ଲଡୁଗାଁ: କଳାହାଣ୍ଡି ଜିଲ୍ଲା କୋକସରା ବ୍ଲକ ୨୬ ନମ୍ବର ଜାତୀୟ ରାଜପଥ ଠାରୁ ଆର୍ ଆଇ ଅଫିସ୍ ଦେଇ ସିର୍ଲିଗୁଡା ଯିବା ରାସ୍ତା ସଂଯୋଗ କରୁଥିବା କଲୋନୀ ପଡ଼ା ନିକଟେ ବିପଦ ସଙ୍କୁଳ ଅବସ୍ଥାରେ ବିଦ୍ୟୁତ ଖୁଣ୍ଟ ରହିଛି। ପ୍ରାୟ ଦୁଇମାସ ତଳେ କାଳବୈଶାଖୀରେ ଏହି ଖୁଣ୍ଟ ନଇଁ ପଡିଥିବା ଅବସ୍ଥାରେ ରହିଥିବା ବେଳେ ବିଦ୍ୟୁତ୍ ସରବରାହ ଚାଲୁ ରହିଛି। ବିଦ୍ୟୁତ ବିଭାଗର ଖାମଖିଆଲି ନୀତି ଯୋଗୁଁ ଏଭଳି ବିପଦପୂର୍ଣ୍ଣ ଅବସ୍ଥାରେ ଏହି ରାସ୍ତା ଦେଇ ଲୋକେ ଯିବା ଆସିବା କରୁଛନ୍ତି। କୌଣସି ସ୍ଥାନରେ ଦୁର୍ଘଟଣା ନ ଘଟିବା ପର୍ଯ୍ୟନ୍ତ ବିଭାଗୀୟ ଅଧିକାରୀଙ୍କ ଚେତା ପଶିବ ନାହିଁ। ସ୍କୁଲ୍ ଛାତ୍ରଛାତ୍ରୀ ଓ ଶହ ଶହ ସଂଖ୍ୟାରେ ଲୋକ ପ୍ରତିଦିନ ଏହି ବିଦ୍ୟୁତ୍ ଖୁଣ୍ଟ ତଳ ଦେଇ ଯାତାୟତ କରିଥାନ୍ତି। ଖୁଣ୍ଟ ମରାମତି ନହେଲେ ଧନ ଜୀବନ ହାନିର ଆଶଙ୍କା ରହିଛି। ସେହିପରି କୋକସରାରୁ ଝରିଆଗୁଡ଼ା ଯିବା ବାଟ ସରସ୍ଵତୀ ଶିଶୁ ବିଦ୍ୟା ମନ୍ଦିର ପାଖ ଚାଷ ଜମିରେ ମଧ୍ୟ ପାଖାପାଖି ଦୁଇମାସ ହେବ ବିଦ୍ୟୁତ ଖୁଣ୍ଟ ପଡ଼ିରହିଛି। କେବଳ ବିଦ୍ୟୁତ ସରବରାହ ବିଚ୍ଛିନ୍ନ କରି ବିଭାଗ କିନ୍ତୁ ଏଠି ନୀରବ। ଏହିଭଳି ସମ୍ବେଦନଶୀଳ ଘଟଣାକୁ ମାସ ମାସ ବିତିଯାଇଥିଲେ ହେଁ ଟିପିଡବ୍ଲୁଡିଏଲ୍ ତୁରନ୍ତ ମରାମତି ନ କରି ଅବହେଳା କରିବା ତାର କାର୍ଯ୍ୟ ଦକ୍ଷତା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି। ଏ ସମ୍ପର୍କରେ ଟିପିଡବ୍ଲୁଡିଏଲ୍ ବିଭାଗୀୟ ଯନ୍ତ୍ରୀ ବ୍ରଜମୋହନ ଦଳେଇ ସହ ଯୋଗାଯୋଗ କରିବାରୁ ଆମେ ଖୁବ ଶୀଘ୍ର ଏହାର ମରାମତି କରିବୁ ବୋଲି କହିଥିଲେ।
Comments are closed.