କେନ୍ଦୁଝରଗଡ଼: ଦଳ ବିରୋଧୀ ଆଚରଣ ଓ ଦଳୀୟ ନେତୃବୃନ୍ଦଙ୍କ ବିରୋଧରେ ଅପପ୍ରଚାର ପାଇଁ ରାଜ୍ୟ ବିଜେପି ସଭାପତି ସମୀର ମହାନ୍ତି କେନ୍ଦୁଝର ଜିଲା ଚମ୍ପୁଆ ବିଧାନସଭାକ୍ଷେତ୍ରର ୩ଜଣ ଦଳୀୟ ନେତାଙ୍କୁ ସୋମବାର ଚିଠି ନଂ ଏଲଡି୪୪/୨୩ ଯୋଗେ ପ୍ରାଥମିକ ସଦସ୍ୟ ପଦରୁ ନିଲମ୍ବନ ଆଦେଶ କରିଛନ୍ତି। ଏଥିସହ ନିଲମ୍ବନ ଆଦେଶ ପାଇବା ୭ଦିନ ମଧ୍ୟରେ ସେମାନଙ୍କ ବିରୋଧରେ ଦଳ ପକ୍ଷରୁ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ କାହିଁକି ଗ୍ରହଣ କରାନଯିବ ସେ ସମ୍ପର୍କରେ ରାଜ୍ୟକୁ ଉତ୍ତର ଦେବାକୁ କୁହାଯାଇଛି। ଦଳରୁ ନିଲମ୍ବନ ହୋଇଥିବା ନେତାମାନେ ହେଲେ ଜିଲା କାର୍ଯ୍ୟକାରିଣୀ ସଦସ୍ୟ ଶ୍ରୀମନ୍ତ ତ୍ରିପାଠୀ, ଚମ୍ପୁଆ ଗ୍ରାମୀଣ ମଣ୍ଡଳ ସାଧାରଣ ସମ୍ପାଦକ ଜର୍ମାନ ମହାନ୍ତ ଓ ବାମେବାରୀ ମଣ୍ଡଳ ସଭାପତି ଗଣେଶ୍ୱର ପାତ୍ର। ନିଲମ୍ବନ ହୋଇଥିବା ଏହି ୩ ନେତା ଚମ୍ପୁଆ ବିଧାନସଭା କ୍ଷେତ୍ରରେ କେତେଜଣ ଦଳୀୟ କାର୍ଯ୍ୟକର୍ତ୍ତାଙ୍କୁ ନିଜ ସପକ୍ଷରେ ପ୍ରବର୍ତ୍ତାଇବା ସହ ସାମାଜିକ ଗଣମାଧ୍ୟମରେ ଦଳ ତଥା ଦଳୀୟ ନେତୃବୃନ୍ଦଙ୍କ ବିରୋଧରେ ଅପପ୍ରଚାର କରିଆସୁଥିବା ଅଭିଯୋଗ ପ୍ରମାଣିତ ହେବାପରେ ଦଳର ଶୃଙ୍ଖଳା କମିଟି ରିପୋର୍ଟକୁ ଆଧାର କରି ଉପରୋକ୍ତ ୩ ନେତାଙ୍କୁ ଦଳର ପ୍ରାଥମିକ ସଦସ୍ୟ ପଦରୁ ନିଲମ୍ବିତ କରାଯାଇଥିବା ଆଦେଶପତ୍ରରେ ଉଲ୍ଲେଖ କରାଯାଇଛି। ସେହିଭଳି ଏହି ୩ ନେତା କେତେକ ବିଶୃଙ୍ଖଳିତ କାର୍ଯ୍ୟକର୍ତ୍ତାଙ୍କ ସହାୟତାରେ ଦଳୀୟ କାର୍ଯ୍ୟକର୍ତ୍ତା ଏପରିକି ମହିଳା କାର୍ଯ୍ୟକର୍ତ୍ତାଙ୍କୁ ମଧ୍ୟ ଦୁର୍ବବ୍ୟବହାର କରିବା ଭଳି ଦଳୀୟ ଅସାମ୍ବିଧାନିକ କାର୍ଯ୍ୟ ଦ୍ୱାରା ସାଧାରଣରେ ଦଳର ସମ୍ମାନ କ୍ଷୁର୍ଣ୍ଣ ହେଉଥିବାରୁ ଦଳର ପ୍ରାଥମିକ ସଦସ୍ୟ ପଦରୁ ନିଲମ୍ବନ କରାଯାଇଥିବା ଜଣାପଡ଼ିଛି।
Popular Categories
Previous article
Next article