ପାଟଣା: ବାତ୍ୟା ଦାନା ପ୍ରଭାବରେ ସାହାରପଡା, ପାଟଣା ଓ ଢେଙ୍କିକୋଟ ଅଞ୍ଚଳରେ ବର୍ଷା ଓ ପବନ ମାଡରେ ଶହ ଶହ ହେକ୍ଟର ଚାଷ ଜମିରେ ପାଚିଲା ଧାନ ପାଣିରେ ଶୋଇ ପଡ଼ିଛି। ପାଚିଲା ଧାନ ଏବେ ପାଣିରେ ବୁଡ଼ି ଥିବାରୁ ବ୍ୟାପକ ଫସଲ ନଷ୍ଟ ହୋଇଛି। ଏଥି ସହିତ ବାତ୍ୟା ଦାନାର ପ୍ରଭାବରେ ବର୍ଷା ଯୋଗୁଁ ଦାମାହୁଦା ପଞ୍ଚାୟତର ଗୋଜାପଥର ଗାଁର ହୃଷୀକେଶ ମହାନ୍ତ, ଦିନବନ୍ଧୁ ମହାନ୍ତ, ଗୋଦାବରୀ ମହାନ୍ତ, ବିଣାମଜୁରୀ ମହାନ୍ତ ଓ ଅନାମ ଲୋହାର କୃଷି ଋଣ ଓ ଧାର କରଜ କରି ପ୍ରାୟ ୧୦ ହେକ୍ଟର ଜମିରେ ଧାନ ଚାଷ କରିଥିଲେ ହେଲେ ବାତ୍ୟା ଦାନା ଉଜାଡି ଦେଇଛି ତାଙ୍କ ସୁନାର ଫସଲକୁ। କ୍ଷେତ ପାଣିରେ ବୁଡି ଯାଇଥିବା ଧାନକୁ ଚାଷୀ କେମିତି ଯେ ଅମଳ କରିବ ଚିନ୍ତା କରିପାରୁନାହାଁନ୍ତି। ଏହାସହ ଖଡିକାପଦା, ଡାଳପକା, ରାଇଡିହା, ମାଛଗଡ଼, କୁଣ୍ଡଳା, ତେଣ୍ଡରା , ବଡ଼ବିଲ ,ଗୋରାସ ଆଦି ପଞ୍ଚାୟତର ବିଭିନ୍ନ ଅଞ୍ଚଳରେ ଏକର ଏକର ଧାନ ଗଛ ବିଲ କାଦୁଅରେ ଶୋଇ ପଡ଼ି ରହିଥିବାରୁ ନଷ୍ଟ ହେବାର ସମ୍ଭାବନା ରହିଛି। ଫଳରେ ଚିନ୍ତାରେ ପଡ଼ିଯାଇଛନ୍ତି ଚାଷୀକୁଳ।ସେପଟେ ବାତ୍ୟା ପାଇଁ କୃଷି ବିଭାଗକୁ ସମସ୍ତ ପଞ୍ଚୟାତ ପରିଦର୍ଶନ ସହିତ ଆକଳନ କରି ତୁରନ୍ତ ରିପୋର୍ଟ ଦେବାକୁ ସରକାର ନିର୍ଦ୍ଦେଶ ଦେଇଥିଲେ ମଧ୍ୟ ବର୍ଷା ଛାଡ଼ିନଥିବାରୁ ସାହାରପଡା କୃଷି ଅଧିକାରୀ ଏହାର ତଦନ୍ତ କରିନାହାନ୍ତି। ଖୁବଶୀଘ୍ର କୃଷି ବିଭାଗ ପକ୍ଷରୁ ସାହାରପଡ଼ା, ପାଟଣା ଓ ଢେଙ୍କିକୋଟ ଅଞ୍ଚଳର ଧାନ ଚାଷର କ୍ଷୟକ୍ଷତି ଆକଳନ କରି କ୍ଷତିଗ୍ରସ୍ତଙ୍କୁ ସରକାରୀ ସହାୟତା ଯୋଗାଇ ଦେବାକୁ ଚାଷୀମାନେ ଦାବି ଜଣାଇଛନ୍ତି।
Comments are closed.