ପାଟଣା : କେନ୍ଦୁଝର ଜିଲ୍ଲା ସାହାରପଡା ବ୍ଲକ ଅନ୍ତର୍ଗତ ଖଜିରାପାଟ ପଞ୍ଚାୟତର ପଡିଆପଶି ଗ୍ରାମରେ ମନରେଗା ଯୋଜନାରେ ଅନିୟମିତତା ଧରାପଡିଛି । ଏ ନେଇ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଇବା ପରେ ଜିଲ୍ଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ତଥା ନିର୍ବାହୀ ଅଧିକାରୀ କୁମାର ନାଗଭୂଷଣ ଘଟଣାର ଯାଞ୍ଚ କରିବାକୁ ମନରେଗା ଲୋକପାଳଙ୍କୁ ଚିଠି କରିଥିଲେ । ମନରେଗା ଲୋକପାଳ ବୃଷଭ ଚନ୍ଦ୍ର ନାୟକ କ୍ଷେତ୍ର ପରିଦର୍ଶନ କରିବା ପରେ ଏହି ଘଟଣା ଲୋକଲୋଚନକୁ ଆସିଛି । ପଡିଆପଶି କାଜୁ ଜଙ୍ଗଲଠାରୁ ଡଙ୍ଗାଘାଟ ପର୍ଯ୍ୟନ୍ତ ଏକ ରାସ୍ତା କାମ ୨୦୧୯-୨୦୨୦ ଆର୍ଥିକ ବର୍ଷରେ ୧୦ ଲକ୍ଷ ଟଙ୍କା ବ୍ୟୟ ଅଟକଳରେ କରାଯାଇଥିଲା । ମନରେଗା କୋର୍ଡ ନମ୍ବର ୨୪୦୩୦୦୫୦୧୦/ଆରସି/୧୦୩୮୮୭୧୦ ରେ ମୋଟ ୯ ଲକ୍ଷ ୩୦ ହଜାର ୧୮୩ ଟଙ୍କା ଖର୍ଚ୍ଚ ହୋଇଥିଲା । ମ୍ୟାଟେରିଆଲ ବାବଦରେ ୪ଲକ୍ଷ ୧୮ ହଜାର ୧୨୪ ଟଙ୍କା ଏବଂ ଶ୍ରମିକ ମଜୁରୀ ବାବଦ ୪ ଲକ୍ଷ ୮୯ ହଜାର ୨୮୦ ଟଙ୍କା ପ୍ରଦାନ କରାଯାଇଥିଲା ।
ଏହି ରାସ୍ତାକୁ ଜନସାଧାରଣ ବ୍ୟବହାର କରୁନଥିବାବେଳେ ରାସ୍ତାଟି ଗମନାଗମନ ଉପଯୋଗୀ ଥିଲା । ଏବେ ଏହି ରାସ୍ତାକୁ ପୁଣି ମନରେଗା ଯୋଜନାରେ କରିବା ପାଇଁ ଏକ ସୂଚନା ଫଳକ ଲାଗିବା ପରେ ସ୍ଥାନୀୟ ଲୋକଙ୍କ ସନ୍ଦେହ ହେବାରୁ ଲୋକପାଳଙ୍କ ନିକଟରେ ଅଭିଯୋଗ କରିଥିଲେ । ତଦନ୍ତ ବେଳେ ୨୦୨୨-୨୦୨୩ ଆର୍ଥିକ ବର୍ଷରେ ପୁଣି ଉକ୍ତ ରାସ୍ତାକୁ ନିର୍ମାଣ ପାଇଁ ୮ଲକ୍ଷ ଟଙ୍କା ବ୍ୟୟ ଅଟକଳ କରାଯାଇଥିଲା ଏବଂ ଉକ୍ତ କାମକୁ ୨୦୨୫ ମସିହା ଏପ୍ରିଲ ମାସରେ ସୂଚନା ଫଳକରେ ଲେଖାଯାଇଥିଲା । ରାସ୍ତାଟି ଲୋକଙ୍କ କାମରେ ଲାଗୁ ନଥିବାବେଳେ ମନ୍ଦ ଉଦ୍ଦେଶ୍ୟ ରଖି ଭଲ ରାସ୍ତାରେ ପୁଣି ରାସ୍ତା କାମ ପାଇଁ ଯୋଜନା କରାଯାଇଥିଲା । ଉକ୍ତ ରାସ୍ତା ଉପରେ ପୂର୍ବରୁ କଲର୍ଭଟ ଏବଂ ଗାର୍ଡୱାଲ ଥିବାବେଳେ ପୁଣି ଆଉ ଥରେ କରିବା ପାଇଁ ମନରେଗାରେ ମଞ୍ଜୁର ହୋଇଥିଲା । ମନରେଗା ଅର୍ଥ ଲୁଟ ଉଦ୍ଦେଶ୍ୟରେ ଏହା କରାଯାଇଥିବା ସ୍ପଷ୍ଟ ହେବା ପରେ ଦୋଷୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହୋଇଛି । କାମ ଏଷ୍ଟିମେଟ ହେବା ପୂର୍ବରୁ ଉକ୍ତ ପଞ୍ଚାୟତର ଦାୟିତ୍ୱରେ ଥିବା ପୂର୍ବତନ କନିଷ୍ଠ ଯନ୍ତ୍ରୀ ,ପିଇଓ ,ଏଡିଇଓ କିପରି କ୍ଷେତ୍ର ପରିଦର୍ଶନ ନକରି ରାସ୍ତା କାମ ପାଇଁ ଆବଶ୍ୟକତା ରହିଛି ବୋଲି ବିଡିଓ ଙ୍କୁ ଜଣାଇଥିଲେ ବୋଲି ସୂଚନା ମିଳିଛି।
