ଆଠଗଡ: ଆଠଗଡର ବରିଷ୍ଠ ବିଜେପି ନେତା ତଥା ପୂର୍ବତନ ବିଧାୟକ ପ୍ରାର୍ଥୀ ବ୍ରଜେନ୍ଦ୍ର କୁମାର ରାୟ ବିଜେପିର ରାଷ୍ଟ୍ରୀୟ ପରିଷଦ ସଦସ୍ୟ ଭାବେ ନିର୍ବାଚିତ ହୋଇଥିବା ଜଣାପଡିଛି। ଗତ ୭ ତାରିଖରେ ଭୁବନେଶ୍ଵରରେ ଅନୁଷ୍ଠିତ ଦଳର ସାଂଗଠନିକ ନିର୍ବାଚନରେ ଓଡିଶାରୁ ଦଳର ମୋଟ ୩୨ ଜଣ ବରିଷ୍ଠ ତଥା ଅଭିଜ୍ଞ ନେତା ଅପ୍ରତିଦ୍ୱନ୍ଦୀ ଭାବେ ରାଷ୍ଟ୍ରୀୟ ପରିଷଦକୁ ନିର୍ବାଚିତ ହୋଇଥିବା ବିଜେପିର ରାଷ୍ଟ୍ରୀୟ ପର୍ଯ୍ୟବେକ୍ଷକ ଡ.ସଞ୍ଜୟ ଜୟସ୍ୱାଲ୍ ଘୋଷଣା କରିଥିଲେ। ବିଜେପିର ମର୍ଯ୍ୟାଦାଜନକ ରାଷ୍ଟ୍ରୀୟ ପରିଷଦକୁ ଓଡିଶାରୁ ନିର୍ବାଚିତ ୩୨ ଜଣଙ୍କ ମଧ୍ୟରେ କେତେକ ବିଧାୟକ, ସାଂସଦ, ପୂର୍ବତନ ବିଧାୟକ ଏବଂ ବହୁ ବରିଷ୍ଠ ନେତା ନିର୍ଦ୍ୱନ୍ଦରେ ନିର୍ବାଚିତ ହୋଇଛନ୍ତି।
ଆଠଗଡର ବରିଷ୍ଠ ନେତା ଶ୍ରୀ ରାୟ ଦୀର୍ଘ ଦିନ ଧରି ଦଳର ରାଜ୍ୟ କାର୍ଯ୍ୟକାରିଣୀ ସଦସ୍ୟ ଭାବେ ଦାଇତ୍ୱ ନିର୍ବାହ କରି ଦଳର ସଂଗଠନକୁ ମଜବୁତ କରିଛନ୍ତି। କଟକ ଲୋକସଭା ନିର୍ବାଚନ ମଣ୍ଡଳୀରୁ ଏକମାତ୍ର ନେତା ଭାବେ ବିଜେପି ରାଷ୍ଟ୍ରୀୟ ପରିଷଦକୁ ନିର୍ବାଚିତ ହୋଇଥିବା ଶ୍ରୀ ରାୟଙ୍କୁ ରାଜ୍ୟ ତଥା କଟକ ଜିଲା ଏବଂ ଆଠଗଡର ବହୁ ଦଳୀୟ ନେତା ଓ କାର୍ଯ୍ୟକର୍ତ୍ତା ଅଭିନନ୍ଦନ ଓ ଶୁଭେଚ୍ଛା ଜଣାଇଛନ୍ତି।
