ସମ୍ବଲପୁର: ସମ୍ବଲପୁର ଜିଲା ମୁଖ୍ୟ ଚିକିତ୍ସାଳୟ ଠାରେ ରୋଗୀଙ୍କ ଠାରୁ ଟଙ୍କା ନେବାର ଅଭିଯୋଗ ଜିଲାପାଳ ଓ ଜିଲା ମୁଖ୍ୟ ଚିକିତ୍ସାଧିକାରୀଙ୍କ ନିକଟରେ ଶୁକ୍ରବାର ହୋଇଛି। ସ୍ଥାନୀୟ ମୁଦିପଡ଼ା କୁଲିତାପଡ଼ା ନିବାସୀ ସୁଦୀପ୍ତ କୁମାର ପଣ୍ଡା ତାଙ୍କର ଶ୍ୱଶୁର ସତ୍ୟନାରାୟଣ ମିଶ୍ର (୫୯) ଙ୍କର ଆଖି (କ୍ୟାଟ୍ରାକ୍ଟ) ଅସ୍ତ୍ରୋପଚାର ପାଇଁ ଗତ ୧୪ ତାରିଖରେ ଜିଲା ମୁଖ୍ୟ ଚିକିତ୍ସାଳୟକୁ ଯାଇଥିଲେ। ସେହି ଦିନ ରୋଗୀଙ୍କ ଅସ୍ତ୍ରୋପଚାର କରାଯାଇଥିବା ବେଳେ ଅସ୍ତ୍ରୋପଚାର ପୁର୍ବରୁ ସେଠାରେ ଥିବା ଜଣେ ଆଟେଣ୍ଡାନ୍ଟ ତାଙ୍କୁ ୫ ହଜାର ଟଙ୍କା ଦେଲେ, ସେମାନେ ଉଚ୍ଚ କ୍ଷମତା ବିଶିଷ୍ଟ ଲେନ୍ସ ଆଖିରେ ଲଗାଇବେ ବୋଲି କହିଥିଲେ। ଏଣୁ ଉକ୍ତ ଆଟେଣ୍ଡାନ୍ଟ ଓ ସାଥିରେ ଥିବା ନର୍ସଙ୍କୁ ୫ ହଜାର ଟଙ୍କା ପ୍ରଦାନ କରାଯାଇଥିଲା। ତେବେ ସରକାରଙ୍କ ତରଫରୁ ଡାକ୍ତରଖାନାରେ ମାଗଣାରେ ଅସ୍ତ୍ରୋପଚାର ଓ ସାମଗ୍ରୀ ଦିଆଯାଉଥିବାରୁ ଅସ୍ତ୍ରୋପଚାର ପରେ ଦିଆଯାଇଥିବା ଟଙ୍କା ରସିଦ ମଗଯିବାରୁ ଅସ୍ତ୍ରୋପଚାର କରିଥିବା ଡାକ୍ତର, ଆଟେଣ୍ଡାନ୍ଟ ଓ ନର୍ସ ସିଧାସଳଖ ମନା କରିବା ସହିତ ଯୁକ୍ତିତର୍କ କରିଥିଲେ ଏବଂ ରସିଦ ପ୍ରଦାନ କରି ନ ଥିଲେ। ଏଣୁ ଡାକ୍ତରଖାନାରେ ଏକ ବଡ ଧରଣର ସ୍କାମ ଚାଲିଥିବା ଶ୍ରୀ ପଣ୍ଡା ଜିଲାପାଳ ଓ ମୁଖ୍ୟ ଚିକିତ୍ସାଧିକାରୀଙ୍କ ନିକଟରେ ଅଭିଯୋଗ କରିଛନ୍ତି।
Comments are closed.