ସମାଜ ଡିଜିଟାଲ ଡେସ୍କ: ପାକିସ୍ତାନ ପାଇଁ ଗୁପ୍ତଚରି କରି ଗିରଫ ହୋଇଥିବା ହରିୟାଣାର ମହିଳା ୟୁଟ୍ୟୁବର ଜ୍ୟୋତି ମାଲହୋତ୍ରାଙ୍କର ଆଉ ଏକ ଭିଡିଓ ସାମ୍ନାକୁ ଆସିଛି। ଜ୍ୟୋତି ପାକିସ୍ତାନୀ ଗୁଇନ୍ଦା ସଂସ୍ଥା ପାଇଁ ଏତେ ଗୁରୁତ୍ଵପୂର୍ଣ୍ଣ ଥିଲେ ଯେ, ସେ ପାକ୍ ଗସ୍ତ କରିବା ସମୟରେ ପୁଲିସ ତାଙ୍କୁ ସୁରକ୍ଷା ଦେଉଥିଲା। ଏଭଳି ଦୃଶ୍ୟ ଥିବା ଏକ ଭିଡିଓ ବର୍ତ୍ତମାନ ସାମ୍ନାକୁ ଆସିଛି। ସ୍କଟଲାଣ୍ଡର ଜଣେ ୟୁଟ୍ୟୁବର ଏହି ଭିଡିଓଟିକୁ ଗତ ମାର୍ଚ୍ଚ ମାସରେ ସାମାଜିକ ଗଣମାଧ୍ୟମରେ ଶେୟାର କରିଥିଲେ। ଜ୍ୟୋତିଙ୍କ ଗୁପ୍ତଚରି ବୃତ୍ତି ସାମ୍ନାକୁ ଆସିବା ପରେ ଉକ୍ତ ଭିଡିଓଟି ଏବେ ଭାଇରାଲ ହେବାରେ ଲାଗିଛି।
ଭିଡିଓରେ ଦେଖିବାକୁ ମିଳିଛି ଯେ, ଜ୍ୟୋତି ଲାହୋରର ଏକ ବଜାର ଅଞ୍ଚଳରେ ବୁଲି ବୁଲି ଭିଡିଓ କରୁଛନ୍ତି। ତାଙ୍କ ପାରିପାଖେ ଅତି ନିକଟରେ ୧୦ରୁ ୧୨ ପୁଲିସ କର୍ମଚାରୀ ରହିଛନ୍ତି, ଯେଉଁମାନଙ୍କ ମଧ୍ୟରୁ କିଛି ପୁଲିସ ପୋଷାକରେ ଥିବାବେଳେ ଅନ୍ୟ କେତେଜଣ ସାଦା ପୋଷାକରେ ଥିଲେ। ସମସ୍ତଙ୍କ ହାତରେ ଏକେ-୪୭ ବନ୍ଧୁକ ରହିଥିଲା। ପାକିସ୍ତାନୀ ଗୁଇନ୍ଦା ସଂସ୍ଥା ସହିତ ଜ୍ୟୋତିଙ୍କର କେତେ ଘନିଷ୍ଠତା ରହିଛି ତାହା ଏହି ଭିଡ଼ିଓରୁ ସ୍ପଷ୍ଟ ଜଣାପଡ଼ିଛି।
ସୂଚନାଯୋଗ୍ୟ, ଦୁଇ ସପ୍ତାହ ତଳେ ଜ୍ୟୋତିଙ୍କୁ ପାକିସ୍ତାନ ପାଇଁ ଗୁପ୍ତଚରି କରିବା ଅଭିଯୋଗରେ ହରିୟାଣାର ହିସାରରୁ ପୁଲିସ ଗିରଫ କରିଥିଲା। ଏହା ପରେ ସେ କିପରି ନିଜ ୟୁଟ୍ୟୁବ ଚ୍ୟାନେଲ ଜରିଆରେ ଏବଂ ଅନ୍ୟ ସାମାଜିକ ଗଣମାଧ୍ୟମ ଜରିଆରେ ପାକିସ୍ତାନକୁ ଗୁରୁତ୍ଵପୂର୍ଣ୍ଣ ତଥ୍ୟ ଦେଉଥିଲେ ତାହା ସାମ୍ନାକୁ ଆସିଥିଲା।
