ନୂଆ ନୀତି ଅନୁଯାୟୀ ପ୍ରତିଦିନ ୩ଲକ୍ଷ କରୋନା ଟିକାକରଣ ପାଇଁ ରାଜ୍ୟ ସରକାରଙ୍କ ଲକ୍ଷ୍ୟ

ଭୁବନେଶ୍ବର : ଆସନ୍ତାକାଲିଠାରୁ ନୁଆ ନୀତି ଅନୁଯାୟୀ ରାଜ୍ୟରେ କରୋନା ଟିକାକରଣ ଅଭିଯାନ ଆରମ୍ଭ ହେବ। ପ୍ରତିଦିନ ୩ଲକ୍ଷ ଟିକାକରଣ ପାଇଁ ରାଜ୍ୟ ସରକାର ଲକ୍ଷ୍ୟ ରଖିଛନ୍ତି। କରୋନା ଟିକାକରଣ ପାଇଁ ଏଥର ଉଭୟ ଅନ୍‌ଲାଇନ ଓ ଅଫଲାଇନରେ ସମ୍ପୂର୍ଣ୍ଣ ଟିକାକରଣ ଅଭିଯାନ ଚଳାଇବା ପାଇଁ ସରକାର ଯୋଜନା ପ୍ରସ୍ତୁତ କରିଛନ୍ତି। ଯୋଗ୍ୟ ବିବେଚିତ ବର୍ଗର ସମସ୍ତ ଲୋକଙ୍କୁ ଯେଭଳି ସମ୍ପୂର୍ଣ୍ଣ ଟିକାକରଣ କରାଯାଇପାରିବ ସେଥିପାଇଁ ଅନଲାଇନ ଓ ଅଫଲାଇନ ପଞ୍ଜୀକରଣ ପରେ ଟିକା ଦେବା ନେଇ ବ୍ୟବସ୍ଥା କରାଯାଇଛି।  ତେଣୁ ଯେଉଁମାନେ ଅନଲାଇନରେ ନାମ ପଞ୍ଜୀକରଣ କରିଥିବେ ସେମାନେ ଟିକାକରଣ କେନ୍ଦ୍ରକୁ ଆସି ଟିକା ନେଇପାରିବେ। ସେହିପରି ଟିକାକରଣ କେନ୍ଦ୍ରରେ ଅଫଲାଇନରେ ନାମ ପଞ୍ଜୀକରଣ କରି ମଧ୍ୟ ଟିକା ନେଇପାରିବେ। ୧୮ବର୍ଷରୁ ୪୪ ଏବଂ ୪୫ରୁ ଅଧିକ ବର୍ଷ ବର୍ଗର ସମସ୍ତ ଲୋକଙ୍କୁ ପ୍ରଥମ ପାନ ଓ ଦ୍ବିତୀୟ ପାନ ଟିକା ଦିଆଯିବା ନେଇ ବ୍ୟବସ୍ଥା କରାଯାଇଛି। ଉଭୟ କେନ୍ଦ୍ର ସରକାର ପଠାଇଥିବା ଓ ରାଜ୍ୟ କିଣିଥିବା କରୋନା ଟିକା ସେମାନଙ୍କୁ ଦିଆଯିବ ବୋଲି ଆଜି ରାଜ୍ୟ ସରକାରଙ୍କ ପକ୍ଷରୁ ସୂଚନା ଦିଆଯାଇଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଘୋଷଣା ଅନୁଯାୟୀ ଆସନ୍ତା କାଲି ଅର୍ଥାତ ଜୁନ ୨୧ରୁ ଦେଶରେ ନୂଆ ଟିକାକରଣ ନୀତି ଅନୁସାରେ ଟିକାକରଣ ଆରମ୍ଭ ହେବ। ଏହାକୁ ଦୃଷ୍ଟିରେ ରଖି ରାଜ୍ୟରେ ବ୍ୟାପକ ବ୍ୟବସ୍ଥା କରାଯାଇଛି ଏବଂ ପ୍ରତିଦିନ ୩ ଲକ୍ଷ ଟିକାକରଣ ପାଇଁ ରାଜ୍ୟ ସରକାର ଲକ୍ଷ୍ୟ ରଖିଛନ୍ତି। ଏହା ସହିତ ଯେଉଁମାନେ ଗୋଟିଏ ଟିକା ନେଇଛନ୍ତି ସେମାନଙ୍କୁ ଠିକ ସମୟରେ ଦ୍ବିତୀୟ ପାନ ଟିକା ଦିଆଯିବା ଉପରେ ଗୁରୁତ୍ବ ଦିଆଯାଇଛି। ଆସନ୍ତା କାଲି ଆରମ୍ଭ ହେବାକୁ ଥିବା ଟିକାକରଣ ପାଇଁ ଉଭୟ କେନ୍ଦ୍ର ସରକାର ପଠାଇଥିବା ଟିକା ଓ ରାଜ୍ୟ ସରକାର କିଣିଥିବା ଟିକା ବ୍ୟବହାର କରାଯିବ। ଟିକାକାରଣ ପାଇଁ ଉଭୟ ଅନଲାଇନ ଓ ଅଫଲାଇନରେ ପଂଜୀକରଣ ପାଇଁ ପୌରପରିଷଦରେ ୧୦ଟି ଓ ମହାନଗର ନିଗମରେ ୨୦ଟି ଲେଖାଏଁ ସେସନ କରାଯିବ। ସେହିପରି ପଞ୍ଚାୟତ ସମିତି (ବ୍ଲକ) ଓ ବିଜ୍ଞାପିତ ଅଞ୍ଚଳ ପରିଷଦ (ଏନଏସି)ରେ ପ୍ରତିଦିନ ୫ଟି ଲେଖାଏଁ ସେସନ କରାଯିବ। ଏନେଇ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ରାଜ୍ୟର ସବୁ ଜିଲାର ଜିଲ୍ଲାପାଳ ଓ ବିଜ୍ଞାପିତ ଅଞ୍ଚଳ ପରିଷଦ ଏବଂ ମହାନଗର ନିଗମ ତଥା ମୁନିସିପାଲ କମିଶନରଙ୍କୁ ଚିଠି ଲେଖି ନିର୍ଦେଶ ଜାରି କରିଛନ୍ତି।