ଆଠଗଡ଼: ଆଠଗଡ଼ର ନିର୍ବାଚନ ମଣ୍ଡଳୀରେ ପ୍ରତିଦ୍ୱନ୍ଦିତା କରୁଥିବା ଆମ୍ ଆଦମୀ ପାର୍ଟିର ପ୍ରାର୍ଥୀ ଇଂ ଦେବୀ ପ୍ରସାଦ ମହାପାତ୍ର ନିଜର ସମର୍ଥକ ଓ ରାଜ୍ୟସ୍ତରୀୟ ନେତାମାନଙ୍କୁ ନେଇ ରୋଡ ସୋ କରିବା ସହିତ ବିଭିନ୍ନ ସ୍ଥାନରେ ପଥପ୍ରାନ୍ତ ସଭା ମାଧ୍ୟମରେ ଭୋଟ ଭିକ୍ଷା କରିଥିଲେ। ଆଠଗଡ଼ ସହରର ରଥଗଡ଼ା ଛକଠାରୁ ବାହାରି ମୁଖ୍ୟରାସ୍ତା ଓ ବିଭିନ୍ନ ସାହି ବସ୍ତିରେ ଶୋଭାଯାତ୍ରା ପରିକ୍ରମା କରିବା ସମୟରେ ଦଳର ନେତୃବୃନ୍ଦ ଓ ପ୍ରାର୍ଥୀ ଶ୍ରୀ ମହାପାତ୍ର ଆମ୍ ଆଦମୀ ପାର୍ଟିର ଲକ୍ଷ୍ୟ ଓ ବିଚାରଧାରା ସଂପର୍କରେ ଲୋକଙ୍କୁ ବୁଝାଇଥିଲେ। ଦିଲ୍ଲୀ ଓ ପଞ୍ଜାବ ଭଳି ଆପ୍ ଓଡ଼ିଶାରେ ଶିକ୍ଷା ଓ ସ୍ୱାସ୍ଥ୍ୟ କ୍ଷେତ୍ରରେ ବୈପ୍ଳବିକ ଉନ୍ନତି ଆଣିବା ଏବଂ ରାଜ୍ୟକୁ ସବୁକ୍ଷେତ୍ରରେ ବିକଶିତ କରିବା ଲାଗି ଯୋଜନା ପ୍ରସ୍ତୁତ କରିଛି ବୋଲି ରାଜ୍ୟ ସଭାପତି ନିଶିକାନ୍ତ ମହାପାତ୍ର, କଟକ ଜିଲ୍ଲା ସଭାପତି ଦୁର୍ଗାପ୍ରସାଦ ପରିଡ଼ା ଓ ପ୍ରାର୍ଥୀ ଶ୍ରୀ ମହାପାତ୍ର ପ୍ରକାଶ କରିଥିଲେ। ସେମାନେ ଉଭୟ ବିଜେପି ଓ ବିଜେଡି ଦଳକୁ ତୀବ୍ର ସମାଲୋଚନା କରି ଆପକୁ ଥରେ ସୁଯୋଗ ଦିଅନ୍ତୁ ବୋଲି ଲୋକଙ୍କୁ ନିବେଦନ କରିଥିଲେ।
Comments are closed.