ଜୁନରେ ଏସିଆ କପ୍ ଖେଳିବା ସମ୍ଭବ ନୁହେଁ: ଶ୍ରୀଲଙ୍କା କ୍ରିକେଟ ମୁଖ୍ୟ
କଲମ୍ବୋ: କୋଭିଡ-୧୯ ମହାମାରୀର ଦ୍ୱିତୀୟ ଲହର ଜନିତ ଭୟଙ୍କର ପରିସ୍ଥିତିରେ ଆଗାମୀ ଜୁନ୍ ମାସରେ ଏସିଆ କପ୍ ଖେଳିବା ସମ୍ଭବ ନୁହେଁ ବୋଲି ଶ୍ରୀଲଙ୍କା କ୍ରିକେଟ ମୁଖ୍ୟ ଆଶଲେ ଡି ସିଲଭା କହିଛନ୍ତି। ସେ କହିଛନ୍ତି, ଏସିଆ କପ୍ ଆୟୋଜନ ଅଧିକାର ଶ୍ରୀଲଙ୍କାକୁ ମିଳିଥିଲା। ଗତବର୍ଷ ଏହି ଟି୨୦ କ୍ରିକେଟ ଟୁର୍ଣ୍ଣାମେଣ୍ଟକୁ କୋଭିଡ-୧୯ ସଂକ୍ରମଣ କାରଣରୁ ବନ୍ଦ ରଖାଯାଇଥିଲା। ଚଳିତ ବର୍ଷ ମଧ୍ୟ ଏହାର ଆୟୋଜନ ଅସମ୍ଭବ ହୋଇପଡିଛି। ସୂଚନାଯୋଗ୍ୟ ଯେ ୨୦୨୨ ଏସିଆ କପ୍ ଆୟୋଜନ ଅଧିକାର ପାକିସ୍ତାନକୁ ମିଳିଛି।
ଟି୨୦ ବିଶ୍ପକପ୍ ପୂର୍ବରୁ ଏସିଆ କପ୍ ଆୟୋଜନ କାର୍ଯ୍ୟକ୍ରମ ରହିଥିଲା। ଟି୨୦ ବିଶ୍ୱକପ୍ ଚଳିତ ବର୍ଷ ଅକ୍ଟୋବର-ନଭେମ୍ବର ଆୟୋଜନ କାର୍ଯ୍ୟକ୍ରମ ରହିଛି। ତେବେ ବର୍ତ୍ତମାନ ପରିସ୍ଥିତି ଦୃଷ୍ଟିରୁ ଶ୍ରୀଲଙ୍କାରେ ଚଳିତ ବର୍ଷ ଜୁନରେ ଏସିଆ କପ୍ ଆୟୋଜନ ସମ୍ଭବ ନୁହେଁ ବୋଲି ଡି ସିଲଭା ବୁଧବାର ଗଣମାଧ୍ୟମ ନିକଟରେ କହିଛନ୍ତି। ଏସିଆ କପ୍ ଶେଷଥର ପାଇଁ ୨୦୧୮ରେ ଖେଳାଯାଇଥିଲା। ସେହିବର୍ଷ ୟୁଏଁଇ ଏହି ୫୦ ଓଭର ଟୁର୍ଣ୍ଣାମେଣ୍ଟ ଦୁବାଇ ଓ ଆବୁଧାବିରେ ଆୟୋଜନ କରିଥିଲା। ସେଥିରେ ଫାଇନାଲ ମ୍ୟାଚରେ ବାଂଲାଦେଶକୁ ୩ ୱିକେଟରେ ପରାସ୍ତ କରି ଭାରତ ଚମ୍ପିଆନ ହୋଇଥିଲା।
Comments are closed.