ରଣପୁରଗଡ: ରାଜ୍ୟ ଅବକାରୀ ବିଭାଗ ତରଫରୁ ଗତ ମେ’ ୩୧ରୁ ଆରମ୍ଭ ହୋଇଥିବା ରାଜ୍ୟବ୍ୟାପୀ ସଚେତନତା କାର୍ଯ୍ୟକ୍ରମ ‘ଆମ ସଂକଳ୍ପ ନିଶା ନୁହେଁ, ଜୀବନ’ ଜୁନ୍ ୨୬ ତାରିଖ ଯାଏଁ ଚାଲିବ। ସେହି ପରିପ୍ରେକ୍ଷୀରେ ନୟାଗଡ଼ ଜିଲ୍ଲା ରଣପୁର ଅବକାରୀ ଥାନା ତରଫରୁ ମଙ୍ଗଳବାର ବ୍ରଜରାଜପୁର ଗ୍ରାମ ପଞ୍ଚାୟତ ମିଶନ ଶକ୍ତି ମହିଳା ମାନଙ୍କ ଦ୍ୱାରା ସଚେତନତା ଶୋଭାଯାତ୍ରା କରାଯାଇଥିଲା। ଗ୍ରାମ ପଞ୍ଚାୟତରୁ ବାହାରି ଶୋଭାଯାତ୍ରା ବଜାର ପରିକ୍ରମା କରିଥିଲେ। ବିଭିନ୍ନ ମାଦକ ତଥା ନିଶାଦ୍ରବ୍ୟ ବ୍ୟବହାରକୁ ପରିଣାମ ଲୋକଙ୍କୁ ଅବଗତ କରିବା ସହିତ ଅପମିଶ୍ରିତ, ବିଷାକ୍ତ ଓ ଚୋରା ମଦ କାରବାର ରୋକିବା ଲାଗି ସଂକଳ୍ପ ଏକ ବଳିଷ୍ଠ ପଦକ୍ଷେପ ବୋଲି ସଚେତନ ବାର୍ତ୍ତା ପ୍ରଚାର କରିଥିଲେ।
ଏମବିକେ କବିତା ବେହେରା, ସିଆରପି ନିରୁପମା ଆଚାର୍ଯ୍ୟ, ହରପ୍ରିୟା ସାମନ୍ତରାୟ ଓ ପ୍ରଭାସିନୀ ପ୍ରଧାନ, ପି ଏମ୍ ମୀନାକ୍ଷୀ ପଟ୍ଟନାୟକ, କେ ଏମ୍ ଅଞ୍ଜଳି ବେହେରା, ସବିତା ସ୍ବାଇଁ, ବାଟ ମଙ୍ଗଳା, ବାବା ଚନ୍ଦ୍ରଶେଖର ସ୍ୱୟଂ ସହାୟକ ଗୋଷ୍ଠୀ, ହେମଲତା ଯେନା ଓ ବେବୀ ମଣ୍ଡଳ ଆଦି ୫୦ରୁ ଉର୍ଦ୍ଧ୍ବ ମହିଳା ଶୋଭାଯାତ୍ରାରେ ଅଂଶ ଗ୍ରହଣ କରିଥିଲେ। ରଣପୁର ଅବକାରୀ ଥାନା ଉପନିରୀକ୍ଷକ ଅର୍ପିତାରାଣୀ ସାହୁ, ଅତିରିକ୍ତ ଉପ ନିରୀକ୍ଷକ ନିର୍ମଳ କୁମାର ବେହେରା, କନେଷ୍ଟବଳ ବିକାଶ, ଅନିଲ ଓ ରମ୍ଭା ରାଉତ ଯୋଗ ଦେଇଥିଲେ।
