ମସ୍କୋ : ଭ୍ଲାଦିମୀର ପୁତିନ ମଙ୍ଗଳବାର ରେକର୍ଡ ପଞ୍ଚମ ଥର ପାଇଁ ରୁଷ୍ ରାଷ୍ଟ୍ରପତି ଭାବେ ଶପଥ ଗ୍ରହଣ କରିଛନ୍ତି। କ୍ରେମଲିନ୍ରେ ଆୟୋଜିତ ଶପଥଗ୍ରହଣ ଉତ୍ସବକୁ ଆମେରିକା ସମେତ କେତେ ପାଶ୍ଚାତ୍ୟ ରାଷ୍ଟ୍ରର କୂଟନୀତିଜ୍ଞ ବର୍ଜନ କରିଥିବା ଜଣାପଡିଛି। ୭୧ ବର୍ଷୀୟ ପୁତିନ ୧୯୯୯ରୁ ରାଷ୍ଟ୍ରପତି କିମ୍ବା ପ୍ରଧାନମନ୍ତ୍ରୀଭାବେ ଦାୟିତ୍ବ ତୁଲାଇ ଆସୁଛନ୍ତି। କେବଳ ୨୦୦୮ରୁ ୨୦୧୨ ପର୍ଯ୍ୟନ୍ତ ପୁତିନ ପ୍ରଧାନମନ୍ତ୍ରୀ ଆସନ ଅଳଙ୍କୃତ କରିଥିଲେ। ୨୦୨୨ ଫେବୃଆରୀ ୨୪ରେ ୟୁକ୍ରେନ ବିରୋଧରେ ଯୁଦ୍ଧ ଘୋଷଣା କରିବା ପରଠାରୁ ପାଶ୍ଚାତ୍ୟ ରାଷ୍ଟ୍ରଗୁଡିକ ପୁତିନ୍ଙ୍କ ଶତ୍ରୁ ପାଲଟିଛନ୍ତି। ରାଷ୍ଟ୍ରପତିଭାବେ ଶପଥ ନେବାପରେ ପୁତିନ କହିଛନ୍ତି ଯେ ପାଶ୍ଚାତ୍ୟ ରାଷ୍ଟ୍ର ସହ ଆଲୋଚନା ଦ୍ବାରକୁ ଖୋଲା ରଖିବାକୁ ସେ ପ୍ରସ୍ତୁତ ଅଛନ୍ତି। ତେବେ ରୁଷ୍ର ସମ୍ମାନ ହାନି ହେବାଭଳି କୌଣସି ପଦକ୍ଷେପ ସେ ଗ୍ରହଣ କରିବେ ନାହିଁ। ରୁଷ୍ବାସୀଙ୍କ ଦୃଢ ସମର୍ଥନ ଯୋଗୁଁ ଦେଶ ଆଜି ସମସ୍ତ ପ୍ରକାର କଟକଣାର ଉଚିତ ମୁକାବିଲା କରିପାରିଥିବା ସେ କହିଛନ୍ତି। ଗତ ମାର୍ଚ୍ଚରେ ରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହୋଇଥିଲା। ତେବେ ପୁତିନ୍ଙ୍କ ଦୃଢ ସମାଲୋଚକ କୁହାଯାଉଥିବା ୪୮ ବର୍ଷୀୟ ଆଲେକ୍ସି ନାଭାଲ୍ସିିଙ୍କର ସାଇବେରିଆ ଜେଲ୍ରେ ମୃତ୍ୟୁ ଘଟିବା ପରେ ବିଦେଶୀ ଗଣମାଧ୍ୟମଗୁଡିକ ପୁତିନ୍ଙ୍କୁ ଦାୟୀ କରିଥିଲେ। ରାଷ୍ଟ୍ରପତି ନିର୍ବାଚନରେ ଏହାର କୁପ୍ରଭାବ ପଡିପାରେ ବୋଲି ଆଶଙ୍କା ପ୍ରକାଶ ପାଇଥିଲା। ତେବେ ଟାଣୁଆ ପ୍ରତିଦ୍ବନ୍ଦ୍ବୀଙ୍କ ଅଭାବରୁ ପୁଟିନ ବିପୁଳ ଭୋଟରେ ବିଜୟୀ ହୋଇପାରିଥିଲେ।
Comments are closed.