‘ନୂଆ-ଓ’ କାର୍ଯ୍ୟକ୍ରମ: ବିଜେବି ସ୍ୱୟଂଶାସିତ ମହାବିଦ୍ୟାଳୟରେ କ୍ରୀଡ଼ା ପ୍ରତିଯୋଗିତା ଶୁଭାରମ୍ଭ

ଭୁବନେଶ୍ୱର: ଓଡ଼ିଶାର ଯୁବପିଢ଼ି ମାନଙ୍କୁ ସଂଗଠିତ କରିବା ଏବଂ ସେମାନଙ୍କ ସଶକ୍ତିକରଣ ଦିଗରେ ଓଡ଼ିଶା ସରକାରଙ୍କ ଦ୍ଵାରା ନିଆଯାଇଥିବା “ନୂଆ -ଓ” କାର୍ଯ୍ୟକ୍ରମର ଅଂଶବିଶେଷ ସ୍ୱରୂପ ଆଜି ବିଜେବି ସ୍ୱୟଂଶାସିତ ମହାବିଦ୍ୟାଳୟରେ କ୍ରୀଡ଼ା ପ୍ରତିଯୋଗିତାର ଶୁଭାରମ୍ଭ ହୋଇଛି।

ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ତଥା ରାଜ୍ୟସରକାରଙ୍କ ସମନ୍ବିତ ଯୁବ ବିକାଶ କାର୍ଯ୍ୟକ୍ରମକୁ ପ୍ରାଧାନ୍ୟ ସ୍ୱରୂପ ମହାବିଦ୍ୟାଳୟ ପକ୍ଷରୁ ଚଳିତ ନଭେମ୍ବର ୧୫ ରୁ ଆସନ୍ତା ଡିସେମ୍ବର ୩୧ ପର୍ଯ୍ୟନ୍ତ ଅନୁଷ୍ଠିତ କାର୍ଯ୍ୟକ୍ରମରେ ବିଭିନ୍ନ ସାମାଜିକ, ସାଂସ୍କୃତିକ ଓ କ୍ରୀଡ଼ା ପ୍ରତିଯୋଗିତା ଆୟୋଜିତ ହେଉଛି।

ଏହି କ୍ରମରେ ଆଜି ମହାବିଦ୍ୟାଳୟ ପରିସରରେ ବିଭିନ୍ନ କ୍ରୀଡ଼ା ପ୍ରତିଯୋଗିତାର ଶୁଭାରମ୍ଭ ହୋଇଛି। ଆରମ୍ଭ ହୋଇଥିବା ଇନଡୋର ପର୍ଯ୍ୟାୟରେ କ୍ୟାରମ, ବ୍ୟାଡ଼ମିଣ୍ଟନ, ଲୁଡୁ ଆଦି ଖେଳ ରହିଥିବା ବେଳେ ଆଉଟଡୋରରେ କବାଡି, ଖୋ ଖୋ ଅନୁଷ୍ଠିତ ହେବ। ହକି ଖେଳକୁ ଅଧିକ ଗୁରୁତ୍ୱ ଦେବା ସହ ଆଗକୁ କିପରି ଭାବେ ଏହି ଖେଳ ପ୍ରତି ଯୁବପିଢ଼ି ଆକର୍ଷିତ ହେବେ ସେଥିନେଇ ମହାବିଦ୍ୟାଳୟ ପକ୍ଷରୁ ପଦକ୍ଷପ ନିଆଯିବ।