଞ୍ଚି ବିଭିନ୍ନ ବିଷୟରେ ଅନୁଧ୍ୟାନ କରିଥିଲେ। ଦକ୍ଷିଣ ପୂର୍ବ ରେଳ ଜୋନର ବରିଷ୍ଠ ପଦାଧିକାରୀଙ୍କ ସହ କଥା ହୋଇଥିଲେ। ସେ ଷ୍ଟେସନ ସିଗନାଲ ରୁମ, କଣ୍ଟ୍ରୋଲ ରୁମ ଆଦି ବୁଲିବା ସହ ସ୍ଥିତି ଅନୁଧ୍ୟାନ କରିଥିଲେ। କମିଶନର ଶ୍ରୀ ପାଠକ କହିଥିଲେ, ସାଉଥ ଇଷ୍ଟର୍ଣ୍ଣ ସର୍କଲ ପକ୍ଷରୁ ପ୍ରାରମ୍ଭିକ ତଦନ୍ତ ଚାଲିଛି। ମୋ ତରଫରୁ ମୁଁ ତଦନ୍ତ କରିବାକୁ ଆସିଛି। ତଦନ୍ତ ରିପୋର୍ଟ ହସ୍ତଗତ ହେଲେ ଜଣାଇ ଦିଆଯିବ। ସିଗନାଲ ସିଷ୍ଟମ ଫେଲ ହେବାରୁ ଦୁର୍ଘଟଣା ଘଟିଲା ବୋଲି ପ୍ରଶ୍ନ ପଚରା ଯିବାରୁ ଏହାକୁ ଏଡ଼ାଇଯାଇ କହିଥିଲେ, ଏ ସମ୍ପର୍କରେ ଏବେ କିଛି କହି ହେବନାହିଁ। ତଦନ୍ତ ପାଇଁ ସମୟ ଲାଗିବ ଓ ପରେ ଦୁର୍ଘଟଣାର କାରଣ ଜଣାପଡ଼ିବ ବୋଲି ଶ୍ରୀ ପାଠକ ସୂଚନା ଦେଇଥିଲେ। ରବିବାର ସନ୍ଧ୍ୟାରୁ ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଘଟଣାର ସିବିଆଇ ତଦନ୍ତ ପାଇଁ ଅନୁମୋଦନ କରିଛନ୍ତି। ଘଟଣାର ତଦନ୍ତ ପରେ ଅଧିକ ତଦନ୍ତ ଜାରି ରହିଛି। ରବିବାର ରାତିରେ ଡାଉନ ଲାଇନରେ ଟ୍ରେନ ଚଳାଚଳ ଆରମ୍ଭ କରିଥିବାବେଳେ ମୃତାହତଙ୍କ ପାଇଁ କାନ୍ଦି ପକାଇ ରେଳଗାଡ଼ିକୁ ନମସ୍କାର କରି ଗାଡ଼ି ଚଳାଇବାକୁ ଆହ୍ୱାନ ଦେଇଥିଲେ।
Comments are closed.