ସମ୍ବଲପୁର: ସମ୍ବଲପୁର ଦେଇ ଯାଇଥିବା ମହାନଦୀ ଗର୍ଭରେ ୨ ଜଣ ନାବାଳକ ବୁଡି ନିଖୋଜ ହୋଇ ଯାଇଥିବାର ଖବର ମିଳିଛି। ପୁଲିସ ଓ ଅଗ୍ନିଶମ ବିଭାଗର ସୂଚନାନୁଯାୟୀ, ସ୍ଥାନୀୟ କ୍ଷେତରାଜପୁର ଥାନା ଅନ୍ତର୍ଗତ ତିୱାରୀଗଳି ନିବାସୀ ହିମାଂଶୁ ଓ ଏ. କନିଷ୍କ ନାମକ ଦୁଇ ଜଣ ନାବାଳକ ଶୁକ୍ରବାର ଅପରାହ୍ନ ପ୍ରାୟ ୪ଟା ସମୟରେ ସ୍ଥାନୀୟ ରିଂ ରୋଡ ସ୍ଥିତ ସଡକ ଘାଟ ନିକଟରେ ମହାନଦୀ ମଧ୍ୟକୁ ଗାଧୋଇବା ପାଇଁ ଯାଇଥିଲେ। ତେବେ ସେମାନରେ ନଦୀର ଖରସ୍ରୋତ ମଧ୍ୟରେ ଅଚାନକ ନିଜର ଭାରସାମ୍ୟ ହରାଇ ପାଣିରେ ବୁଡି ଯାଇଥିଲେ। ନିକଟରେ ମାଛ ମାରୁଥିବା କିଛି ଧିବର ସେମାନଙ୍କୁ ଊର୍ଦ୍ଧ୍ବାର କରିବା ପାଇଁ ଚେଷ୍ଟା କରିଥିବା ବେଳେ କିନ୍ତୁ ସେମାନେ ନଦୀର ସ୍ରୋତରେ ଭାସି ଯାଇଥିଲେ। ଏଣୁ ତୁରନ୍ତ ସ୍ଥାନୀୟ ଲୋକଙ୍କ ସାହାଯ୍ୟରେ ଅଗ୍ନିଶମ ଓ ପୁଲିସକୁ ଖବର ଦିଆଯାଇଥିଲା।
ଅଗ୍ନିଶମ ଅଧିକାରୀ ସୁଦାମ କିସକୁଙ୍କ ଅନୁଯାୟୀ, ସେମାନଙ୍କ ନିକଟକୁ ପ୍ରାୟ ୫ଟାରେ ଖବର ଆସିବା ପରେ ତୁରନ୍ତ ସମ୍ବଲପୁର ଅଗ୍ନିଶମ ଦଳ ଓ ମାନେଶ୍ୱର ଠାରେ ଥିବା ଅଗ୍ନିଶମ ଦଳ ସମେତ ସମୁଦାୟ ୨ଟି ଦଳ ତୁରନ୍ତ ମହାନଦୀ ମଧ୍ୟରେ ନିଖୋଜ ନାବାଳକ ମାନଙ୍କୁ ଖୋଜିବା ଆରମ୍ଭ କରିଛନ୍ତି। ୨ଟି ଦଳରେ ୧୬ ଜଣ ଅଗ୍ନିଶମ କର୍ମଚାରୀ ଓ ଅଧିକାରୀ ସାମିଲ ହୋଇ ନିଖୋଜ ନାବାଳକ ମାନଙ୍କୁ ମହାନଦୀ ମଧ୍ୟରେ ଖୋଜୁଛନ୍ତି ବୋଲି ଅଗ୍ନିଶମ ଅଧିକାରୀ ଶ୍ରୀ କିସକୁ କହିଛନ୍ତି। ଇତି ମଧ୍ୟରେ ଓଡ୍ରାଫ୍ଟ ଦଳ ମଧ୍ୟ ଘଟଣାସ୍ଥଳରେ ପହଞ୍ଚି ସେମାନେ ମଧ୍ୟ ଖୋଜିବା ଆରମ୍ଭ କରିଛନ୍ତି। ଅଞ୍ଚଳରେ ଚାଲିଥିବା ସୂଚନାନୁଯାୟୀ, ୩ ଜଣ ସାଙ୍ଗ ମହାନଦୀ ପଠାକୁ ବୁଲି ଯାଇଥିବା ବେଳେ ନିଖୋଜ ହୋଇଥିବା ନାବାଳକ ଦ୍ୱୟ ଗାଧୋଇବା ପାଇଁ କହିଥିଲେ। ତେବେ ତୃତୀୟ ନାବାଳକ ଗାଧୋଇବା ପାଇଁ ମନା କରିଥିବା ବେଳେ ସେମାନେ ତାର କଥା ନ ମାନି ନଦୀ ମଧ୍ୟକୁ ଗାଧୋଇବା ପାଇଁ ଚାଲି ଯାଇ ନିଖୋଜ ହୋଇ ଯାଇଥିଲେ। ନିଖୋଜ ହୋଇଥିବା ନାବାଳକ ଦ୍ୱୟଙ୍କ ଆନୁମାନିକ ବୟସ ପ୍ରାୟ ୧୪ ବର୍ଷ ହୋଇଥିବା ବେଳେ ସେମାନେ ନବମ ଶ୍ରେଣୀର ଛାତ୍ର ବୋଲି ଜଣାପଡ଼ିଛି।
Comments are closed.