ପୁରୀ: ମହାପ୍ରଭୁଙ୍କ ରଥ ଉପରେ ଗଜପତି ମହାରାଜା ଶ୍ରୀଦିବ୍ୟସିଂହ ଦେବଙ୍କ ଛେରାପହଁରା ସେବାକୁ ୫୦ବର୍ଷ ପୂର୍ତ୍ତି ହୋଇଛି। ୧୯୫୩ ଜାନୁଆରୀ ୧ତାରିଖରେ ଜନ୍ମ ଗ୍ରହଣ କରିଥିବା ଦିବ୍ୟସିଂହ ଦେବ ୧୯୭୧ରେ ଛେରାପହଁରା ସେବା ଆରମ୍ଭ କରିଥିଲେ। ସେତେବେଳେ ତାଙ୍କୁ ମାତ୍ର ୧୮ବର୍ଷ ବୟସ ହୋଇଥିଲା। ତତ୍କାଳୀନ ଗଜପତି ବୀରକିଶୋର ଦେବଙ୍କ ବିୟୋଗ ପରେ ୧୯୭୦ ଜୁଲାଇ ୭ରେ ସେ ଗାଦିସୀନ ହୋଇଥିଲେ। ଏବେ ତାଙ୍କୁ ୬୮ବର୍ଷ। ସେ ମହାପ୍ରଭୁ ଶ୍ରୀଜଗନ୍ନାଥଙ୍କ ଆଦ୍ୟ ସେବକ। ତାଙ୍କୁ ଠାକୁର ରାଜାବୋଲି ସମ୍ବୋଧନ କରାଯାଏ। ସେ ଲକ୍ଷେ ରାଜାର ମଉଡମଣି। ରଥ ଉପରେ ଛେରାପହଁରା ପୁରୀ ଗଜପତିଙ୍କର ପାରମ୍ପରିକ ଏବଂ ପୁରୁଷାନୁକ୍ରମିକ ସେବା।
ରାଜା ଇନ୍ଦ୍ରଦ୍ୟୁମ୍ନଙ୍କ ସମୟରୁ ରଥଯାତ୍ରାରେ ପୁରୀ ଗଜପତିଙ୍କ ସେବା ପରମ୍ପରା ପ୍ରଚଳିତ ହୋଇ ଆସୁଥିବା ଗବେଷକ ମତ ଦେଉଛନ୍ତି। ଶ୍ରୀଜଗନ୍ନାଥ ମନ୍ଦିର ଆଇନରେ ଥିବା ବ୍ୟବସ୍ଥା ଅନୁଯାୟୀ ଶ୍ରୀମନ୍ଦିର ପରିଚାଳନା କମିଟିର ସ୍ଥାୟୀ ସଭାପତି ଭାବେ ସେ କାର୍ଯ୍ୟ କରୁଛନ୍ତି। ଏ ସମ୍ପର୍କରେ ସେ କୁହନ୍ତି ମହାପ୍ରଭୁ ଶ୍ରୀଜଗନ୍ନାଥ ହେଉଛନ୍ତି ସମଗ୍ର ବିଶ୍ବର ମାଲିକ। ସେ ଯାହା ଚାହଁାନ୍ତି ସେଇଆ ହିଁ ହୁଏ। ଶ୍ରୀଜଗନ୍ନାଥଙ୍କ ନିକଟରେ ପ୍ରଚଳିତ ଗଜପତିଙ୍କ ସେବା ମଧ୍ୟେର ରଥ ଉପରେ ଛେରାପହଁରା ସବୁଠାରୁ ପ୍ରମୁଖ ସେବା। ଗଜପତି ମହାରାଜା ଶ୍ରୀଦିବ୍ୟସିଂହ ଦେବ ଜଣେ ଉଚ୍ଚଶିକ୍ଷିତ, ନମ୍ର ଏବଂ ଉତ୍ସର୍ଗୀକୃତ ବ୍ୟକ୍ତି। ମହାପ୍ରଭୁ ଶ୍ରୀଜଗନ୍ନାଥଙ୍କ ସେବାକୁ ସବୁବେଳେ ସେ ପ୍ରାଥମିକତା ଦେଇ ଆସିଛନ୍ତି। ଶ୍ରୀମନ୍ଦିର ପରିଚାଳନାରେ ତାଙ୍କର ଗୁରୁତ୍ବପୂର୍ଣ୍ଣ ଭୂମିକା ରହି ଆସିଛି।
Comments are closed.