ଲଡୁଗାଁ : କୋକସରା ବ୍ଲକର କାଉଡୋଳା ସରାବୁପଡ଼ା ଠାରୁ ବୋବରିଆକୁ ସଂଯୋଗ ହୋଇଥିବା ପିଚୁ ରାସ୍ତାର ଅବସ୍ଥା ମରାମତି ପରେ ପୁଣି ଶୋଚନୀୟ ହୋଇପଡ଼ିଛି । ପିଚୁ କାମ ଶେଷ ହୋଇ ଦେଢ଼ ଦୁଇ ମାସ ନପୁରୁଣୁ ରାସ୍ତା ଉପରୁ ପିଚୁ ଉଠିଯାଉଥିବା ଓ ଫାଟି ଆଁ କରିଥିବା ଦେଖିବାକୁ ମିଳିଛି । ଫଳରେ ଏହି ରାସ୍ତାରେ ଯାତାୟତ କରୁଥିବା କାଉଡୋଳାଠାରୁ ଆରମ୍ଭ କରି ଟେମରା, ମାଝୀଗୁଡା, ଡେଙ୍ଗାଗୁଡା, ମହିମା ଓ ବେହେରା ଅଞ୍ଚଳର ଲୋକମାନଙ୍କ ମଧ୍ୟରେ ଅଶାନ୍ତି ଦାନା ବାନ୍ଧୁଛି । ସାଧାରଣତଃ ରାସ୍ତା ନିର୍ମାଣରେ ମାଟି, ମୋରମ, ମେଟାଲ ପଥର ଗୁଣ୍ଡ, ଦେଇ ପିଚୁ କରାଯାଏ । ହେଲେ ଏହି ରାସ୍ତାରେ କେବଳ ପଥର ଗୁଣ୍ଡ ଦେଇ ପୋଡା ପିଚୁ ଢାଳି ଦେଇ ଥିବା ସ୍ଥାନୀୟ ଲୋକମାନେ ଅଭିଯୋଗ କରିଛନ୍ତି । ଯାହାଦ୍ବାରା ନିର୍ମାଣର ଦୁଇ ମାସ ନ ପୁରୁଣୁ ଅତି ନିମ୍ନମାନର କାର୍ଯ୍ୟ ହେତୁ ରାସ୍ତାର ବିଭିନ୍ନ ସ୍ଥାନରେ ପିଚୁ ଉଠି ପଡୁଛି । ଗ୍ରାମ୍ୟ ଉନ୍ନୟନ ମନ୍ତ୍ରାଳୟ ଅନୁଦାନରୁ ୪୨୧, ୩୭ ଲକ୍ଷ ଟଙ୍କା ମରାମତି କାମ ଗ୍ରାମ୍ୟ ଉନ୍ନୟନ ବିଭାଗ ଧର୍ମଗଡ଼ ଦ୍ଵାରାଆନନ୍ଦ କୁମାର ଅଗ୍ରୱାଲ ନାମକ ସ୍ଵତନ୍ତ୍ର ଶ୍ରେଣୀ ଠିକାଦାରକୁ ଦିଆଯାଇଛି । ଲୋକଙ୍କ ଅଭିଯୋଗକୁ ବିଭାଗ ଗୁରୁତ୍ବର ସହ ନେଇ ରାସ୍ତାକାମର ତଦନ୍ତ କଲେ ପ୍ରକୃତ ସତ୍ୟାସତ ସାମ୍ନାକୁ ଆସିପାରିବ । ରାସ୍ତା ପୁନଃ ନିର୍ମାଣ ନକଲେ ଆନ୍ଦୋଳନ କରିବେ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ ।
Comments are closed.