ନୂଆଦିଲ୍ଲୀ : ଏଣିକି ବିନା ପାସପୋର୍ଟ ଓ ଆଇଡି କାର୍ଡରେ ବିମାନଯାତ୍ରା ସମ୍ଭବ ହେବ । ସାଧାରଣତଃ ବିମାନବନ୍ଦରରେ ପହଞ୍ଚିବା ପରଠୁ ବିମାନରେ ବସିବା ଭିତରେ ଅନେକ ପ୍ରକ୍ରିୟା ଥାଏ । ଏସବୁ ପୂରଣ କରିବା ପରେ ହିଁ ବିମାନ ଯାତ୍ରା ଆରମ୍ଭ ହୋଇଥାଏ । ପାସପୋର୍ଟ ଓ ଆଇଡିଠୁ ଆରମ୍ଭ କରି ସମସ୍ତ ସାମଗ୍ରୀର ଚେକିଂ ଭଳି ସିକ୍ୟେରିଟି ପ୍ରକ୍ରିୟାକୁ ପାର କରିବା ପରେ ଯାତ୍ରୀ ବିମାନରେ ବସିଥାଏ । କିନ୍ତୁ ଏଣିକି ପାସପୋର୍ଟ, ଆଇଡି ଦେଖାଇବା, ଚେକ୍-ଇନ୍ ଏବଂ ବୋର୍ଡିଂ ପ୍ରକ୍ରିୟାକୁ ବାଦ୍ ଦେଇହେବ । ଏହା ଆବୁ ଧାବୀର ଜାୟଦ ଅନ୍ତର୍ଜାତୀୟ ବିମାନ ବନ୍ଦରରେ ଖୁବ୍ ଶୀଘ୍ର ସମ୍ଭବ ହେବାକୁ ଯାଉଛି ।
ଆବୁ ଧାବୀର ଜାୟଦ ଅନ୍ତର୍ଜାତୀୟ ବିମାନବନ୍ଦରରେ ବିମାନ ଯାତ୍ରାରେ ଏହି କ୍ରାନ୍ତିକାରୀ ପରିବର୍ତ୍ତନ ଆସିବାକୁ ଯାଉଛି । ଇନୋଭେଟିଭ୍ ସ୍ମାର୍ଟ ଟ୍ରାଭେଲ ପ୍ରୋଜେକ୍ଟ ଜରିଆରେ ୨୦୨୫ ସୁଦ୍ଧା ବିମାନବନ୍ଦରରେ ଅତ୍ୟାଧୁନିକ ଟେକ୍ନୋଲୋଜି ଲାଗୁ ହୋଇଯିବ । ପ୍ରତି ସ୍ଥାନରେ ସେନ୍ସର ଲଗାଯିବ । ଏଥିରେ ଯାତ୍ରା ଅନୁଭୂତି ଅଧିକ ସୁରକ୍ଷିତ ଏବଂ ସୁବିଧାଜନକ ସହ ଶୀଘ୍ର ମଧ୍ୟ ହୋଇପାରିବ ।
